الحوار المتمدن - موبايل



جاسمية تحرك كلب ابو جاسم : تخسر ما تخسر بالجير

مؤيد عبد الستار

2018 / 6 / 12
كتابات ساخرة


مشهد تمثيلي
- يبين اليوم جاسمية ما عاجبج الوضع!
* يا وضع ... اشو الدنيا مكلوبة !
- هم كلبتيها .. شنو ..شصاير .. قابل مراكبج غركانة !
* مراكبي .. ها .. ليش مو صوتك الانتخابي ... اشو مغلس ؟
- كافي بسامير جاسمية .. عليمن مغلس .. هي شجم صندوك وشجم جهاز احتركن .
* لا بالله .. شجم صندوك .. اي .. هنيالها لامك .. مخازن المفوضية كلها احتركت.
- لا .. خبرني ( مجلوب السلف ) كال شجم صندوك واجهزة احتركن و مو مشكلة .
* هم اجينه على مجلوب السلف صويحبك .. مو خسر بالانتخابات بعد شنو لازك بالمفوضية .
- شمالج... يا جاسمية .. مجلوب يكول راح يصير الحساب من جديد وعلى الاكثر اله نصيب .
* يعني نعالك التسكام راح يصير مال وتستلمه راس الشهر .
- الله واكبر عليج .. ما تجوزين من النعال التسكام .. عمي بطلت ما اريد لا نعال ولا بشت .
* اذا ما تريد النعال ..جا ليش جايب لي بشارة مجلوب وتكول راح يصير له نصيب بالحسابات الجديدة .
- هسه انت اصبري علـيّه ....انطيني فـنـتـك .. تشوفين شلون راح اصير حماية لمجلوب من يصير نايب .
* ها .. هسة بينت النية الكشره .. مو بلاش .. رايح ويه مجلوب وجاي ويه مجلوب .
- يعني .. انت ما تفرحين من يصير النا ضلع بالحكومة .. اشتريلج عبايه وجرغد بريسم ..واخليج تمشين عالمودة .
* ليش يابه شفتني .. اني ابيع صوتي علمود جرغد بريسم .. والله لو ميت جرغد .. وحتى لو يصير الحساب
من جده وجديد للانتخابات صويحبك ما يطلع له سهم .
- فال الله ولا فالج .. انتي ليش عريضي بكل شي .. مجلوب هم صديجنا وهم من عشيرتنا .
* ما يفيدك هذا الحجي .. ماطوله ما يمشي عدل .. ويفرهد مال الله وعباده .. ما ينجح لا بالانتخابات ولا بالدنيا ولا بالاخرة .
- جاسمية .. بالدنيا افتهمنا .. لاجن بالاخرة شلون تحكمين على الرجال .. قابل انتي جايبه خبر من رب العالمين.
* لا .. لا خبر لا جفيه لا شربت .. صويحبك ما يربح لو تطلع نخله براسه .
- لا .. هضيمة يخسر ، واذا خسر احنا هم راح نخسر وياه .
* ابو جاسم .. لا تكول احنا .. كول انا اخسر نعال التسكام .
- هاي شلون طلابه .. ابتليت على عمري وخليتج تعرفين سري . آخ مني .. ما اجوز .. اعمه كلب .
* اكلك ابو جاسم سالفة صويحبك والخسارة مثل سالفة عبود الكرخي ومحمد الكبنجي .
- هاي السالفة شنو النوب .. اشوف كمتي تشمرين بعيد .. شجابج على عبود الكرخي ... صاير حجيج تكرزل .
* اي مو عبود الكرخي اتشارك ويه محمد الكنجي بتجارة الشعير ، اشتروا شعير وباعوه بخسارة .
- هاي شجابها على سالفة مجلوب والانتخابات .
* اي الها رباط لان عبود الكرخي كتب شعر وغناه الكبنجي ، يكول :
من كايلك تشري شعير / تخسر ما تخسر بالجير
شعيرك يخسر يا مصخم / قيمة نصه ما تلزم
انصحتك اترك لا تندم / لو مطرب لو تاجر صير
تخسر ما تخسر بالجير







اخر الافلام

.. أهم لوحات الفن التشكيلي لعام 2018


.. وداعاً شرير الفن الأنيق جميل راتب.. تعرف علي وصية الراحل للف


.. تفاعلكم | 25 سؤالا مع الفنان عبد الله السدحان




.. إزاي تقوي نفسك في اللغة الفرنسية - أولى ثانوي2019


.. بي_بي_سي_ترندينغ: وفاة الفنان المصري #جميل_راتب