الحوار المتمدن - موبايل
الموقع الرئيسي


الحظ والبخت / مهداة للفقراء ، وتذكير للذي أوعد وأخلف

حامد كعيد الجبوري

2014 / 12 / 29
الادب والفن



أشمالك يا بخت ما ألجت فد يوم
ولا مره أخجلت ما جنـَصت سيد
سولفلّي بصراحه بلكن أقنع بيك
زماطك بس سوالف ترعد وتزبد
بيش أتوفقت كاشفني خل ارتاح
سياسة لو علم لو شعرك اتعربد
وحدك منفرد والكول عشر أمتار
فاضحنه وتناول خصمك أيسدد
كلها أمحزمه وتركض ركض معتام
ويرجع ليوره بس ( حامد كعيد)
***
على باب الفُكر علكت سبع أعيون
أنخاف أمن الغنايه أعيونهم تحسد !
جزع مني (الفلق) من كثر ما أقراه
و (شر غاسق وقب) و (النافثه) تعكد
شهر رمضان يفرض كل سنه ع الناس
ورمضاني سنه وما نلحك أنسدد
اليتيم أبن اللطم يا عيد يفرح بيه
شايفلك يتامى أبضيمها أتعيد
جدر فوك الهظيمه وجدر للشوغات
وجدر يطفح دمع مي الملح نثرد
عفتها ع التدرج هاي تشبه ذيج
سمايّ أمغيمه وبلا مطر ترعد
خابرت المنيه ورمشت عالموت
وتابوت النفاهه أبدارنه أمدد
كضت بين الحرز والنذر والدعيات
طاحظ العمر من يخلص أتركد
***
غفيت أعله النواعي وأصحه ع البستات
وكاروكي جمُر والوَحََّده أيعدد
ناصب للفرح هلبت شبجنـَه أيصيد
فرحه ومن تصل حلك الشبج تشرد
الفقير أعله البعير وجلب ينهش بيه
ويهز ذيله جلبنه وللدثو يسجد
ولد متعه أنحسبنه وأمنه بت السوء
وهو أبن الحراير طاهر المولد
أزرعت دونم فرح حد ما وصل ينحاش
النايم للظهاري أتشلَه ويحصد
غلط مره الفرح تايه ودَك الباب
تأسف وأعتذر عن غيرنه ينشد
نويت أعله البخت خيره أفتحت قرآن
طلع (تب ولهب) وحبالها أتقيد
زاعلت الفرح والكيف طلكناه
وميثاق الشرف ويّه الحزن أعقد
لا ماشي الفرح ما ريده يحجي أوياي
ولذة دنيتي أبمسجد صبر أعبد
(إبن شداد ) صاحوا حزموني أحزام
وصعدت غيرتي وثوب الحزن أسرد
ومن صارت مغانم حصة الأسياد
نسبوني (الزبيبه) وحصتك منعد
***
كالولي القناعه أكنوز فوك كنوز
وجربت القناعه وبوبها أتسدد
طرزت الفرح بكلوب المحبين
أشعاري أبقفص محبوسه وتغرد
على كثر الغسل غيّر هدمنه اللون
مَلحَه ومن بياض أوجوهنه أتورد
شفت البير عمدا يرمي بيه أحجار
الزنيم وخنجره أبجبد البشر يغمد
أبسياسة هالوكت شيكيش أبن العاص
علسوا لحمته وحتى العظم يجرد
آنه إبعازة أبو أبيمناه يكص يسراه
يخاف النيه سوده وظنته أتفرهد
آنه أبعازة علي أبكلبه اليتامه أتبات
ويحضنها أبرحمته وراسها أيمسد
آنه أبعازة علي خلكه أبوساعة كون
ولا أبمال الحرام أبهدمته أيجدد
آنه أبعازة علي موبس صلاة وصوم
قرآنه ضميره وقبلته الموعد
***





التعليق والتصويت على الموضوع في الموقع الرئيسي


التعليقات

1 - لو كان الفقر رجلا
جابر الحسيني ( 2015 / 1 / 1 - 07:14 )
هذا انت حامد هيج تكول
جا الفقير الصدك سيكول ويعدد
عندك بالحلة قطعة واثنين بيوت
هذا اللي نعرفه والصحيح أزيد
عندك تلث رواتب تقبض بيمناك
كل شهر شايفك تعدهن عد
ليش بعد هالمسكنة والنوح
لو نهج صار والدمع على الخد
احنا شيعة فاطمة وابو الحسنين
اذا هجرنا الحزن بيدنا نجدد
هههههه...مع التحية وكل عام وانت بخير أكثر تجدد

اخر الافلام

.. سماع دوي انفجارات في أصفهان وتبريز.. ما الرواية الإيرانية؟


.. عاجل.. وفاة الفنان الكبير صلاح السعدنى عن عمر يناهز 81 عاما




.. وداعا العمدة.. رحيل الفنان القدير صلاح السعدنى


.. وفاة الفنان الكبير صلاح السعدني عن عمر يناهز 81 عامًا




.. المتحدة للخدمات الإعلامية تنعى الفنان الكبير صلاح السعدني