الحوار المتمدن
- موبايل
الموقع
الرئيسي
شطرنج
رمزى حلمى لوقا
2018 / 5 / 27الادب والفن
شطرنج
***
خُد نفس م السيجار
و رشفتين م الكاس
و ضُم بنت جميلة بدراعك
خداعك
حيّر الحراس
مدد الجسم العفى
على الشزلونج
وإفرد جميع القطع
على رقعة الشطرنج
حرّك جيوشك للأمام
من كوريا حتى الشام
و استنى دورك
مرورك سهل ع الجبهة
حاور و ناور و غامر
و إفهم التايهة
حرك الطابية
لآخر نقطة فى الجولان
و حرك الأفيال
و إعمل زوبعة فى عفرين
و إرفع علم عثمانلى عل البنايات
و إلهينا بالحكايات
و لملم التايهين
م القاعدة و الدولة
ترمى عليك حطين
شعلة من نورها
تلمع آشعة لهب
يعكسها بنّورها
تلمح بقلبك طعنة غدر
م الدوحة
حرك جميع القطع
فى إتجاه طهران
حرك وزيرك
يخلق أزمة فى كردستان
القدس فى مرمى
حصانك الإسود
إديها فرصة طويلة تتهود
حرك عسكرى خطوتين
يقفل لك الثغرة
و احفُر هناك حفرة
تشعلل النكايات
و إزرع بذور الفتنة فى البدايات
إزرعها قبط و عرب
أكراد و فرس و يهود
أطياف كتير ع الحدود
أمازيغ و بدو
و سنة أو شيعة
و إجعلها فرقة و وقيعة
دمشق محصورة ما بين فرسين
إفتح قوسين
و إكتب حساب البنك بالدولارات
كثّف الحركة
فى أرض الغاز
و كتّر الألغاز
و أحسب لنا الإيرادات
أقطع طريق الخطر
من غزة لإسطنبول
خطاب بعلم الوصول
يوجه النشطاء
فى الجبهة كالمدفع
و إرمى بَـــلاك ع التورتة و استنطع
و إيّاك تقع
فى كل مستنقع
و خُد نصيب الأسد
خرطة ورا خرطة
و إسحب مداد القلم
و أرسم لنا الخارطة
أبرُم شعوبنا فى الهوا قراطيس
و اختار ونيس
يظبُط لك القعدة
هرّب فيران الدولة و القاعدة
حتى جبال سينا
حرّك حصانك فى الغربة يحصينا
كِش الملك
و لا تقتلوش الآن
طوّل فى عمر الملك
طول ما الجيوش فى الميدان
إنت الوحيد اللى خارج
م الصراع
كسبان
***
كلمات
رمزى حلمى لوقا
مايو 2018
|
التعليق والتصويت على الموضوع في الموقع الرئيسي
.. كل يوم - الناقد الفني طارق الشناوي يحلل مسلسلات ونجوم رمضان
.. كل يوم - طارق الشناوي: أحمد مكي من أكثر الممثلين ثقافة ونجاح
.. كل يوم - الناقد طارق الشناوي لـ خالد أبو بكر: مسلسل إمبراطور
.. كل يوم - الناقد طارق الشناوي: أحمد العوضي كان داخل تحدي وأثب
.. كل يوم - الناقد طارق الشناوي : جودر مسلسل عجبني جدًا وكنت بق