الحوار المتمدن - موبايل
الموقع الرئيسي


قصة الشاب فؤاد والجني الكواد

وليد عبدالله حسن

2016 / 8 / 9
الادب والفن


أنطلقت سيارة ركاب صغيرة وحديثة من مدينة الثورة) الصدر) حي الأكراد- الاورزدي باك القديم- متوجهة الى مدنية كربلاء المقدسة في العراق،
أمتلئت السيارة بالركاب وجلست بجانب عائلة مكونه من بنت شابة جميلة وأمرأة عجوز ،وكان يجلس في المقاعد الامامية رجل في منتصف العمر وأبنه شاب طويل متنفخ العيون وأحمر الوجه، ويبدوا عليه المرض او وجود مشكلة ما يعاني منها.
- تحركت السيارة بعد ان توكل السائق على الله وبعدها مباشرة صلى الجميع على النبي وال بيته الاطهار، لكن الملفت للأنتباء ان أكثر الركاب سمع أصوات غريبه وأختناق أنفاس الشاب مع كل ذكر للصلوات او التكبيرات او الايات القرأنية ،وكان أبوه يضع يده على فم أبنه و يهمس في أذنه:-
-أصبر أبني ، أصبر أبويه فؤاد ، أصبر حبيبي انا بجانبك لاتخاف.
-ردد الشيخ المعمم وهو يجلس بحانب السائق:- رحم الله من أعاد الصلاة على النبي وال بيته الأطهار المطهرين الى يوم الدين.
- وبصوت واحد ردد الجميع الصلاة والسلام على النبي وال بيته الاطهار -مع زيادة جديدة- وعجل فرجهم والعن عدوهم.
أثناء ما كان يردد ركاب السيارة الصلوات كان صوت الشاب يزاد أنينا ووجعا وحرقة وبكاءا ونوبات الصراخ المخنوق تزادد بقوة ،ويحاول الاب ان يضع يده على فم ابنه بقوة وهو يهمس في اذن الشباب ،
-أنا يمك أبويه انا بصفك ابويه، أنا موجود لاتخاف حبيبي فؤاد.
صمت جميع الركاب وظهرت ملامح الفضول على وجوههم ، واكثر الركاب يصغي الى صوت الشاب، وكلام أبيه معه، وبين الترقب وفضول الجميع في سؤال الاب عن ماذا يحصل؟ وماهي المشكلة؟ وهل يوجد مكروه للشاب؟ صمت الجميع وصمت الشاب معهم ،وقام الاب من كرسيه وخاطب الجميع قائلا:-
- السلام عليكم
- وعليكم السلام ورحمة الله وبركاته( مازال الشاب يتألم مع انين حفيف جدا في حال ترديد ذكر لله او االاهازيج الدينية او الايات القرأنية)
- قال الاب :-أخواني انا سيد حسن وهذا ابني فؤاد شاب عمره 25 سنة مريض، ويجوز تسمعون أصوات مو طبيعية او اشويه بيها صراخ ، أعذورنا على أزعاجكم لان حالته صعبة ونفسيته تعبانه.
قال بعض الركاب :ـ
-يمعود خير ولايهمك كلنا نساعدك هذا مثل ابنه، شنهو تريد احنه بالخدمة.
- ابو فؤاد عيوني بس كول شنهو تحتاج احنه بالخدمة.
- شنهو السالفة عمي خلي يعيط للصبح قابل ماسامعين عياط كل حياتنه أعياط وصراخ، شنهو السالفة المهم يكون بخير،
- وضعت العحوز يدهاعلى فمها وفركته بقوة وقالت :-يمه عمت عيني مايستاهل الشباب الله يشافيه ويعافيه بحق فاطمة الزهراء .
احد ركاب السيارة رجل خمسيني وسمين جدا ويلبس دشداشة بيضاء نظيفة، ويسبح بمسحبه سوداء 101 فيها علك اخضر، في اصابعه خواتم كثيرة وعليها احجار مختلفة يبدوا نه يحب يحرك الخواتم على كل الاتجهات يوحي بأهمية هذه الخواتم، او يتمنى أحد ان يسئله عن الاحجار الكريمة التي في الخواتم ، رفع راسه للاعلى قليلا وذكر اسم الله وبعض من همسات التسبيح والتأفف، ونظر بعدها الى الشاب فؤاد بنظرة عارف ومتأمل وسئل ابو فؤاد وقال :-بلا زحمة شنهو بيه فؤاد الله يحفظه من كل مكروه.
-قال ابو فؤاد:- والله ماندري، بس يقولون انه دخل بيه جني خبيث الله يستر على أولادكم ، كل واحد روحاني او سيد او شيخ مختص بالطب النبوي واخراج الجن يقول شي مختلف على الثاني، والعلم يمه ااااا واشار الى السماء باصبعه الى السماء بدون ان ينطق كلمة (الله).
- الحمد لله كل شي يم الله الله يشافيه بحق الحسين.
-صمت الجميع والكل ينظر الى الاخر ويتعوذ من الشيطان اللعين الرجيم.
- تنحنت العجوز وقالت:- أسم الله عليك بعد امك ، منين اجيته هاي الطركاعه دخيل العباس اخو زينب، بشاربك بابو الحسن هذا الشباب.
-انطلقت السيارة بسرعة وكل شي هادئ ،والشباب في اخر السيارة يتناقشون في السياسة وأصواتهم ترتفع بين الحين والاخر في نقاش حول وضع العراق والحكومة والحشد والجيش والدواعش، والاسلام السياسي، والأصلاح والزعيم والقائد، والسيد وتاج راسك ،واسماء بعض الشخصيات الدينية، و خاصة اسم صمام الامان وامور اخرى، وبعض الحوارات المتقطعة عن التقاعد وأرتفاع الاسعار والتفجيرات والازدحامات والدواعش والدعاء من الله ان يخلص العراق من هذه الغمة، او من هذه العمه. وكان صوت الشاب فؤاد يصاحب كل الاحاديث بين الركاب ويتخللها في بعض الاحيان ارتفاع او انخفاض في الانين وصوت حزين كأنه نعي جنوبي ، وخاصة عندما يرن الموبيال نغمة فيها ردة حسينية او صوت المؤذن او آية من القران الكريم او نشيد ديني حماسي. ومع كل رن هاتف فيها نشيد ديني تجعل الشاب فؤاد يهتز راسه بقوة كأن به صرع قوي، ويتنفس بعمق ويخرج بعض التفال من فمه وابوه يمسح وجهه ويهدأ به، وكان الجميع يصمت، حتى وصل الحدث الذروه حين شغل سائق السيارة المسجل وانطلق صوت القارئ بايات من الذكر الحكيم و بصوت عالي حينها صرخ الشاب صرخة هزت السيارة كأنها قنبلة صوتية او أنفجار عظيم، وصرخ الجميع معه مع بسامل وصلوات وأسم الله وأسم لزهرة مع زيادة الشاب فؤاد بالصراخ أكثر وأكثر.
- حاول الاب تهدأت فؤاد لكنه لم يستطع ،قال الاب للسائق رجاءا بلكي تطفي المجسل ،والتفت الى الجميع،
وقال:- رجاءا اخواني بلكي تغلقون الموبيالات مالتكم ، هذا أبني فؤاد مثل ماقلت الكم قبل اشويه بيه جني ،الله يستر على ابنائكم، والجني مالته كافر وبس يسمع الصلوات والاذكار وقراءة القران يصرخ بأعلى صوته،
-ويقول الي:- بابا لمن اسمع قراءة القران او الذكر مثل النار دخلت بجسمي وتحرقني .وأحنه ياجماعة الخير عائلة دينية من اب وجد وكل اهلنه رواديد في المجالس الحسينية ويسمونه خدام الامام الحسين عليه السلام من اب وجد،وعدنه مواكب، مو موكب واحد وكل سنه حتى بزمن صدام الله يلعنه كنا مانبطل اقامة التعازي اي والله والامام شاهد علينه بس اجتنه هاي المصيبة من حيث لانتحسب ،وبين ليلة وضحاها صار بينا هذا المصاب الله يستر عليكم. -وهسه ابني فؤاد الله يستر على اولادكم يحب بس الغناء والرقص ويتخبل من يسمع القران والامور الي لها علاقة بالدين ، يااخواني تره مو بيده هذا الجني كافر نعوذ بالله منه، ونطلب العذر من الله ومنكم يأهل الرحم لاتسيئون فهمنا، الله يخليكم تره المرض ماعليه حرج ،ومنكم العذر أخواني وأخواتي.
-ردد الجميع كلنه بالخدمة ابو فؤاد شنهو السالفة عمي تكاطعت الوادم .
-قال احد الركاب:ـ رجاءا أخوانه عدنا حاله طارئة، الله يرحم موتاكم نصوا اصوات هواتفكم،والحجي خلوه على كيفكم ،وبدون صلاوة او اذكار او ادعية او نواعي.
-قال السيد الروحاني الذي يعاني من ضيق النفس ويتلمض بلسانه بشكل غريب قال:- اعوذ بالله من شر الشيطان اللعين الرجيم والله أول ماشفت الشاب فؤاد حسيت مركوب جنيه وفاسقة اعوذ بالله منها ،اخوية ابو فؤاد تره انا اخوك سيد وروحاني وخبير بطرد الجني والعلاج بالقران و عندي بخت كبير من اجدادي، واي جني بس أخلي أيدي عليه يهرب بأذن الله، خليني أقرأ على أبنك فؤاد والعافية من الله واهل البيت والشفاء يكون على ايدي بأذن الله تعالى.
-الشاب فؤاد بدأ يصرخ وأصوات غريبة تخرج منه. ويردد أسماء كثيرة وعبارات باللغة الانكليزية ولغات اخرى غير معروفة.
-صاح الركاب على السيد الروحاني:- يمعود عوف الولد وأكعد الله يحفظك.
-قال السيد الروحاني وبأصرار عجيب وملحه زايده وهو يخاطب الجميع:-ياجماعة الخير أنا تره سيد موسوي وأطلع الجني بس أحط أيدي على المريض.
-قالت له المراة العجوز:- خاله دخيل اجدادك ماتعوف الولد الله يحفظك ، ماتعوف االفرخ هو مريض.
-قال احد الشباب يخاطب السيد الروحاني يمعود اول مرة عالج نفسك أول شي انفاسك جاي تنكطع ياجني الله يخليك الشاب مريض ويحتاج طبيب نفسي شنهو هاي الخزعبلات مالتكم عوف الولد مرتاح لاتصير دكتور روحاني براس الناس.
-قال السيد الروحاني يعني انته ماصدق بالجني؟
-قلت للسيد الروحاني من رخصتك سيدنا:- تره الموضوع مو مال تصديق لو تكذيب تره ابو فؤاد يقول الكم بس اسكتوا وخلونا نوصل لكربلاء بسلام لاتصير طيبب روحاني براس الرجال وخلاص.
- انا طبيب وخصبن عليك، وانت جنك اجنبي لابس سترة جنها زواع بزازين، اعوذ بالله منكم احلف بشرفي انت لو جني لو سحار.
المهم كعد هذا السيد وهو يحوس ويتلمض وشفايفه في الذكر والتسبيح، وجلس بطلعان الروح .
- ومجرد مضى وقت قصير ، قام احدهم يتحدث مع ابو الشاب فؤاد قال:-
- حجي ابو فؤاد ازيدك من الشعر بيت تره انا داعيك كان داخل بيه جني يهودي دمرني الله يستر على الجميع.
- المراءة العجوز بصوت عالي يمه صالح أسم الله اسم الزهرة، يمه شجاكم اليوم، شنهو سيارة متروسه جنانوه وهي تخاطب الرجل المتحدث، قالت له العجوز لاتنطط عيونك عليه الله يستر يمه صالح من هاي الزيارة.
-اكمل حديثه الرجل وقال واخذوني الى بيت سيد سروط كان موجود أبنهم سيد كريم الله يحفظه، سوه عشرة جلسات اليه ،وجواني بمخيط ابره طويلة، وهذه الابرة الطويلة قاري عليه سيد سروط جدهم بنفسه ،والحمد لله طبت وشفيت وهرب مني الجني اليهودي، وقبلها كنت بس اشرب خمر اجلكم الله وحبوب ومخدرات ،وادور سوالف مكسرة حشاكم، و هسه الحمد لله كل خميس وجمعة انا ازور ونعمة من الله ،انصحك ابو فؤاد تروح لبيت سيد سروط والشفاء التام ان شاء الله على ايديهم واسئل مجرب ولاتسئل حكيم.
-قال شاب يجلس للوراء:- يمعودين شنهو الخرافة ياسيد سروط ياجني شبيكم اليوم شنهو متريكين من الصبح!!!! ههههههههه
- و صرخ عليه الجميع اسكت اسكت لاتنقلب السيارة بينه استعفرا الله ودخيل بخت السيد سروط.
صارت ضجة كبيرة في السيارة والمرأة العجوز ماخلت اية ماقرأتها ولادعاء ولامام ماطلبت من السلامة والستر والشفاء للشباب فؤاد، وان توصل السيارة بالسلام الى كربلاء.
-قلت الهم:- يمعودين اتركوا الشاب نايم تره هو يحتاج طبيب نفسي مو روحاني والشاب تعبان وابوه تعبان اكثر ، رجاءا الصمت رجاءا.
-قال رجل اخر يبدوا عليه التّدين للشباب الي يجلسون في المقاعد الخلفية - شباب يعني انتم ماصدكين اكو جني بهذا العالم ،مافتهمت ليش تعترضون وتستهزئون بالاخرين.
-قال أحد الشباب أنا ادرس سنة أخيرة طبيه ( طب بشري) واقول الكم ماكو اي شي اسمه جني هاي خرافات وأساطير ولايوجد اي دليل علمي على وجود جني في عالمنا،ومايصدك بهذه الخرافات بس الجهلاء والمنتفعين من جهل الناس المساكيين واكثرهم الي يدعون اخراج الجني هم مشعوذين ودجاله.
-تحدث شيخ معمم وقال:- الله بالخير ابني كما تعلم ان الجني حقيقة وواقع وامامك هذا الشاب المسكين اكبر دليل و الي تأمروا عليه اليهود من عالم الجن، والاكثر أثباتا أن الجني حقيقة والدليل مذكور في القرأن الكريم،وهذا أهم دليل واثبات، وبالاضافة الى وجود احاديث ثقة ومتواترة وحسنه في السنة النبوية الشريفة وأحاديث أهل البيت والائمة الأطهار لاتعد ولاتحصى عن الصراع والحرب ،ودخول اقوام من الجن الى الاسلام والحمد لله على ايديهم والله العالم.
أشتد الحوار وتصاعد وتقارب من التصادم والعراك حول موضوع:ـ هل الجني حقيقة او وهم ؟ والاكثرية كانت تصدق ان الجني موجود وانهم حقيقة بدليل ذكرهم في القران الكريم ،واكثر المتدينين في السيارة ذكروا احاديث على تلفوانتهم من كولكل مباشرة، حول حقيقة وجود الجني وبالدليل القرأني والنبوي والحكايات الاخرى.
قال الشيخ المعمم بثقة عالية :- أولادي الاعزاء الجني مذكور في القران الكريم استمعوا رجاءا:- وبدأ يرتل بصوت جميل:ـ
بسم الله الرحمن الرحيم
قُلْ أُوحِيَ إِلَيَّ أَنَّهُ اسْتَمَعَ نَفَرٌ مِّنَ الْجِنِّ فَقَالُوا إِنَّا سَمِعْنَا قُرْآنًا عَجَبًا.
ومع وجود ايات كثيرة ووجود سورة بكاملها بعنوان( سورة الجن).
-قال الشاب:- شيخنا الموضوع ماله علاقة بايات القران الكريم ،اول شي خلونا نتأكد علميا وطبيا من شنهو يعاني فؤاد، وحسب فهمي الطبي ان هذا الشاب فؤاد يعاني من اضطراب ذهاني لسبب ما ماله علاقة بالجني ولا بعالم الجن ولا بالخرافات كلها يحتاج يسوي فحوصات مختبرية واشعة وضور للدماغ واجراءات طبية حتى نعرف السبب الحقيقي وراء هذه العصبية والمشاكل الي يعاني منها وابوكم الله يرحمه .
-قال الشيخ اول ماسمعت صوتك انت وهذا الاستاذ الي كاعد أمامك عرفت انتم ملحدين وكفره وماسونين،والله العالم اذا مو انتم من عالم الجن والله العالم.
-قلنا له انا والدكتور:- شكرا شيخنا قابل شنهو راح نسمع منك غير الاتهامات بس تنحرج من اي شي، مشي دكتور مانريد نحرج الشيخ اكثر.
-قال احدهم:- اكو حديث يقال في ان يتحرك الجن بالدفع النفاث وهذا علم مو سوالف ،ويوجد تأكيد، ويقال حسب الحديث (اذا نوديه للصلاة ادبر الشيطان وله ضراط) كما تتحرك الطيارة بالدفع النفاث اليوم والله اعلم.
- قالت العجوز جا خاله الشايب عدنه يظرط ليل ونهار بس لا داخل بيه جني وماندري، انا شكيت بيه هاي الايام لمن كام يحجي ويه روحه ويطلع اصوات هواي لمن ينام .
-قال رجل يبدوا عليه انه شاب صغير لكنه يلبس الكوفيه والعقال :ـاحجي الكم سالفة صارت أمام عيني ،مره قريب من علوه جميلة وهو سوق لبيع الجملة في بغداد، كان شاب كوردي سمين وكبير الجثة وصوته قوي والعالم تضحك عليه وتصنف عليه، وجميع الناس تعرف انه بيه جني يهودي ورئيس عشيرة اليهود في عالم الجن حسب مايقال والله العالم، وتراهن مع جماعة بسوق جميلة في بغداد من طلي( خروف كامل اسود اللون) اذا يضرط هذا الشاب يدمر كل هاي البيوت وحتى باب الجامع يكسره، الجميع ضحكوا عليه ،وبعدها بيني وبينكم كام يردد كلمات كانها جايه من السماء ونازلة للارض كالسهام والسيوف والدروع ،كلماته كانت عجيبة غريبة وبصوت عالي حتى تغير لون السماء والارض الى اللون الاحمر-وقال:- خلو ايدكم على اذانكم، والصوت اجانا كانها قنبلة انفجرت او واحد انتحاري فجر نفسه، وضرط الشاب ضرطه مثل صاعقة وصوت الرعيد، ماطول عليكم السالفة ،انا بعيني شفت ،مو احد قال الي، اكثر من عشرة بيوت تهدمت الواجهه مالتهن ،والحائط وباب الجامع انشلع كله من الاساس، بس ماعرف منهم قال انتحاري ومنهم قال هاي ضرطة الجني اليهودي اعذو بالله من الجني اليهودي كلش خطر ويشوي شوي وهاي اذاني ارجع بيها للاطباء من يوم الانفجار والضرطة الي اليوم الله يستر على صحتكم وسلامتكم.
-جميع ركاب السيارة اتعذوا بالرحمن الرحمين من الشيطان الرجيم.
- قالت العجوز خاله احنه بختك اذا هيج السالفة الوادم كله اتضرط صارها سنين جاي كول كلنه جنانوه ماندري بروحنه ،شنهو هذا الحجي خاله على بختكم ماعدكم سالفة غير الضراط اليوم والجني اليهودي.
-قلت للجميع ياجماعة الخير الموضوع ليس نقاش على ان موضوع الضراط وعلاقته بالجن لو بسبب اكل الباقلاء والحمص والبقوليات ،الموضوع الشباب يتحدثون عن اختصاصهم بالطب وعن شغله علمية مو حكايات خرافية.
-قال السيد الروحاني اكرمنا بسكوتك لمن تحجي قلبي يوجعني ، اسكت احسن الك.
-قال احدهم اكو حديث للتاكيد على كلام الاخوة المؤمنين ان الاكراد من اهل الجن حديث نبوي موثق.
-صرخ احدهم وقال انا كوردي ،يعني انا جني؟ شنهو هل الحجي الخريط مالتكم،الاكراد شنهو علاقتهم بالجن ، الاكراد شعب عظيم ومناضل ومجاهد ونظلموا بزمن صدام ونضربوا كيماوي ، والاكراد اخلاق وعلم وادب ماسمح لاي شخص يتحدث ضد الاكراد والا اقلب السيارة على روسكم، لحد يذكر الاكراد باي غلط والا اغلط عليكم سنة وشيعة وهابية وخوات قحبة.
- لاتفشر احترم نفسك لاتخليني اسب البرزنجية كلهم هسه
-قال احدهم :ـ بابا انت شيعي فيلي قبل لاتصير كوردي، ماله علاقة الحديث بالاكراد الشيعة ،لان انت تدخل بشفاعة اله البيت، تره الحديث ذكر النواصب منهم يالتحديد ماله علاقة بالشيعية تره الشيعة مخلوقين من نور ال البيت عليهم السلام .
- ياجماعة خصم الكلام والجدل اكو حديث راح الجميع يسكت من بعده وهو يقول :ـ
ان الامام علي عليه السلام قاتل الجن وهم كانوا متحالفين مع بني المصطلك في وادي قعر حسب الرواية ، والرواية نقول بان الامام علي لوح بسيفة يعني فر فر فر سيفة فد مئة مرة ضوئية وسواهم دخان وماطلع منهم واحد سالم وقال فيه أبو الحسن الأسود :
. من قاتلُ الجنِّ الطغاةِ فأسلَموا *** في البئر كُرها يا أولي الألبابِ‏
. من هَزَّ خيبرَ هزَّةً فتَساقَطت *** أبراجُها لمَّا دَحى بالبابِ‏
- قال احدهم على ذكر رواية الامام علي عليه السلام وفي رواية اخرى :-طلع سيف ذو الفقار ينقط دم من عالم الجن صلوا على محمد وال محمد
- الجميع، و صلة الجميع وبتكرار على النبي وال بيته الاطهار بقوة وبحماس شديد.
لكن الشاب فؤاد صرخ بصوت عالي وبشكل متقطع وغريب وخاطب الجميع بلغات متعدد وفشر عليهم جميع فشاير الارض بما في عيها باللغة الانكليزية.
- يجماعة محد يترجم شنهو يقول فؤاد اشو يتفل علينه اشبيه هذا الجني.
- قال شاب يقول:- يقول فواد عليكم او يقول الجني الكواد كلمات فشاير باللغة الانكليزية.
- شنهو يقول يعني
- كلكم مناو -- وامهاتهكم اكحا- ووفك يو وفشاير هواي
- قال احد الركاب ياخايس ياخ القحبة يامنيو ……… الخ
- اسكت يمعود هو مريض وبيه جني كواد انته شبيك تفشر مو عيب اكو نسوان بالسيارة.
- والجميع صمت من جديد بس الشاب فؤاد ماسكت وهو يرد أسماء مثل دارون ونظرية الكوانتم ويتحدث باللغة الانكليزية بشكل جيد عن نظريات علمية كالانفجار العظيم والمادة السوداء ، والفرسان الاربعة والجميع ينصت له بدقة، لكن الظاهر لاحد يفهم اي شي من كلام الشاب، وتحدث الشاب فؤاد بمصطلحات انكليزية صعبة اللفط الا لشخص متمرس باللغة الانكليزية و بعدها جلس الشاب وجلس معه ابوه واحتضن ابيه ،وهو يأن انين بنفس طويل حتى نام وصمت الجميه مه بقاء أصوات بسيطة تخرج مع نفسه العالي جدا.
-قال السيد الروحاني:- هذا داون لو داوود مو هو رئيس العام لعالم الجن اليهودي أنا سامع اسمه في كتاب شمس المعارف الكبرى
-قال شاب اخر حجي اسمه دارون ومو رئيس عالم الجن، هو عالم احياء كبير وهو صاحب ومؤسس اعظم نظرية علمية اسمها نظرية التطور.
-قال الشيخ المعمم مو هذا الي يقول ان الإنسان أصله قرد.
-قال الشاب الي لابس عكال وكوفية عربية:- ياقرد بان القرد ياسافل، من ياعمام هو هذا.
- حجي هذا اجنبي وميت ياعمام منين اله عمام.
-انروج ندكهم وننعل والديهم .
بعض الشباب ضحك الى حد القهقهههههه .
-قال السيد الروحاني:- مو قلت الكم هؤلاء من من عالم الجن لان اكثر الجنوانه هم من عالم القرود حسب الرواية الموثقة اذا تحبون اذكرها الكم،
وكل هاي الاسماء الي يذكرها الشاب فؤاد هي الغاز وأسماء وأرقام معنوية من عالم الجن ،نعوذ بالله من كل جني انسي وهو ينظر بعوينه للشباب وينطر لي نطرة حاقدة.
-بقى الشاب فؤاد نائم على كتف أبيه، لكن الشاب كان يفز بين الحين والاخر مع اي صوت او ذكر اسم الله او الصلوات التي ترافق جميع الركاب وفي كل وقت.
-قال الشيخ المعمم لابو فؤاد دعني أقرأ على ابنك الله يحفظه (آية الكرسي) وخلينا نثبت للشباب ماهو تأثير قراءة ايات من الذكر الحكيم على عالم الجن.
طبعا أبو فؤاد يتمنى اي شي يخلص ابنه من هذا المرض يصدق باي شي المهم ابنه يشفى .
-بدأ الشيخ يقرأ (آية الكرسي(اللَّهُ لاَ إِلَٰهَ إِلاَّ هُوَ الْحَيُّ الْقَيُّومُ لاَ تَأْخُذُهُ سِنَةٌ وَلاَ نَوْمٌ لَّهُ مَا فِي السَّمَاوَاتِ وَمَا فِي الأَرْضِ مَن ذَا الَّذِي يَشْفَعُ عِنْدَهُ إِلاَّ بِإِذْنِهِ يَعْلَمُ مَا بَيْنَ أَيْدِيهِمْ وَمَا خَلْفَهُمْ وَلاَ يُحِيطُونَ بِشَيْءٍ مِّنْ عِلْمِهِ إِلاَّ بِمَا شَاء وَسِعَ كُرْسِيُّهُ السَّمَاوَاتِ وَالأَرْضَ وَلاَ يَؤُودُهُ حِفْظُهُمَا وَهُوَ الْعَلِيُّ الْعَظِيمُ  والشاب فؤاد اسيقظ مرعوب و بدأ يصرخ ويتألم بقوة وخائف ويرجف كانه به صرع بدون توقف في حظن ابيه.
-وقام السيد الروحاني لمساعدة الشيخ المعمم وهو يخطب باعلى صوته ونفسه المتقطع وهو يقول:ـ
أطلع أطلع ياجني يا ملعون يايهودي أخرج من المسلم فؤاد ،أطلع من جسد فؤاد المؤمن بالله ورسولة، أخرج ياكافر، أخرج يامعلون، أقسم عليك بالدين الذي تؤمن به ،وبالكتاب الذي تصدق به، وبالنبي الذي تتبعه ،والرب الذي تعبده أخرج من جسد المسلم فؤاد - امين رب العالمين.
-ثم خاطب ابو فؤاد قال ماهي أسم ام فؤاد؟.
-قال أسمها:- سعاد بنت شكرية ام علي.
قام السيد الروحاني وهو يردد مع الشيخ المعمم سويا ،الشيخ يقرأ سورة الكرسي والسيد الروحاني يقوم بعمل روحاني وهو يردد:-
- أخرج ياجني يامعلون من جسد فؤاد أبن سعاد بنت شكرية المسلم المؤمن الصالح ،والاحرقتك أنت وعائلتك وأقربائك وجيشك،أخرح بأسم الأسماء الخمسة المقدسة أصحاب الأسرار ال بيت النبوه الأطهار وأصحاب الكساء النوراني المنور الناري والحارق لكل شيطان رجيم، أخرج بأسم طلاسم الغيب مراخوش كراروش فدحوش ماخوش ودارونش وكوانتوس ناخوس ووم خنوث برنثوث نافوسئيل دزائيل شامسئيل -( وَجَعَلْنَا مِن بَيْنِ أَيْدِيهِمْ سَدّاً ومِنْ خَلْفِهِمْ سَدّاً فَأغْشَيْنَاهُمْ فَهُمْ لاَ يُبْصِرُونَ)-امين.
وضع السيد الروحاني في فمه بعض الماء ونفخ به على وجه الشاب ورش به على كل الركاب في السيارة.
- والشاب فؤاد يصرخ بأعلى صوته وقفز كالنمر وضرب السيد الروحاني على على عينه بقبضة يده ضربة خاطفة وسريعة وانتشر الدم على ثياب السيد وعلى وجهه، واغمي عليه قليلا وهو ماسك عينه، وبعدها تحرك للوراء الشاب فؤاد ورجع على الشيخ المعمم واغلق الشاب فؤاد على رقبة الشيخ المعمم بكلتا يديه حتى سقطت عمامته على السائق ،واراد الشيخ ان يخلص نفسه ووضع يده على رقبة فؤاد و اذا بقبض فؤاد بعضه على يد الشيخ، وبدأ الشيخ بالصرخ وهو ينادي الجميع بحرقة والك كبير:-
- خلصوني راح اموت،ساعدوني، و اكثر الركاب امسكوا الشاب فؤاد والكل يصيح يمعود خلصوا الشيخ راح يموت.
-اترك الشيخ فؤاد اتركه اختنق لكن فؤاد ماسك رقبة الشيح بيد وعاض يد الشيح بقوة بحيث الشبح يتلوى من الالم .
-اترك الشيخ راح يختنق يمعود ابو فؤاد عيمي احجي ويه فؤاد تره الشيخ صار احمر وعيونه نططت ،يمعودين راح يموت الرجال خلصوه.
لكن كان الشاب فؤاد ماسك الشيخ بقوة وفشل الجميع في تخليص الشيخ من يد الشاب وكان الشيخ يختنق ويصرخ وبدأ يخرج كم فمه بعض التفال ، والسيد الروحاوني مستمر في ترديد أسماء غريبة عجيبة وهو ماسم عينه وهو يستدعي الارواح الطاهرة لاخراج الجن من الشاي وتخليص الشيخ المعمم من أيدي الجني اليهودي الكواد.
وكانت المراة العجوز تصرخ يمعودين أهل الغيرة ولدي صلوا على محمد وال محمد وتقول للسيد الروحاني على كيفك سيد راح تنموت، وهو ماسك عينه والدماء ملئت ثيابه من الاعلى للاسفل، وهو مستمر يردد الأسماء والطلاسم الغريبة والمرأة العجوز ترتجف بقوة ، واستدرات العجور بوجههت نحوي،
- و قالت لي:- يمه هو اذا يطلع الجني وين يروح وين يولي.
-قلت الها:- يقال يدخل في النساء لانهن ضعيفات وناقصات عقل ودبن .
-يمه صالح دخيل العباس أخو زينب وقالت:-
-خاله انته الرجال الجبير السيد الروحاني يمه اكعد نفسك انكطع ،
انته السحار خاله اسمعني وبطل تحجي انت تنزف من عينك عميت عينك على شنهو،
ما تكعد وتسكت لاتوسوس براس الولد، ويطلع الجني ويطب بينا، وين اولي خاله، احنه بختك ،وسايمه عليك ام البنين اسكت الدم اخذك ابو الغيره .
- قالت لي يمه انته ساعدنا سكته راح يموت الرجال عينه تنزف دم والشيخ خانكه الفرخ هيه شنهو زيارة لو مصيبة الله.
قلت له:- حجي اكعد خلي نوكف الدم من عينك أنقطع نفسك يمعود راح تموت وجلس على الكرسي وهو يهلث ويتنفس بصعوبة كبيرة ،والشيخ مازال تحت الشاب الذي هو قابض على عنقه بقوة وعاض ايده والجميع واقف على قدميه في السيارة التب توقفت على جانب الشارع العام والكل مشغول.
والعجوز تحجي لوحدها كأنها تهذي وخائفة وهي تقول الي:-
-وداعتك يمه وانته مامحلفني وهي تحجي لي وانا اعصب عين السيد الروحاني ،
قلت لها:- حجية اسكتي هسه خلي نساعد الجماعة .
-قال ابو الشاب فؤاد ياجماعة ترة ابني مراح يفتح رقبة الشيخ ويجوز الشيخ يموت بيده ،والطريقة الوحيدة الي راح يفتح بيه فؤاد رقبة الشيخ ،هي طبعا مو خوش طريقة بس مع الاعتذار الكم جميعا ،أخوتي واحد من الشباب يختار فد اغنية وصفكة قوية ورقص اشوبه والله عيب بس افهوني الله يسار عليكم، وبس اتغنون وصفكه اشويه وهسه فؤاد راسا يعوف الشيخ و راح يرقص ويصفق ويانه، الله يحفظكم ياشباب ساعدوني لايموت الشيخ واتورط اكثر من هذه الورطة الي انا بيها. والشباب في الكراسي الاخيرة ، خاطبهم احد الشباب قال شباب فد صفكة قوبة قوية شباب واغنية قوية (خالي ابنك هل المعرض خالي اابن اختك هل معرض، بس فؤاد بعده ماسك الشيخ بقوة ماعافه،
- وابو فؤاد قال شباب غيروا الاغنية واشويه ردح ورقص عراقي قوي بيه هز اشويه اخوتي
- واحد رادود حسيني صوته حلو وقام يغني اغني ردح عراقي وراسا الشاب فؤاد ترك ايد ورقبة الشيخ وقام يرقص ويصفق ويضحك .
- السائق راسا طلع قطعة اقماس بيضاء ولفوا ايد الشيخ وهو يتألم ويتوجع ولبسوه العمامة وهو يقول بصوت حزين:- دخليك بابو الجواديين ، والسيد الروحاني مستمر في ترديد الاسماء الغريبة على مسامعنا جميعا ومازال يردد فؤاد ابن سعاد بنت شكرية هو المسلم المؤمن اقوى من الجني الكافر اليهودي ووووووووو الخ.
هدأ الوضع قليلا وسكت الجميع وانطلقت السيارة من جديد بسرعة لان الوقت تأخر والجميع صمت وتنفس بعد خوف وترقب وورعب غريب عجيب.
- مسكت العجوز يد ابو الشاب فؤاد وقالت له بفضول غريب، كأنها لاتريد ان تصمت:- يمه ابو فؤاد هو ابنك فؤاد الله يحفظه هذا الجني اليهودي الي دخل بيه لمن كان صغير لو لمن صار كبر؟
- قال لها:- ابو الشاب فؤاد- لا والله كان أبني شاب مؤمن يصلي ويصوم ويروح للزيارة كل خميس، بس اتغير فجاءا وبدأ يقرأ هواي كتب،وصاروا عنده أصدقاء شباب جدد كلهم مايصلون، و صار يحجي حجي عجيب غريب وتعلم لغة انكليزي بسرعة وأتقنها بسرعة . بس حدثت حادثة بالعائلة لمن اخوه التوم مات بالحرب وهي يحارب داعش الله يعلنهم، وهو كان متعلق باخوه ويحبه هواي وكان صديقه، و وقبلها كام فؤاد يحب بنت في الجامعة معه ويريد يزوجها بس اهل البنت ماوافقوا على الزواج بسبب ظروفنه المالية ، ونعيش في مدينة الصدر مدينة فقيرة ،وبعدين صديقته هي وأهلها سافروا اليونان تعريب عن طريق البحر وغرقت بيهم السفينة ،وكلهم ماتوا ، وبقى فؤاد 6 اشهر كأبه وحزن ومايحجي ويه اي واحد، وبعدها صار يشرب مشروبات حرام اجلكم الله ،ويغني ويكفر، واخذته الى سيد روحاني بالنجف الاشرف وهو كان رجل عالم كبير شيبه محترمه ،واخبرني بعد ان فحصه ونظر الى عيونه قال الي اشوف هذا الجني في عيون ابنك هو جني يهودي كافر وكاولي و كواد يحب الغنى والكيف والسكر ابنك انتهى ولازم نستخدم اخر حل وهو الكي والحرق لاصابع رجليه كلها ونقراء عليه القران سبع مرات بغرفة مغلقة وهو يبقى لوحده في غرفة مظلمة و بس فيها فتحة صغيرة حتى يطلع الجني منها، ومن عدها ابني زادت حالته المرضية وصار يخاف من الماء والنار واشتد عنده الصراخ وصار بيه رعب من كل شي بيه صلاة او اذان او دعاء ، ومايحب يسمع اي شي بيه قران او صلوات، بس يسمع غناء ورقص وموسيقى عالمية ومن الصبح يسمع فيروز والسماعات باذنه.
-الشاب فؤاد التفت على العجوز وقال اله اشكد تحجين رب القندره ولزمها من رقبتها والجميع صرخوا لا لا لا فؤاد هذه مثل جدتك يمعود عوفها والمرأة العجوز صاحت يبوه يبوه الحكوا اليه اهل الغيره، دخليكم انا بشاربكم أهل الغيرة اهل الشرف والناموس دخيل العباس اخو زينب ،وشد الشاب فؤاد على رقبتها وقامت طلع اصوات غريبة عجيبة كانها اصوات الشاب فؤاد عندما يشتد به الحال.
-والسائق بصوت عالي قال:- شباب صفكه صفكه صفكه قوية ومعها اغنية راقصه اغنية عراقية بيها ردح وشبابية باعلى اصواتكم يرحمكم الله
وغناء ورقص وتصفيق…………..
وبعدها ترك الشاب فواد المرأة العجوز وبدا يرقص ويغني ويصفق مع الشباب.
تنفست العجوز بقوة وقالت لي:-
- خاله متت متت متت متت دخيل ابو الحسن ،اكلك خاله راسي يفتر، وعيوني ماشوف بيها ،الكلك خاله خوب ما الجني دخل بيه ،احس جسمي يرجف وصوت بأذني وأشوف صورة الامام العباس كدام عيني لازم سيفه دخيل ابو الفضل العباس .
-قلت لها:- ماتحتاجين جني حجيه الجميع مصاب بنفس المرض كلنا فينا مو بس جني واحد جنانوه هواي ومن كل الامم والاديان والنحل والملل ، وللعلم احنه اصل الجناونه بالعالم.
وقفت السيارة في السيطرة الأخيرة، والشاب فؤاد وضع راسه في حضن ابيه ونام بعد تعب وجهد كبير، والجميع صامت بس السيد الروحاني مازال يحرك شفايفه حركة سرعية ويرمش بتك عينه بطريقة غريبة، وينفخ على كل الجهات، ومرات يطلع تفال مع النفخ حتى الركاب في السيارة قالو له :-
- حجي بطل تفال عميتنه الله يستر عليك.
- قال السيد الروحاني وهو معصب عينه بقوة:- محد خلاني أطلع الجني من هذا الشاب المسكين.
-عزيزي تره الشاب مابيه جني كواد او شريف، كل السالفة هو شاب مصدوم وعرف على افكار جديدة ، والمشاكل الي مر بيها صعبة ،ومحد افتهمه من الاهل مع الاسف ،والاب من كثر حرصه عليه عقد عليه الامور زايد بسبب الروحانيين من امثالك ،وكل واحد من الدجالين يجتهد طريقه في تعذيب الشاب فؤاد حتى بدأ يكره القران والاديان ،وبالمناسبة تره فؤاد شاب ذكي و يفتهم وشاطر بس يحتاج حريه ويحتاج فهم من قبل العائلة.
- السيد الروحاني وهو يخاطبني وقال:- جاي هواس تتفلسف كل اشويه تتفلسف على راسنه،
ضحك شاب ههههههه دير بالكل على عينك شلك بهاي الشغلة هههههههههه
- قال السيد الروحاني للشباب:- احترم نفسك،
- قالت العجوز الى السيد الروحاني خاله دسكت ذبحتنه انت والجني الكواد، هو جني لو فلك اكشر يحجي انكريزي ويفتهم ويغتي ويركص جنه وردة،
- قال السيد الروحاني:- أنا أتكلم لغة السماء والارض، لغة الباطن والظاهر ،لغة أهل الجن والانس، وعندي أسرار أهل الانوار، وعندي السر الاعظم .
- قال احدهم:- اذا انت عندك السر الاعظم والجني الكواد ضربك على عينك وشلع حاحبك في أول ضربة، والمرة الجاية بس تتحارش بيه يشلع عينك ههههه اترك السالفة حجي ونام احسن الك ههههههههه.
واما الشيخ المعمم بقى يسبح ويحرك شفتيه بسرعة هائلة، ويغمض عيونه كانه في حال تأمل وينفخ على ايده المجروحة ،ويغطي فشلة وخجلة في عدم اخراج الجني الكواد من الشاب فؤاد الذي انتصر عليه في الضربة القاضية ،وهو يحاول اخراج الجني اليهودي، واما المراءة العجوز نامت بسرعة غريبة وبدون انذار على كتف الشابة ابنت ابنها التي لن تتحدث بكلمة واحد طول الرحلة ،وقامت العجوز بالشخير وتطلع اصوات عجيبة غريبه كانها تريد ان تقول اشياء كثير من خلال لغة الشخير. واما باقي الركاب في السيارة بدأ عليهم الهدوء والصمت ،وأكثرهم غط في نوم عميق كأنه سافر الى عالم الجن بسرعة هائلة.
-وبعدها بفترة توقفت سيارتنا بجانب سيارة اخرى في سيطرة التفتيش وعند دخولنا الى مدينة كربلاء المقدسة، وحينها سلم سائق السيارة الاخرى على سائقنا وسئله بأستغراب:-
-السلام عليكم هاي شكو ماكو ،شنهو بيها السيارة مالتكم، كانت بيها هوسه وكل اشويه توكف، شنهو صار بيكم خوب ماكو شي؟
-رد عليه السائق وقال بصوت منخفض مع صوت كحه صغيره ونفخ قوي من دخان السجارة وقال:ـ ماكو شي، بس عندنا بالسيارة شاب مسكين بيه جني يقولون (بصوت منخفض) هو جني كواد وكاولي ويهودي.
-قال السائق الثاني تره عدنه من الركاب بالسيارة سيد جليل موسوي وقور وعالم كبير يقول انه هو روحاني ويطلع الجن برمشه عين،
وعندما سمع الشاب فؤاد كلمة سيد روحاوني ووموسوي أستيقظ بسرعة وفز حتى انضرب راسه بسقف السيارة، وهو يصرخ ،و يصرخ كل ركاب السيارة متضامنين معه، كلهم صرخوا لا لا لا يمعود لايجي السيد، ومانريد اي روحاني، وماعنده جني لاشريف ولاجني كواد، واصلا ماكو جني، خلص،سالفة الجني كلها كذب بكذب يمعودين اتركوا هاي السالفة خلونا نوصل الله يخليكم,
واما أبو فؤاد تواصل في تهدأت أبنه ويقول له:- خلاص أبني خلاص مراح يجي أحد اطمئن اطمئن بويه انتهى اليوم كل شي، عرفت أنا السبب بكل هذا الي صار بيك وكل هذا الوجع والالام وزالعذاب مالتنا،أنا صوجي وهو يبكي أبني صوجي، أنا الي حكمت عليك بالجنون، أنا الي خلينك فرجه للناس بسبب جهلي وتصديقي بكل ذولة المشعوذيين والدجاليين.
قال الشيخ المعمم بصوت طقسي :-
-رحم الله والديه من يغني ويركص حتى ينام الشاب ونوصل بسرعة ،والله يحفظ الجميع من اي شر ومكروه.آمين
أحد الشاب في اخر السيارة فتح أغنية من موبياله حلوه بيه رقص جميل الجميه شاف الحلوات الراقصات الجميلات في الفديوا الغناني ومع
أغنية اغنية (روح روح روح الله وياك) لمحمد سالم وصديقة الزين
-االله لاتهدد بعد ماخاف انهيها العلاقة وروح شوفني بغرامك ضيم لاتهدد بعد ماخاف
-مع السلامة، ودك ورقص وغناء حتى وصولنا الى كربلاء المقدسة بصحبة الشاب فواد والجني الكواد.
- وتركناكم في أمان الله كلا مع جنيه الخاص
- ونطق الجني الكواد أخيرا وقال: يوجد في كل إنسان جني له أسم وفكرة وعنوان،أعرف جنيك تعرف مرضك.





التعليق والتصويت على الموضوع في الموقع الرئيسي


اخر الافلام

.. حفل تا?بين ا?شرف عبد الغفور في المركز القومي بالمسرح


.. في ذكرى رحيله الـ 20 ..الفنان محمود مرسي أحد العلامات البار



.. اعرف وصايا الفنانة بدرية طلبة لابنتها في ليلة زفافها


.. اجتماع «الصحافيين والتمثيليين» يوضح ضوابط تصوير الجنازات الع



.. الفيلم الوثائقي -طابا- - رحلة مصر لاستعادة الأرض