الحوار المتمدن - موبايل
الموقع الرئيسي


صرخة عتاب

عمر عبد العزيز

2010 / 1 / 13
الادب والفن


يا بلدي ليه بشوف حضنك خانقنا كأنه لمراة أب؟؟

تسرحّي لينا مشاعرنا بمشط من اللي جواه موس
تحنِّي علينا تداوينا بقهرو من زمن مغشوش
تشدِّي رموشنا بالقوة تفتَّحي حلمنا بكابوس
نشوف غيرنا بيتنعًّم في خيرنا و حقنا منقوص

يا بلدي ليه أنا بشوفك دايماً ماشية بالمعكوس؟؟

بشوفك قطرة بترطَّب عيون معمي
بشوفك صفحة مسطورة و أنا أمي
بشوف فيكي جولف و ملاعب و ذل صريح
ولادك زهر متفتح بجِدر كسيح
بشوفك غيمة هتمطَّر في ليلة صيف
بشوف فيكي ظُلم و أسيّة بألوان طيف
اشوفك ولا ماشوفكيش ما دي حقيقة
تحّرصّي منا و تآمني لسرّيقة
تجرحّي فينا ف كل لحظة و دقيقة

ليه دايماً باصة لولادك بعين عورة؟؟

بتقسي علّى مدبوحلك و تتجاهلي اللي موصوفلِك
توطِّي لخلق مسعورة

يا بلدي ردي مش ليه في خيرِك حق زي الناس؟؟
بشوف نيلك و شطآنك لناس ما بتبني بتكسر
و يطفح غلبنا مجاري نموت على شطُه ما نقصّر
مزاد عمري ياخُدله سنين ما حد يجيِه ولا يزايد
تناقصي فجأة بتلاقي كتير شاري كتير رايد
و بترسّي كدة ببلاش على اللي بيبني جنات كُفر
يسكِّنها لِشرار خلقك و اظل شريد أنا العابد
و نقضي عمرنا مطاريد و ندفعه لجل ما نكابد

يا أرضي ليه سُباط نخلك طارح كيوي؟؟
ليه عَصرة بِذر كِتّانِك تطلَّع زيت زيتون سيوي؟؟


سنابل حقك انسحقت و لقمة عدلك انمحقت
ليه بتبوري على الفُقرا و تطرحي كِشك للقادرين؟؟
بتاخدي من سمانا الضِل تعرَّشي غيرنا بالياسمين؟؟
ولادك الغلابة الّلي رووا حصوة ترابك دم
بقم لاجئين على ارصفتك بيحصدوا من عينيكي الذَّم

يا مصر يا كلمة إلهية بدأ بيها ضمير الكون
لازم إحنا الّلي نبقى كُن يقوم يصحى الضمير فيكون
و حتى ميزانك إن بايظ بقصده ولا صابه جنون
لازم نِكسر دولاب عشقِك و نسحب من رصيد مخزون
و نشقى عرقنا حيدرَّج قياسه يخلّي وحدته عدل
ده عمر الحق يا بلدي ما ييجي Delivery بالتليفون





التعليق والتصويت على الموضوع في الموقع الرئيسي


اخر الافلام

.. الفنان أحمد عبد العزيز ينعى صلاح السعدنى .. ويعتذر عن انفعال

.. االموت يغيب الفنان المصري الكبير صلاح السعدني عن عمر ناهز 81



.. بحضور عمرو دياب وعدد من النجوم.. حفل أسطوري لنجل الفنان محمد

.. فنانو مصر يودعون صلاح السعدنى .. وانهيار ابنه




.. تعددت الروايات وتضاربت المعلومات وبقيت أصفهان في الواجهة فما