الحوار المتمدن - موبايل
الموقع الرئيسي


خواطر ممزقة

حسين جهيد الحافظ

2008 / 7 / 27
الادب والفن


(( خواطر كتبت من واقع الزمان والمكان أدناه ))
أربيل—خليفان—معسكر اسپيلك
25 / 6 /---- 25 /8 /1983

أچلبنك يليلي ألـــــف تچليبه
على وكتي الغدرني وفر دواليبه
( 1 )
أچلبتك يليلي وكورك العالي
عليً جيــثــوم خـيم بهذل أحوالي
يمر الليل كله اِمنوخ اِگبالي
صرت مثل الحمل واِمجابله ذيبه
( 2 )
أچلبنك يليلي اِمكالب اِويه الروح
ساعات اِتهجع ساعات مني اِتروح
يا عكس الزمان الصار ذله اِيفوح
يداخي للزنينه ويــرفـض الطيـــــبه
( 3 )
أجلــبـــنـــــك يليلي بين آه وآه
يا ويــــل الزمان وألــ،ف يا ويلاه
صادگت العدو وگمت الصديچ أنساه

مدري اتغيرت مدري الوكت غيّر تراتيبه
(4 )
أجلبنك يليلي وهذا مو طــبـعــي
أدافع عن عدوّي وحــاربــت ربعي
ريتك بالسگم يا گلبي دوم أدعي
چي لــنـــك ذلــيـــــــل وتدعي هيبه
(5 )
أجلبنك يليلي ومچمن الحسرات
ماخذني ودلــيــلــي بالونــيــن ايبات
چنت أدري الزمان اهوايه بيه دكّات
بس هـــيـچــي نـذل ماچـنــت أدريـبـه
(6)
أجلبتك يليلي امساهـر امــناطـر
وحيل أنـدب قسمتي وحــظي العاثــر
بمزامط عدوها الوادم اتــفـاخـر
وامزامط صديچي قسمتي اتجيبه
(7 )
أجلبنك يليلي وأحترگ بسكوت
يا هم العليّ مثل هم المـــــــــــوت
يا ذل الزمان الصار بيه الصوت
ممنوع اليســـــــولف يبقه ابريبه
(8)
أجلبنك يليلي وحالي ابيا حال
يا ضيم العليّ ما تشيل اجبال
صار ابهل الزمان الما يجي اعله البال
يعد اعيوب غيره وما يعد عيبه
( 9 )
أجلبنك يليلي وحسرتي ابصدري
توج چانون يسعر واحترت بأمري
بعض الناس تدري واللي ما يدري
ظنته امن العدس بايگلي اگضيبه
( 10 )

أجلبنك يليلي وي صده الذكره
أذوب اشموع سكته وأجذب الحسره
أشوف الناس لا تكتب ولا تقره
بتسطير الجذب واحدهم امصيبه
( 11 )
أجلبنك يليلي وأنظر الهل الناس
أشوفنهه تياه وفاقده الاحساس
مخبوصه تلف ما عدهه كل مقياس
ميزان الحچي اختلت تراتيبه
(12)
أجلبنك يليلي وبيك أشهد انجوم
على روحي الحزينه اِشكثر بيهه اهموم
هم گلبي وزماني الما يهمه اللوم
صفه الدحدوح وكتي وگلبي اگصيبه
( 13 )
أجلبنك يليلي ويشهد العباس
من وكتي الأعيشه شاب حته الراس
روحي اتدوهنت واِنصبت بالوهواس
واحســــن بالعقل متفرهــــــد انهيبه
(14)
أجلبنك يليلي وهم أنه ابنادم
جسمي مـــــــــن لحم ويّاه حفنة دم
مل مني الوكت من حيث هم ابهم
سوّاهه زمــــــــاني اوياي تسچيبه
(15)
أجلبتك يليلي وآنه والأفكار
جيش وحاصراني و الاِهموم اعصار
يا ويل الزمان البيه ابنك صار
جاسوس اعله بيته وملتهي ابجيبه
(16)
أجلبنك يليلي وآه بعد ماصيح
ولا أرضه الدمع هينوب گطره اتطيح
لو مره عذابي ومره التجريح
چا مــــــــــــل المسيح وغادر اصليبه
(17)
أجلبنك يليلي والعتاب ادموع
غدر بي زماني وسحن مني اضلوع
هم اترد يأمسي وبيك أضوي اشموع
لــــــــو مليت مثلي وراضي بالغيبه
(18)
أجلبنك يليلي وأستحق كل هاي
أكلي بالمذله وحسره شرب الماي
والأدهه وأمر مسلوب مني الراي
واِچماله الأطيعه فاســــــد احليبه
(19)
أجلبنك يليلي والرضع فاسد
عليّ خلاه وكــــتـــي آمــــــر وقائد
كفيلي المصطفى والمرتضى الشاهد
هـــــــــــــذا الزاد اكليبي تصاويبه
(20)
أجلبنك يليلي وبطلت لهناه
شتفيد الندامــــــــه اشتنفع الويلاه
لا وسفه وكتي اعله ولا أگولن آه
جي لنه ســـــــخيف وضاع ترتيبه





التعليق والتصويت على الموضوع في الموقع الرئيسي


اخر الافلام

.. كلمة أخيرة - هل الفنان محمد علاء هيكون دنجوان الدراما المصري

.. كلمة أخيرة - غادة عبد الرازق تكشف سر اختيار الفنان محمد علاء



.. كلمة أخيرة - الفنانة سيمون تكشف عن نصيحة والدها.. وسر عودتها

.. كلمة أخيرة - محدش باركلي لما مضيت مسلسل صيد العقارب.. الفنان



.. كلمة أخيرة - الشر اللي في شخصية سامح في صيد العقارب ليه أسبا