الحوار المتمدن - موبايل
الموقع الرئيسي


اهداء الى الشاعر الراحل عزيز السماوي

سامي عبد المنعم

2012 / 6 / 8
الادب والفن


خلگ درويش
سامي عبد المنعم

الى الصديق الراحل الشاعر الكبير عزيز السماوي

اصابيعك .. اتوج اشموع بالظلمه قصايد
وقميصك .. ايصد چف الريح ويعاند
صهيل اچفوفك .. ايطرز هوى الليل
نهر عاش العمر كله { عزيز } وعالزمن شاهد
اسرارك غميجه .. وما اتعرف الخوف
هيبة جبل شامخ على مد الشوف
ضميرك يطرد الوحشه لهب وسيوف
نزل دمعك .. على اورود القميص احروف
انته الشوف ...
منو يگدر ايطفي ابعينك الشوف
خلگ درويش ...
ما مل السفر يلمض لهب واسرار
حزين .. وبالثلج وجيت وردة نار
مشعل يحصد الظلمه..
ايسير عالفرح خطار
مهر يسبگ الريح امنلهوى ايغار
صهيله ايفزز الغبشه شمس وانهار
عنيد .. وراسه مايندار
هايم اچفوفك لهب .. بالغربه محتار
صايم .. ايصلي على الجرح
والوطن تسبيح
شيبك ايلاگي الهوى ..
كحيله وشبگها الريح
مستاحش قميصك ..
خايف وبالظلمه مذعور
صبر درويش واگف للصبح ناطور
يلتمن اصابيعك .. شمع وانذور
نهر عطشان صار اسنين
ومشاحيف الحلم تتنطر الصوبين
ياخذني الهوى ابغفله واطگ جنحين
لوليلي ...
لوليلي بلكي استچن ياشجرة التين
لوليلي .. بين الماي والطين
ياشجرة التين ...
كل تينه ريحة نهد .. فاحت بالبساتين
ياشجرة التين ...
غربه .. وعذاب .. وثلج ..ليل العراقيين
اشلون ايصير ..
يكتلني العطش وابروحي نهرين
ليوين ... ليوين اصبر الروح ليوين
اجروح ظيم الوطن بيه نياشين
ليوين .. اصبر الگلب باحلام چذابه
الموت ياخذ شهم
والنذل ما يوصله ولا يوگف ابابه
صيت الوفي نخوته.. والوطن بترابه
والگلب من دگته .. والعاشگ احبابه
والجفن عند رمشته .. والقوس نشابه
والليل وي نجمته .. والجرح عطابه
چذاب ...
چذاب هذا الزمن .. چذاب
ما اصدگ ابضحكته ولا ارضه العتاب
كل يوم .. ياخذ غفل من عندي احباب
هيبة { عزيز } اشلون تندفن بتراب
صدگ .. بردن اچفوفك والشمع ذاب
صدگ.. ورد القميص التف بالتراب
نهر الفرات انهظم والبصره والسياب
ونخل السماوه بچه ابحرگه ودمع خنياب
{وكزار } صفنة وطن يتنطر الغياب
وامي كتلها الصبر .. وعيونها اعله الدرب
وامشرعه الابواب
خواف ...
خواف هذا الزمن .. خواف
مثل النذل لو صار سياف
ابروحي اصطوانة حزن تفتر عمر ورداف
ليل المنافي عطش .. قاسي ويذبل اشفاف
احلامه كلها رعب .. رگبه وحبل يلتاف
حيرني هذا الزمن .. خلاني امعلگ
لا يتعب اويستچن .. ولا گصته تعرگ
يهوى النذل والردي .. ويتخاصم ويه الحگ
واگفلي مثل القدر .. بلكي الجدم يزلگ
چتال .. جرح المحب .. چتال
يخنگني .. مثل الدمع ...
صفنه او بچي او موال
كلك اعناد وصبر ... صبرك صبر تمثال
اغانيك .. اتصلي اعله الجرح ..
واتريح البال
الك عطر الورد والشمع والياس
الك صافي الدموع ابنشوة الكاس
الك حب الوطن والليل والناس
العراق امنلشعر سوالك اقواس
ابو ذر .. وعلي .. وعمار ..والحلاج
نصبولك مشاعل ترفع الراس
ايظل صوتك نغم وي رفعة الكاس
وايظل اسمك علم طول الدهر ينباس





التعليق والتصويت على الموضوع في الموقع الرئيسي


التعليقات

1 - الغالي ابا نورس
عبد الرضا حمد جاسم ( 2012 / 6 / 9 - 10:50 )
تحيه وتقدير
احسنت فيما قلت ووصفت و في تذكرك للراحل الكبير

2 - العزيز ابو نورس الورد
عبد الرضا حمد جاسم ( 2012 / 6 / 9 - 16:35 )
اكرر التحيه
كنا قد التقينا في نادي الموظفين في الناصريه في السبعينات وعلى هامش مهرجان الشعر الشعبي الشاعر الراحل عزيز السماوي وكان معه ومعنا على نفس الطاوله شاعر مرهف من اهالي السماوه اسمه محمد كاندو وقد نشر في حينها قصيده رائعه لا ازال احفظ جزء منها تقول:
علرصيف اطفال الولايه غفو
اثنين فد باروده ماتو
بيد اصغرهم صمغ
وبيد اكبرهم جريده
وعالرصيف الثاني
صوت ابنيه من عمر الزهور
اتمرجح الموت بكصايبه ظفر
اسأل الماي البروحي
لكَيت ماي الله وفر
هل تعرف عنه شيء اتمنى ذلك
اكرر التحيه والى اللقاء في عيد اللومانتيه القادم

اخر الافلام

.. منهم رانيا يوسف وناهد السباعي.. أفلام من قلب غزة تُبــ ــكي


.. اومرحبا يعيد إحياء الموروث الموسيقي الصحراوي بحلة معاصرة




.. فيلم -شقو- بطولة عمرو يوسف يحصد 916 ألف جنيه آخر ليلة عرض با

.. شراكة أميركية جزائرية لتعليم اللغة الإنجليزية




.. الناقد طارق الشناوي : تكريم خيري بشارة بمهرجان مالمو -مستحق-