الحوار المتمدن
- موبايل
الموقع
الرئيسي
!!يا شعب غور
لبنى حسن
2007 / 3 / 23اليسار , الديمقراطية والعلمانية في مصر والسودان
حد شاف شعب ُمتعب و مُسبب للصداع و الهم زى شعبنا؟ حد شاف شعب على طول مش راضى و دايما معترض على كل أقوال و أفعال حكومته النظيفة الشريفة العفيفة المسكينة؟ شعب و لا عاجبه لا فكر جديد و لا قديم و لا انطلاقة أولى و لا تانية و لا للآخرة......شعب عمره ما بيحمد ربنا على انه عايش برغم انه مضايق الحكومة و معكر صفوها و منغص عليها حياتها و معطل لها طموحاتها و خططتها؟... شعب ناقم و معترض لكن مُصر يفضل للحكومة قاعد في البلد!
بجد الحكومة و الحزب الوطني دول ناس خيرين و طيبين و مثاليين و صابرين صبر فاق أيوب بسنين, و طولوا بالهم كتير و استحملوا سماجة و جليطة الشعب اللي مش سايبهم في حالهم و بيعاملهم و كأنهم مسئولين عنه ولا – لا سامح الله- بيشتغلوا عند أهله, بينما هم في الواقع معذورين و عن العيب دايما بعيدين, و على طول بيحاولوا بمنتهى الذوق و الطيبة والرقة و الحنان يتفادوا مشاكله التي لا تنتهي.... لأنه شعب في الحقيقة موكوس و منحوس من رأسه لقدميه... و هذا أكيد ليس ذنب الحكومة أو نتيجة سياستها كما يردد بعض الخبثاء السفهاء هنا و هناك... بل قدرها و ربنا يعينها على ماركة المواطنين المنحوسين بطبيعتهم اللي لو دخلوا مسرح أتحرقوا لوحدهم...و لو ركبوا عبارة غرقوا نفسهم... و لو ركبوا طيارة وقعوا بيها... و لو ركبوا قطار ولعوا فيه.... و لو مشوا في الشوارع بيدوروا على البلاعات و ينطوا فيها... أو يدوروا على أسلاك الكهربا و يحضنوها... و لو قعدوا في بيوتهم يلعبوا في اسطوانات البوتاجاز و يفجروها.... و لو نجاهم رب السماوات فلا يحمدوه... إنما يدوروا على أكل يصيبهم بسرطان أو كبدي وبائي و يأكلوه.... و لو ربنا هداهم و مشوا على الصراط المستقيم و صاموا أخيرا عن الأكل... يشربوا فيصابوا بفشل كلوي.....و لو لا أكلوا و لا شربوا....يتنفسوا و من نحسهم يصابوا بأمراض الرئة(مع أن الهواء نقي).......وبعد كل هذا يطالبوا و بكل برود و انعدام ضمير إن الحكومة تقوم بعلاجهم و تعويضهم و الصرف عليهم و على نحسهم!
و الطامة الكبرى أن البعض منهم مختلين رسميين و فيهم اللي فاكر نفسه عبقري ويتجرأ على التفكير مع انه مش شغلته و لا مهمته و لا هو الكبير... و مع ارتفاع حرارة الجو بتزداد حماسه التفكير و تاخده الجلاله و ياخد موقف.... فينضم لليمين فيضطروا آسفين يحبسوه.... أو ينضم لليسار فيبعدوه و يعتقلوه...أو يقلب ملحد فيدفهم يحموا باقي الشعب منه و يسجنوه... أو يؤسس حزب و يقول ليبرالية و مهلبيه...فدمعتهم تفر من عينهم و لا يجدوا أمامهم مفر من أنهم يحبسوه.... و النتيجة أن الحكومة بتنزعج و يتكدر صفوها و تشتت عن مهامها و تُبدد طاقاتها و وقتها و ثروتها لإيجاد أماكن تآوى أفراد الشعب اللي بعيد عن السامعين.... مختلين...ضالين
هذا الشعب الذي وصل به الجنان و الغرور لدرجة انه عايز يتدخل في تعديل الدستور!!! مع أن الدستور سيضعه الحزب الوطني لتحقيق مصالح أعضاء الحزب الوطني و طبعا الحزب هو الحكومة و الحكومة حكومة الحزب يعنى الاثنين واحد أو اثنين في واحد أو الواحد هو الاثنين... المهم أن الشعب بعيد عن القضية...و هو ماله البارد؟؟....لا هو كاتب الدستور باسمه و لا الدستور من اجله... إنما فقط هو شعب عجيب بطبيعته...عنيد بالفطرة..مناكف لوحده...لا يكف عن الغطرسة و التعالي على حكومته و تاج رأسه.... و على طول بيصر على التدخل فيما لا يعنيه..... و يعمل مظاهرات و يتعب الدوريات و يعطل حركة المرور و يشتت طباخي الدستور مع أنهم قالوا له بدل المرة ألف غور!
|
التعليق والتصويت على الموضوع في الموقع الرئيسي
.. الانتخابات الرئاسية في السنغال: باسيرو فاي ينال 54,28% من ال
.. إسبانيا: النيابة العامة تطالب بسجن روبياليس صاحب القبلة القس
.. نتنياهو يأمر بشراء عشرات آلاف الخيم من الصين لإنشاء مخيم في
.. كامالا هاريس تصفق لأغنية إسبانية داعمة لفلسطين خلال زيارتها
.. قناة إسرائيلية: إدارة بايدن طلبت من إسرائيل السماح لضباط أمر