الحوار المتمدن - موبايل



جاسمية تلبس سترة صفراء دون علم ابو جاسم

مؤيد عبد الستار

2018 / 12 / 19
كتابات ساخرة


مشهد تمثيلي ساخر 21
* اكول .. حصلتي وظيفة بالاطفاء لو بالحريق !!
- لا يابه ... لا بالاطفاء ولا بالحريق
* لعد شنو هاي السترة الصفرة طالعة مثل كاهن بوذي لابستها للغوى .. عيوني كَام تغوش .
- هسه عيونك كَام تغوش من هالستره .. جا ما غوشت من شفطوا ربعك براميل النفط !
* آني يا هو مالتي .. قابل اني واكف على الكاك مال النفط .. هو مال الحكومة ..
والاخذوه ربع مجلوب السلف هم حكومة .. منها واليها .
- تالي صار النفط مال الحكومة .. مو مال الشعب .. هاي بيا قانون وبيا دستور !! النفط مال الشعب .
* جاسمية .. روحي اشتري بعقلج حلاوة .. منو يبيع النفط والبنزين بالمحطات ؟ مو الحكومة ! هو النفط مالها
وهي تبيعه للناس .. بعد يا شعب يا بطيخ ... انتي تظلين بها العقل ...!!
- ابو جاسم ..يبين داهنين زردومك بجم برميل نفط .
* اي تمام .. مو اني شريك مجلوب السلف من زمان النفط مقابل الغذاء . آني يا هو مالتي .. لا بالعير ولا بالنفير .
- اذا ياهو مالتك .. ليش تركض لمجلوب السلف .. وتركب وياه بالسيارة ؟
* هاي هم لاحكتني عليها .. ركبة السيارة .. الله واكبر .. الرجال وصلني لراس الشارع .. الله وكيلج لا ما كل ولا شارب .. هاي خطة العباس .. اذا حاط شي بجيبي .
- ابو جويسم .. مو البارحة شفت الدولارات جوه راسك .. منين ... ها .. خطة العباس .. !! لا تكول مالي شغل .
* يابه شخبصتينه .. هن ّ عشرين ورقة .. تـكَـول شايفه عندي بنك الرافدين .. ماطول عينج وراهن .. اليوم راح اخسرهن .
- لا تلعب بيهن قمار ما تخسرهن .. طبعا .. مال اللبن للبن ... فلوس حرام .. وين تروح .
* جاسمية بروح ابوج ماكلتيلي .. شنو هالستره الصفرة .. مو مال حريق ..والله لا يكتلج .
- لا مو مال حريق .. اريد اطلع بيها مظاهرة .
* وهاي السترة الصفرة شنو ... ما عندج عبايه ، لو طالعة موده جديدة ام الاطفائية !
- لا .. هاي تعلمناها من فرنسا .. تظاهرة بالفرنسي ها الشكل .
* جاسمية .. الزمي حدج .. لا تكولين فرنسي .. تره وصلت لليافوخ .. كلشي سمعنا .. حجي فرنسي ... ركص فرنسي .. ما ادري شنو فرنسي .. هالنوب مظاهرة بالفرنسي ..هاي ما صايره ولا دايره .
- اي انت ما تعرف شي زين بالفرنسي بس تعرف المكسرات ...هي فرنسا اللي طلعت للناس الحرية والمظاهرات والكومونة .
* انا اخو المصرّف .. وصلت للكومونة .. لا بالله احتركنا .. خلي اشلع

رابط الحلقة السابقة
http://www.ahewar.org/debat/show.art.asp?aid=618285







اخر الافلام

.. حورية فرغلى والفيشاوى وفيلم -يوم الدين- يحصدون جوائز الأفضل


.. مصطفي شعبان يكشف سبب تراجعه عن اعتزال التمثيل


.. نجوم هوليوود يعارضون تقديم بعض جوائز الأوسكار خلال فواصل إعل




.. الفنان القدير الراحل ا?براهيم بحر في سطور


.. بتحلى الحياة – ندى الحاج - شاعرة وكاتبة وابنة الأديب الراحل