الحوار المتمدن - موبايل
الموقع الرئيسي


سمفونية الانتماء

عادل الفتلي

2016 / 3 / 8
الادب والفن




آنة من تكريت اصلي وعندي بالحلة عمام
وسكنوا الموصل خوالي والي بالبصرة سلف ..
عايش باربيل فترة وخادم بكركوك جندي
وشغلي عنوانة السماوة وماشفت كلشي اختلف ..
عاشگ إمن الكوت حلوة وماكل من ديالى خبزة
وشارب امية الفرات وبحضن بغداد رابي وعلمتني احچي بترف ..
وساعة الاشتاگ احن للناصرية البيهه گضيت الطفولة
واشتهي اسمع صوت داخل وابچي لو فالح عزف ..
اتعودت لوضاج خلگي اتعنة لاهل البيت ازور ابكربلة
وروحي احس ترتاح بالحضرة إمن الف ..
بعتابة ونايل وميمر اغني وچوبي العب
واطرب لطور العمارة محمداوي وياه احس گلبي انجرف ..
احچي بدوي وكردي ارطن شروگي ولساني فراتي
وممكن اتكلم مسيحي لو طلب من الظرف ..
من يصيح الله واكبر وين مارايد اصلي ابجامع الفاروق إبمسجد علي
شيختلف والقبلة وحدة وماسمعنة بيوم الميل إنحرف .
ويمتة بعدتني المسافة امس جبت الفاو من حلگ الوكت
ومن سمعت دهوك نادت كل نبض بية رجف ..
فار دمي وصرت فوگ جبال زاخو مابرد الا نزف ..
امس طابوگات بيتي اهتزن والله ستر چنت اظن زلزال ثاري
إبنشرة الاخبار ذاعوا بيت بحصيبة إنقصف ..
تورطوا بية مثل خيط إبشرك وعرفوا الفتنة
تضعف موقفي وي إبن والدتي رادوني اختلف ..
الراهنوا يخسون اگلهم اني شيعي وساكن بنص الرمادي
إبين اهلي وهمه الي عز وشرف ..
وياهو هذا الراد يتجزأ وطنًة
اني سني ومن اموتن اندفن بارض النجف





التعليق والتصويت على الموضوع في الموقع الرئيسي


اخر الافلام

.. فنانون يتدربون لحفل إيقاد شعلة أولمبياد باريس 2024


.. السجن 18 شهراً على مسؤولة الأسلحة في فيلم -راست-




.. وكالة مكافحة التجسس الصينية تكشف تفاصيل أبرز قضاياها في فيلم

.. فيلم شقو يحافظ على تصدره قائمة الإيراد اليومي ويحصد أمس 4.3




.. فيلم مصرى يشارك فى أسبوع نقاد كان السينمائى الدولى