الحوار المتمدن - موبايل
الموقع الرئيسي


حل المشكلة الخاشقچية

أيمن غالي

2018 / 10 / 26
كتابات ساخرة


في حادث مقتل عمر بن الخطاب؛ عبيد الله بن عمر بدون ما يتحقق من الحادثة وتحريات مباحث وتحقيقات نيابة دولة الخلافة، ومن شخصية قاتل أبوه؛ خمن واحد معين وإعتقد إنه هو إللي ورا قتله - ولَبّسْها لواحد إسمه الهرمزان - وراح قتله، ومعاه بنته، وواحد نصراني لقاه في سكته ..
وبعد إكتشاف حقيقة إن القاتل أبو لؤلؤة المجوسي، وإن الهرمزان برئ برئ برئ؛ أصبحت هناك مشكلة كبيرة في دولة الخلافة؛ ما تقلِّش عن المشكلة إللي مغروس فيها الخليفة العثماني ( في دور عثمان بن عفان )، وإللي مش عارف يعمل إيه مع طال عمره ( في دور عبيد الله بن عمر بن الخطاب )، ومع ترامب إللي بيطالب بالقصاص ( في دور علي بن أبي طالب ) ..
المشكلة إن البعض بزعامة علي بن أبي طالب؛ طالبوا عثمان بن عفان إللي تولي الخلافة بالقصاص من عبيد الله بن عمر بن الخطاب لأنه سفك دماء بريئة في أرض الخلافة الطاهرة ..
الخليفة قال: الواد يا وِلداه موجوع من قتل أبوه؛ أقوم أوجعه زيادة، وأقطع راسه ؟!
- يا عم الخليفة مش حا يتوجَّع وَلا حاجة؛ دي ضربة واحدة من سيف مسنون كويس، وبخ، وخلاص مش حا يحّس بحاجة، وَلا حا يتوجَّع، وَلا حتي حا يِفَرْفَر ..
الخليفة بن عفان كان مزنوق زنقة سودة، وحاول يخرج منها بمفهومية عصره، وينقذ رقبة عبيد الله بن عمر؛ فقال إيه ..
قال: فعلا؛ عبيد الله قتل ناس بريئة، وحتمن، ولزمن، وولا بود يتاخد منه القصاص، وتاتا تا، وتيتي تي وكدهون .. بس فيه حاجة مهمة يا رجالة فاتتنا؛ مين إللي من حقه ياخد القصاص ويقتص من عبيد الله، ويجيب رقبته ؟
- ودي عاوزة كلام؛ الخليفة طبعا .. أمير المؤمنين، وأنت الخليفة، وأمير المؤمنين ..
- لا يا رجالة؛ وقت وقوع حادث القتل ما كانش فيه لا خليفة، ولا أمير مؤمنين، ولا أنا كنت خليفة، ولا كنت أمير مؤمنين
- إزاي الكلام ده يا أمير المؤمنين ؟!
- فاكرين صوفي أبو طالب لما مسك الرئاسة في مصر بعد تخريم السادات ؟ وفاكرين عدلي منصور لما مسك الرئاسة بعد فرقعة مرسي ؟ الناس دي كانت ماسكة الرئاسة في مرحلة انتقالية؛ يعني في وقتهم؛ لا الرئيس السابق، ولا اللي بعده له دعوة بإللي حصل في عهد صوفي ومنصور
- يعني إيه طال عمرك ؟
- يعني ما ينفعش حد يجيب رقبة عبيد الله
- والحل طال عمرك ؟
- الحل ندفع الدٌيّة لأهل القتلي، ويا دار ما دخلك شر، ولتكن شخروميت ناقة ..
- ومين إللي حا يدفعهم ؟
- أنا إللي حا أدفع الشخروميت ناقة
- وحا تجيبهم منين طال عمرك ؟
- حا أنفخكم ضرايب، وحا أطلَّعهم من حَبَابي عِنيكم ..

يا تري التلاتة إياهم ( أردوغان وطال عمره وترامب ) حا يسمعوا كلامي ولَّا حا نلِّف وندُور على ما فيش، وتفضل العقدة في المنشار ؟





التعليق والتصويت على الموضوع في الموقع الرئيسي


اخر الافلام

.. تكريم إلهام شاهين في مهرجان هوليود للفيلم العربي


.. رسميًا.. طرح فيلم السرب فى دور العرض يوم 1 مايو المقبل




.. كل الزوايا - -شرق 12- فيلم مصري يشارك في مسابقة أسبوع المخرج

.. الفيلم اللبنانى المصرى أرزة يشارك فى مهرجان ترايبيكا السينما



.. حلقة #زمن لهذا الأسبوع مليئة بالحكايات والمواضيع المهمة مع ا