الحوار المتمدن - موبايل
الموقع الرئيسي


اغتيال

عمر عبد العزيز

2009 / 12 / 20
الادب والفن


زمان في المدرسة كنا عيال من كل شكل و لون
تبص علينا تتأمل في أحلام يوم تشكِّل كون
فينا المسلم و فيه مسيحي خِلق و طباع بتتعدد
براعم للحياة نابتة في حُضن و قلب جوه عيون

خيال بنعيشه في الصحبة مبنحسش بأي فروق
لا يفرِق لون ولا ملة ولا خالق ولا مخلوق

و فاكر إن آخر الفصل كان قاعد هناك ماجد
مانيش فاكر إيه اسم الأب لكن فاكره وحيد ساكت
و كنا كلنا عارفين و ليه عارفين مانيش عارف
بكون ماجد ده طفل غريب و إنه في كل شئ زاهد
سكوت مع ضعف و سكينة تخلّي الكل يتّريق
و لو يوم انشخط فينا هدومه في ثانية تتغرق
قصير شعره متكتكت بضب و بينادوه أرنوب
و كان اسمه على مسمى خيال ضل و مالهش ذنوب


لا كان بيغير على حقه ولا يحس إنه ليه مالأصل
كيان باهت مابنحسش بوجوده مالأساس في الفصل
و مانساش وحنا في الفسحة بنجري بفرحة تقلب عيد
و ماجد ماشي متداري بيتّاوى في ركن بعيد

و رغم اني صغير إلا انه كان بيوجعني
انا اللي بديت اقرب له و اسمعله و يسمعني
ماجد ده كان يتيم الأب و أمه كمان مهيش عايشه
وحيد في الدنيا ويّا عجوز يا جده يا عمه مش فارقة
فراش عايش في شرنقته خضار مروي من المالح
شايف دنيا بعيون جده شايف بكرة بلون كالح

و خوف مالوحدة متخزن و يمسك فيا أنا كصديق
في بحر الدنيا يشوفونا ده قشة معلقلها غريق

فتح لي طاقة و بيحكي ده حلمه يروح لأمه و ابوه
دموع في عيونه تترقرق سؤال ضاغط و بيدقق
دول اللي جابوه إذا حبوه ليه مشيوا لوحدهم و سابوه؟؟


و لما كان بييجي العيد يموت ماجد 200 مرة
ما لما الوحدة تتغرب تونسها دموع مرة
جعان خايف من الفرحة و حتى في عيد لميلاده
يلاقي في قلب نومه ملاذ يلاقي في البكا زاده

و أول يوم في سنة 5 في يوم كان مبتدي عادي
و ميس بتمهد الكلمة بدون اسباب بصوت هادي
و فجأة حروفها تبقى سنان تحول صمتنا لجنان
و ترنيم للصلاة مهزوم لأول مرة اشوف ماجد
حياة عاشها جريح مكسور في موته الكل ليه ساجد

و ابتدي المس القهرة و عجز و غل يملاني
طفولة حايرة في الملكوت و الغاز تبقى ملو تابوت
تجرّح روحي اسئلتي و ليه و ازاي و اشمعنى
حقيقة واحدة تتردد ماجد عمره ما جاي تاني

و اكبر و الهموم تكتر و اشكالنا بتتغير
تتوه ارواحنا في ذكرى يا تفرِحنا يا تحزنا
و يفضل ماضي ساكنا و ناسه بتقوى و بتكبر
و ماجد لسه جوايا قصير شعره متكتكت
و لكن اللي جدّ عليه ملامح بسمة بتحير





التعليق والتصويت على الموضوع في الموقع الرئيسي


اخر الافلام

.. المخرج الاردني أمجد الرشيد من مهرجان مالمو فيلم إن شاء الله

.. الفنان الجزائري محمد بورويسة يعرض أعماله في قصر طوكيو بباريس



.. الاخوة الغيلان في ضيافة برنامج كافيه شو بمناسبة جولتهم الفني

.. مهندس معماري واستاذ مادة الفيزياء يحترف الغناء




.. صباح العربية | منها اللغة العربية.. تعرف على أصعب اللغات في