الحوار المتمدن - موبايل



قصيدة قبلة حياة

رمزى حلمى لوقا

2018 / 5 / 16
الادب والفن


فؤادة
قبلة حياة إنتِ
فى ليلى الغريق
ما أحلى أول شهيق
فى وحلة الأيام
أول ما أنام
يرجع لى نفس الوجع
و الهمس و الكوابيس
هاتى عينيك
ضد الجنون متاريس
عتريس
واقف فى أرض الخوف
فارد دراعه ظلام
لحد آخر الشوف
يا ندهة الملهوف
كل الوجع موصوف
يا الله أعملى معروف
هِمّى أفتحى لنا هويس
أرض الغلابة شراقى
فى كافة النواميس
يا حيرة القواميس
ما عادش فيها كلام
يوصف لنا المعنى
إمتى ها نتجمع
لو كل ظلم الحياة
يفشل يجمعنا
و مين ها يسمعنا ..؟!
عمر الحياة
ما تسير على هوانا
كل الكلام الحر
مكتوب فى زنزانة
لسه البشر ألوان
ما أكتر الأعوان
فى حضرة العتريس
يا ريتنى لادهم
يا ريتك فى الطريق فوانيس
شعلة فى أيدين الخلق م المتاعيس
تشعل قصور الظلم فى الهوجة
الثورة موجة
تهل ورا موجة
طول ما الخطاوى
ع الطريق عوجة
أنا لسه يأسى
من الحياة مُعلن
طول ما الفساد
فى بلادنا متسلطن
طول ما الغضب
مرفوع من الخدمة
طول ما العذاب
ما هو جزء م الهدمة
عالجونا بالصدمات
صدمة فى ديل صدمة
الموت فى جيلكم بطىء
و الحياة رمّة
أنا قولتها من زمان
و ها اقولها من تانى
ولّع فى أم البلد
و أقتلنى و انسانى
و عيش بقى و انتشى
و اتهنا بالملكوت
لو مش فؤادة
خليكى نسمة ونس
وسط الوجع و السكوت
خليكى جنبى
يا أمل مكبوت
خليكى آخر شهقتى
للموت
***







اخر الافلام

.. مهرجانات تخلد ثقافة الفلان في غرب أفريقيا


.. باحث سعودي يصمم روبوتا ناطقا باللغة العربية


.. المجالس الرمضانية موروث اجتماعي يجسد ثقافة التواصل




.. فنانون في اليمن يعرضون لوحات تدعو إلى التفاؤل بإحلال السلام


.. تعليق ظافر العابدين على استبعاد ياسمين صبرى واستبدالها بالفن