الحوار المتمدن - موبايل
الموقع الرئيسي


بغداد

سامي عبد المنعم

2009 / 3 / 26
الادب والفن


انه اعرفچ من گبل ..
ياحلوه يابغداد
واعرف كل درابينچ ولیلچ
واعرف اشبابیچ ذاك الصوب
والشواكه وعگود الاكراد
ثوره داخل.. والچوادر
ولیل ابو سرحان وهموم الگهاوي
والحصيري المات جوع وعشگ
بس ما خان الضمیر
حبيبه يابغداد اخاف العتب يلچم اجروحچ
وانتي عشگچ عشگ خرسه
چنتي نجمة ليل بس محد يعرفچ
والنجم بس ینفگد وکت الظلام
غادرت صفناتچ الحلوات وحدي
وفتشوني ...
مالگوا كلشي وخجلوا
من لگوا بس صورتچ دمعه بعیوني
وحذروني...
گالوا توقع على هذا القرار..
اخر مره احلم بيچ
واخر مره اشوفچ
احبیبه یا بغداد.. یمته ایرد عشگنه
ویمته نرجع مثل الاول .. ؟
سولفت للناس عنچ.. یاعفیفه
البعض منهم صدگوني
والبعض گالوا اتبالغ
وین اکو ابهلدنیه هذا التحچي عنه
جاوبتهم .. ادري ماكو
بس اكو ابجنة وطنه
گبل چان اللیل..
من وكت العصر يلبد ابسدچ
وینگلب لیلچ نهار
وچان حته الضوه من لیلچ ایغار
والنواسي.. ودجله
مسگوفین كاسات وعشگ
وامشي بالزحمه واشوف الناس
هذا اليشتري وذاك اليبيع
وانتچي.. واغفه على صدرچ
وبعطر شعرچ اضیع
وهسه ...
هسه كلما اريد اشوفچ
ينرسم بعيوني كل الخوف
واشوفچ حيل ظلمه
ريت كلمن ظلمچ مايلتگي ابعمره نهار
وريته مسگوم ابحیاته الباگ ضحكات الزغار
وريته لاعاش الذبح فرحة اهلنه
ولچ معقوله .. اشوفنچ حزینه ؟
وانتي ام الفرح چنتي
گالت .. ودمعتها صبت على خدي
[ جاوبني تدري الوكت بوگاته غفلاوي ]
ليش رحتوا وتيهيتوني بدين الوكت وحدي ..؟
يمته اشوفچ ياعظيمه
ويمته اشوف الضحك بعيونچ
ونرجع مثل الاول
وارجع اصغير طفل .. كلش طفل
وابصف الاول
والمعلم.. بعده ذاك ابهيبته
ويظربني بالمسطره اب ايدي
اشكثر مسطرته حنينه
علمتني اشلون اكتب واجبي
ويوم الخميس اقره قصيده
ومن عهد ذاك الخميس
اتوالمت ويه الشعر
يمته نرجع مثل الاول .. ؟
ولو كلشي البيچ يحبيبه تبدل
لكن انه وداعتچ
ما بدلن گلبي الليالي
وصرت احسن من الاول
لان ادري..
الماله اول ماله تالي

**
المانيا - قلعة سكر





التعليق والتصويت على الموضوع في الموقع الرئيسي


التعليقات

1 - رائع وجميل
رحيم الغالبي ( 2009 / 3 / 25 - 20:56 )
رائعة بغداد
رائعة القصيدة
رائع سامي عبد المنعم ابو نورس
انها بغداد الذكريات السعدون ابو نؤاس اتحاد الادباء والمسرح الوطني..بغداد نصب الحريه وجواد سليم
بغداد 14 تموز وعبد الكريم قاسم
بغداد سقوط الصنم 9 4 وصورة الطاغيه يضربها ابو تحسين
بال......ويمزقها بحرقة
تحياتي

اخر الافلام

.. كل يوم - لقاء في الفن والثقافة والمجتمع مع الكاتب والمنتج د/

.. الفنان أحمد سلامة: الفنان أشرف عبد الغفور لم يرحل ولكنه باقي



.. إيهاب فهمي: الفنان أشرف عبد الغفور رمز من رموز الفن المصري و

.. كل يوم - د. مدحت العدل يوجه رسالة لـ محمد رمضان.. أين أنت من



.. كل يوم - الناقد الرياضي عصام شلتوت لـ خالد أبو بكر: مجلس إدا