الحوار المتمدن - موبايل
الموقع الرئيسي


فجر تموز

حسين جهيد الحافظ

2010 / 7 / 9
الادب والفن


فجر تموز


الى ارواح الشهداء الذين قدموا تلك الأرواح
قرباناً على مذبح الحرية
حسين جهيد الحافظ
10/7/2008

فجر ما مر على ابنادم فجر مثله
فجر حته الفجر منه اخذ فجره
تعله عله الثريه.. ابهامه الطيبين
ونبت باعماق دنيه الناس
حنيه وفخر جذره
الله اكبر غبشه لمن صاح:
ذبح ليل البشر حزنه
ولبس گمره
حمد والهور غنو مطبگ امعيدين
واجه صوت الربابه ايهني من عقره
واعجاز النخيل الخاويه امن اسنين
رد الهه سعفهه وخضرت بشره
يحادينه الشعب وياك ايد ابايد
الألم
والآه
والحسره
ذبحناهن
غسلنه اهمومنه ابشهگات
شوگ اللي نذر عمره
صعد للمشنقه مهيوب
لاجل هاليوم خط مجده نزف نحره
يحادينه رغم (14) بضلوعي
منه اسهام
بس حبيته حب مجنون
حب قيس وبني عذره
لان الثار هوه
او ثار كلمن ثار
نذر روحه ووفه ابنذره
امن اعدد واكتب الاسماء
وحگ هامه علي
ودم الشهيد حسين
موش اقلام اخلص بس
اخلص اغصان كل شجره
ابدي من فهد لو حازم وصارم
لو ابدي بجمال الحيدري وتوماس
لو فريال....
لو سيد وليد وطارق السبهان
ابو انجيله.. ابو اكرم.. ابو ذكره
لو ابدي بسلام ووگفه اصويحب
لو ستار ومحمد
اغلط من اعد معلوم
لان الجو ذوله وزود
ووهمان اليظن يگدر يعد انجوم
شمس همه وسواهم غيم
وهيهات الشمس تحجبهه يوم اغيوم
يحادينه وأمان الناس انته
وللحنان اجناح
بيك الناس تتباهه
ويطگ جدم المشي مصباح
يا عين الگلاده وشگه القداح
يا ريحة اگرنفل..
يا عطر جوري ونده التفاح
يچاكوچ ويچف عامل
يحاصوده وتغني ومنجل وفلاح
شر اجناح شوگك خيمة امحبين
خل الناس كلهه ابشوفتك ترتاح
يا صبر المسيح الزعل مو ثوبك
يالثوبك فجر وضاح
غني امحمداوي ابصوت كلمن طاح
لاجل شعبه نذر عمره
يا فجر الكرامه وغيرة الطيبين
الفجر والله الفجر منك اخذ فجره





التعليق والتصويت على الموضوع في الموقع الرئيسي


اخر الافلام

.. الفنان الجزائري محمد بورويسة يعرض أعماله في قصر طوكيو بباريس

.. الاخوة الغيلان في ضيافة برنامج كافيه شو بمناسبة جولتهم الفني



.. مهندس معماري واستاذ مادة الفيزياء يحترف الغناء


.. صباح العربية | منها اللغة العربية.. تعرف على أصعب اللغات في




.. كل يوم - لقاء في الفن والثقافة والمجتمع مع الكاتب والمنتج د/