الحوار المتمدن - موبايل
الموقع الرئيسي


ليه يارب ما خلقتنيش ألمانى

حمدى السعيد سالم

2015 / 12 / 28
مواضيع وابحاث سياسية



من 10 سنين تقريبًا وقعت حادثة مأساوية في مدينة شيمنتس في ولاية زاكسن الألمانية.بلاغ من الأهل باختفاء بنتهم 24 سنة.البنت عندها ميول انتحارية.طيارة هيلكوبتر تطلع تقلب عليها المدينة رأسًا علي عقب.ترجع بلا طائل.الأهل يبلغوا أنها خرجت بعربيتها.الطيارة تطلع تاني،لكن المرة دي مش هترجع.خطأ بشري من قائد الطيارة،وقعت، اتحطمت ومات 4 من طاقمها الطبي المكون من 5 أفراد..والبنت؟ كانت موجودة علي بعد 8 أحياء من بيتها في عربيتها،حاولت تنتحر،لم تمتلك الجرأة الكافية لقطع شرايينها بصورة قاتلة،شافت الدم،أغمي عليها..نقلوها المستشفي..
الغضب كان عارم وقتها..يعني عشان واحدة ،يموت 4 وتتحطم مروحية من طراز Sokol..وتطلع في الآخر جبانة خافت تنتحر..الشرطة في كثير من الحالات مش بتسيب الموضوع يعدي بالساهل..كاهن في كنيسة Frauenkirche في ميونخ ولع بخور عربي في مراسم زواج فأجهزة الانذار اللي مصممها شركة Hochtief انطلقت،لأنها مش متبرمجة علي النوع ده من الروائح،والمياه غرقت الكنيسة،وأجهزة الحماية المدنية قضت يومين في ازاحة المياه،وحاصرت مكان الكنيسة وأخلت محيطها ظنًا ان فيه مصيبة سوداء..اشتغالة الشرطة دي ليها تمن والكنيسة دفعته 2,5 مليون يورو تعويض عن مجهود ضاع علي الفاضي..
طيب ما بالك بالحادثة دي..هيشنقوا البنت ولا هيبيعوا اهلها كل ممتلكاتهم؟..لأ..الولاية استصدرت أمر قضائي بمنع نشر اسم البنت او صورتها في الجرائد عشان متبقاش هدف لحملة اعلامية، تحملها مسئولية موت المسعفين وتحطم الهليكوبتر..وده ممكن يضاعف أزمتها النفسية،ومحاولة الانتحار الفاشلة تبقي حقيقية..ومحدش عرف عنها حاجة،وفضلت مجهولة وتم علاجها..هي ضحية في نظر الدولة تمامًا كمسعفيها المتوفين..
-في نفس السنة وقعت واحدة من اسوأ حوادث الشرطة في الالفية الجديدة..لاجئ سيراليوني اسمه أوري يالوها اتسجن قبل كده 3 سنين بتهمة الاتجار في المخدرات..خرج بعدهم بقي مدمن مخدرات وكحول وعاطل وبياخد اعانة اجتماعية..اتمسك من دورية في مدينة ديساو..اتاخد علي القسم،اتعمله محضر تحرش لانه كان بيمد ايده علي البنات في الشارع..أوري نزل ضرب في 2 ظباط وكسر بعض محتويات القسم..فين وفين علي ماسيطروا
عليه..ودوه الحجز لوحده..وربطوه من رجليه وايده في السرير لغاية ما يفوق..كان في اعلي درجات الهيبرة من الكوكايين الي سفه..ايده مكنتش مربوطة كويس في السرير..طلع ولاعة من جيبه،ولع في السرير وهدومه وفي ظرف نص ساعة كان الحجز مولع،وهو في خبر كان..
الدنيا قامت ومقعدتش..ليه وليه الشرطة تربطه في سرير..بس ده مدمن وسكير ومتحرش وسوابق ورزع الظباط علقة،فتح نفوخهم..عايزينا نعملوا ايه نطبطب ونجيب شوكلاته..ده احنا حتي ممديناش ايدينا عليه..ربطناه عقبال ما يفوق..لأ كان لازم يروح مستشفي يتعالج،يفوق من آثار الادمان..يتعرض علي طبيب نفسي..ولو ليكوا حق عنده خدوه..بس لما يتعالج..الشرطة وشها بقي في الأرض من الناس والحملات اللي شُنت عليها من المجتمع المدني..نعملكوا ايه عشان نراضيكوا طيب؟..
بعتوا جابوا أمه ماريما ديامبو ميالو 59 سنة من سيراليون،حجزولها في فندق في المدينة..سمحوا لها تتابع التحقيقات.احنا اسفين يا حاجة..رجالتنا كان لازم يتضربوا ويقولوا كمان..أمه مسكتتش..الظباط لازم يتحاكموا...الشرطة وقفت محلك سر وهي شايفة اثنين من ظباطها بيتم تقديمهم للمحاكمة،بعد فصلهم من وظائفهم..أكثر من 8 سنين محاكمة انتهت في 2012 وأفرج عن الظباط بعد تشريدهم وتغريم كل واحد فيهم 50 الف يورو،ده غير غرامة دفعها القسم بضعف المبلغ..كل ده عشان ايه..الشرطة مستحملتش العنف،من مدمن ضربهم علقة..بس؟ ..آه بس..
-سنة 2011 وقعت واحدة من أكبر الفضائح في تاريخ ألمانيا..فضيحة البيض الحيوي Bio Eier..بعض المزارع في ولاية نيدارزاكسن..قالت الناس بتشتري البيض الحيوي بأربع أضعاف تمن البيض العادي..قشطة..نضحك عليهم ونبيعلهم البيض العادي علي انه حيوي ونقش فلوس بالعبيط..فكروا أنهم هيخلعوا لولا شكوي من مواطن دؤرم وسهن..عرف يميز بين الاثنين في محل،وحلف يمين طلاق لياخد فلوسه ..
الراجل كان عايز ياخد جوزين يورو فرق الشراء..لكن حكومة الولاية حلفت ماهتعدي الموضوع بالساهل..بدأت تحقيق مطول ،ما يمكن يكون الغلبان ده في غيره كتير..بدأت حملة وعرفت ان خمس مزارع الولاية نصابيين وبيخدعوا المستهلك..البيض سليم وزي الفل وكل حاجة بس مش حيوي..قفلت 150 مزرعة،حاكمت 5 من كبار اعمدة الزراعة في الولاية..أصدرت أحكام عليهم بمدد تتراوح من سنة ونصف ل 6 سنين..قدمت اعتذار للناس واللي عايز يجي ياخد فلوسه..يجيب وصل البيض وهنديله من فلوس الحرامية..
-حادثة البنت اللي تسببت في موت 4 مسعفين وتحطم مروحية،وهما بيدوروا عليها..معدتش كده برضه بالساهل..حاكموا البنت؟ ..لأ.. كانت السبب في دراسة موسعة أجرتها وزارة البحث العلمي BMBF في اواخر 2006 عن اكتئاب الألمان والفاجعة تكشفت.البنت كانت تجسيد لأزمة عملاقة بيواجهها الشباب..1000 واحد بيرموا نفسهم سنويًا تحت عجلات القطارات رغم توافر أسباب الرخاء المادي والأمان الوظيفي..دول بيصرفوا 22 مليار يورو سنويًا علي الأدوية المضادة للاكتئاب وبرضه المعدل بيزيد..طيب نعمل ايه عشان البنت دي وغيرها من ضحايا الاكتئاب؟..
نعالجهم ازاي؟..بالفن..الوزارة خصصت مبلغ يفوق ال 50 مليون يورو لتجربة تبدأ في مستشفيات Sä-;-chsisches Krankenhaus Arnsdorf و Sä-;-chsisches Krankenhaus für Psychiatrie und Neurologie Rodewisch لعلاج مرضي الاكتئاب بالغناء والرقص،علي أن يتم تعميمها لاحقًا في أماكن أخري ..الشاب من دول لو حس انه عنده مشكلة نفسية ممكن تتطور لاكتئاب نتيجة لضغط الشغل،يجي هنعمله اختبار من 100 سؤال..وبعدها نحدد نوع المزيكا المفضلة والرقصة المفضلة..ندخله أوضة يعزف ويرقص،ولو مش بيعرف ممكن نجيب له مدرب رقص..عايز ترسم في اوضة تالتة للرسم..اعمل اي حاجة ،خرج طاقتك..وكله علي حساب الحكومة..بس أهم حاجة متسيبش نفسك فريسة لمرض ينهشك،وتموت..نجن هنا لرعايتك وتمزيجك وترقيصك ان لزم الأمر..
غصب عن الواحد بيضطر يسترجع الحوادث الألمانية وهي نذر يسير في بحر واسع من اعلاء قيمة الانسانية لكن ربما هي الابرز..ويبص علي حال بلده..وحال ناسها..
غصب عنك بتضطر تقارن..بين مريضة تم تشويهها والدولة واقفة تتفرج وكانت هتتحبس كمان..وبين مواطن ألماني عنده بوادر أمراض نفسية فتُبادر الدولة لعلاجه بالرقص والغنا..بين شرطة تقاعست في حماية طفل الي أن ذُبح ..وأخري حركت مروحية لانقاذ فتاة من محاولة انتحار،ولما المروحية سقطت بمن فيها،لم توجه للفتاة اتهام،بل استُكمل علاجها ومجانًا..بين دولة ساكتة علي مسببات أمراض لاحصر لها والتلاعب بغذاء ودواء المصريين ومياه شربهم ..وأخري لا تجد مشكلة في اغلاق عشرات المزارع انتاجها يصل لمئات ملايين اليورو..فقط لشكوي مواطن من بيضة..
مقارنة قد تبدو للوهلة الأولي غير عادلة قياسًا لظروف البلدين..عندك حق طبعًا..لكن من الناحية المفاهيمية غاية في الانصاف..المقارنة في الأصل بين دولة مصرية لسه شايفة المواطن فيها جسم صغير بيتحرك في مجموع من 90 مليون ..وكلهم مالهمش ادني اعتبار، لا
لصحتهم ولا لأنفسهم ولا لأولادهم..الأهم حماية جبال وصحاري..حتي لو اللي المفروض بنحمي الوطن عشانهم،جالهم سرطان وفيروس سي، واولادهم ماتوا علي الطرق وفي
مدارس ومستشفيات، وبدل ما يتعالجوا يتشوهوا..مش مهم..يموتوا ويحيا الوطن..يحيا بمين ولمين؟..
ودولة تانية الأمن بالنسبة لها لم يعد مجرد حماية للتراب والحدود..الأمن في المقام الأول أمن انساني..أمن لشخصك،لغذائك،لطمأنينة بالك،وراحة نفسك.الأمر لايقتصر علي المواطن ..الأجنبي المقيم،أو حتي اللاجئ لو ضاعت حقوقه حتي لو مذنب وفيه العبر،فده سبب كافي لانتفاض المجتمع واجهزة الدولة ضدك..بناء الانسان،تعزيز مقدراته ،حماية حياته،وراحته..هو صلب الأمن وغايته،ومتي انُتهك.. فلا اعتبار لحماية دولة علي حساب دمار مواطنيها..بُناتها وحُماتها..
والدولة بس مسئولة؟..مظنش..الدولة خدت تفويض كامل من المواطن بتدمير صحته..شيك علي بياض المواطن مضاه في كل مرة تقاعس عن محاسبة مسئول أو حتي لوي بوزه..المواطن اللي يعيش في بلد عشمته بجهاز يعالج الايدز وفيروس سي،وطلعت بتضحك عليه في واحدة من أكبر الفضائح اللي ممكن تهز أي نظام سياسي علي الكوكب..وبعد كده ينسي ويبرر ويسامح ..لازم حكومته تعامله بالمثل وتسرطنه وتفشل كلاويه وتسيب ولاده يتدبحوا ويتحرقوا ويموتوا..
دولتك علي ما تربيها..احنا ربيناها علي استباحة كرامتنا..فلم تدخر جهدًا في انتهاكها..والألمان ربوها علي الخوف من العقاب وضرورة المحاسبة وتحمل المسئولية..وجنوا دولة بترفع قيمتهم..وحتي كمان قيمة كلابهم..
آه بالمناسبة الشرطة الألمانية في بريمن بدأت تجربة جديدة انها تلبس الكلاب البوليسية أحذية Toffler عشان تحميهم من برد الشتا..والمواطنين زمجروا اشمعني كلاب الشرطة وكلابنا لأ..فحكومة الولاية المدينة بريمن..احتواءًا لغضب الناس هتسمح لهم بشراء أحذية لكلابهم بربع ثمن أحذية كلاب الشرطة..واعتبرتها حقهم نتيجة للضرائب اللي بيدفعوها..
الفجوة بتزيد..للدرجة اللي حرفيًا هنعجز معاها عن مقارنة مواطنينا بكلابهم..ما لم يستفق الناس ويدركوا ان لهم حق،فينتزعوه من أعين الجميع..أيًا ما كانوا....
حمدى السعيد سالم
صحافى ومحلل سياسى واستراتيجى





التعليق والتصويت على الموضوع في الموقع الرئيسي


التعليقات

1 - جبت التايهة!
سامح عبدالله ( 2015 / 12 / 28 - 11:24 )
طيب متطالب بدستور علماني ذي الالماني! اذا كنت انت ياصاحب القلم تتحاشي الاشارة الي سبب تقيح الدمل خوفا من الازعر! احنا اللي حنفتحه وكمان حنضفه! من زمان قوي وحقوق كلابهم افضل من حقوق آمهاتنا!

2 - اصل مشكله عربان
على سالم ( 2015 / 12 / 28 - 15:28 )
فى تقديرى انها الثقافه والعقليه العربيه الاسلاميه البدويه العفنه ,السبب هو الاسلام بتناقضاته وشذوذه وهمجيته ودمويته وتخلفه وظلمه , السبب الرئيسى هو الاسلام والعروبه ,الاسلام والعروبه هى توليفه كارثيه لخراب اى امه او بلد ,انها وبال على اى امه ارتضت ان تكون اسلاميه بدويه صحراويه

3 - نورتنا
هانى شاكر ( 2015 / 12 / 28 - 21:11 )


نورتنا
____


ياه ... كل ده عندهم ... يا بختهم ياشيخ

انما لما انت نمس كدة و نفسك تكون المانى ( مش نمساوى ) ... عايز تقتل اوباما ليه و تطبق عليه حد الردة ؟!

دا المسلمين المتاسلمين - من نوعك كده - يا جدع ... خيالهم واسع .. و ذمتهم اوسع

دى مصيبة سودة يا جدعان

....

4 - ليسقط إبن تيمية
ماجدة منصور ( 2016 / 1 / 4 - 22:04 )
في استراليا...نرقص مع الدلافين كي نعالج الإكتئاب.0
وندفع غرامة مقدارها ألف دولار إذا تجرأ احدهم و رمى عقب سيكارة في الشارع.0
ويدفع السياسي أو القاضي غرامة بمعدل الضعف إذا خالف أحدهم القانون.0
ونحاكم من يتجرأ و يسألنا عن ديننا.0
في استراليا دفعت الحكومة الفدرالية مبلغ 10 مليون دولار لمواطن مسلم أخذت المخابرات في مراقبته لأنهم شكوا في تطرفه ولما أثبت المواطن المسلم براءته..فقد قرروا دفع تلك الغرامة له و ذلك لأنهم جرحوا خاطره و إحساسه المرهف.0
ماذا أقول و ماذا لا اقول...دعنا نذرف الدموع على ( خير أمة أخرجت للناس)0
ليسقط إبن تيمية 0
احترامي

اخر الافلام

.. التصعيد بين إيران وإسرائيل .. ما هي الارتدادات في غزة؟ |#غرف

.. وزراء خارجية دول مجموعة الـ7 يدعون إلى خفض التصعيد في الشرق




.. كاميرا مراقبة توثق لحظة استشهاد طفل برصاص الاحتلال في طولكرم

.. شهداء بينهم قائد بسرايا القدس إثر اقتحام قوات الاحتلال شرق ط



.. دكتور أردني يبكي خلال حديثه عن واقع المصابين في قطاع غزة