الحوار المتمدن - موبايل
الموقع الرئيسي


بأدعى لهم من معاميقى

أيمن غالى

2017 / 8 / 16
كتابات ساخرة


كان يا مكان يا سعد يا إكرام؛ فى سالف العصر و الأوان؛ أقباط مصر كانوا مدعوكين من الرومان، و علشان سمعوا عن رُقىّ العرب الغير مسبوق، و عن تحَّضرهم، و رِقِتهم الغير معهوده، و الغير مسبوقة، و عن عدلهم، و رحمتهم، و إنهم لا كانوا قتَّالين قُتَله، و لا قُطَّاع طرق، و لا حاجة ..
فعملوا إيه ؟
راحوا بعتوا رسايل للراجل المحترم إبن الخطاب، و قالوا له: إلحقنا يا كبير؛ إلحقنا يا أعدل حكام الأرض؛ إلحقنا يا أحد المبشرين بالجنة؛ أغثنا يا أمير المؤمنين .. الغوث .. الغوث .. الغوث ..
الراجل ما كدّبش خبر، و راح مجهز جيش، و الدموع بتخُر من عينيه، و قال مش ممكن أَخْلَى بناس طلبوا مساعدتى، و إستغاثوا بىّ، و قالوا لى الغوث تلات مرات؛ لو كانوا قالوها مرة و لا إتنين كنت نَفَضْت لهم ..
بن العاص قال له خلاص: سيب لى الطلعة دى يا ريّس؛ ما تعفَّرش رجليك، و خليك أنت هنا ..
فرد عليه و قال له: لا يا عمرو الطلعة دى بتاعتى أنا، و بعدين و أنت مال أهلك؛ الناس بعتولى الجواب المسوجر بإسمى أنا، و قالوا إلحقنا يا أمير المؤمنين، و أنا أمير المؤمنين؛ أنت أمير المؤمنين ؟! ..
فعمرو قال له: ما تقلقش يا باشا كلنا صبيانك و خدامينك؛ أنا حا أطلَع الطَلعة دى، و حا أقول إنها بتعليمات، و توجيهات سيادتك، و بإشرافك، و إنك كنت متابع معانا لحظة بلحظة بالموبايل و الإيميلات ..
فلما إقتنع بن الخطاب بكلام عمرو؛ راح باعت إبن العاص، و معاه جيش التقوى بتخُر منه، و هو ماشى جَمَّع كل الملايكة إللى لقاهم فى سكته، و إللى قلوبهم كانت مِتشَحتفه على المصريين المدعوكين من الرومان، و دخل مصر، و طراخ طريخ طروخ؛ راح مِفَشْفِش دماغ الرومان الوحشين؛ وسط زغاريد نسوان الأقباط، و رقص العيال بلابيص فى الشوارع من الفرحة إللى فَرتِكِت الترِِِِِِِِنك ..
و من يومها، و المصريين عايشين فى تبات و نبات، و خلفوا صبيان و بنات، و بيدعوا من معاميقهم للإتنين الرجالة المحترمين إبن الخطاب و بن العاص ..
و أنا كمان بأدعيلهم إن ربنا يديهم على قدر ما عملوا مع أجدادى ..
منهم لله





التعليق والتصويت على الموضوع في الموقع الرئيسي


اخر الافلام

.. تكريم إلهام شاهين في مهرجان هوليود للفيلم العربي


.. رسميًا.. طرح فيلم السرب فى دور العرض يوم 1 مايو المقبل




.. كل الزوايا - -شرق 12- فيلم مصري يشارك في مسابقة أسبوع المخرج

.. الفيلم اللبنانى المصرى أرزة يشارك فى مهرجان ترايبيكا السينما



.. حلقة #زمن لهذا الأسبوع مليئة بالحكايات والمواضيع المهمة مع ا