الحوار المتمدن - موبايل
الموقع الرئيسي


ألفروقات العشره

سرمد علي الجراح

2011 / 10 / 11
كتابات ساخرة


عندما جاء نبأ حصول أحد أصدقائي على الجنسيه الهولنديه, هنأته بالقول, هسه صرت بني آدم!!
زعل مني وقاطعني دون أن يناقشني أو يعاتبني, وفجأة بعد سنه خابرني وقال مباشرة: تذكر قبل سنه زعلت منك لما قلت هسه صرت بني آدم, فقلت له نعم أذكر
فقال: قلت في نفسي كيف يقول سرمد هذا؟ وهل كنا حيوانات لنصبح أوادم بحصولنا على جواز هولندي؟؟
ولكن قبل شهرين حاولت اسخراج وثائق رسميه عراقيه لأبني, وهنا بدأت قصه لها بدايه وليس لها نهايه, من روتين العهد العثماني إلى الواسطات والرشاوي, إلى عدم الأحساس بالوقت, إلى تبويس اللحى والتوسل, حتى إن زوجتي نذرت للكاظم نذر, تكول راح يتخرج من كلية الطب إبن الحمار!! كل هاي وماطلعت الجنسيه مالته. أخيرا من قهري لزمت المعامله وشككتها وحلفت بعد ما أصير زمال لوتنكلب الدنيه. لأن اليرضه بهيج مذله زمال وأبن زمال.
هنا توقف صديقي عن الكلام المباح, فقلت له دا أتحارش بيه, يمعود بهولنده هم يدوخوك, فقاطعني لاتقارن الاوادم بالحواوين رجاءا!!
هنا تروح تطلع جواز تسافر بيه لكل العالم بلا فيزه بخمس دقايق, تحول سياره بالبريد بخمس دقايق, أكثر معاملاتك تخلص بتلفون, تشتري وتبيع وانته كاعد بالبيت, قوائمك تندفع وحدها. الطبيب يجيك للبيت إذا ماتكدر تروحله. وانته تعرف الباقي أحسن مني.
مالم يذكره صديقي هو, ماعدهم برلمان يعزل 40 يوم لأن رايحين الساقطين للحج, وهنا أكول للي أنتخبوهم, لو منتخبين راقصات مو أحسن؟ على الاقل مايحجن ويداومن وخلقهن هم احلى.
ولاعدهم وزاره كهرباء أنصرف عليها 27 مليار دولار بكد ميزانية اربع دول والنتيجه صفر باليد حصان
ولاعدهم مليون معمم يحجون بالحلال والحرام, والحراميه يزيدون ماينقصون
ولا عدهم وزارة محاصصه محد يعرف برنامجها شنو
ولا عدهم مرجعيه رشيده تدعم الشلايتيه وبعدين تكول معليّه
ولا رئيس وزراء يلعب وحده ولازم الطوبه وماينطيها
ولا عدهم تيار زعيمه يكول اكص اصبعي إذا صار أمريكي!! يمعود دطير هوه لو عندك إصبع زايد جان خلّفت!!





التعليق والتصويت على الموضوع في الموقع الرئيسي


التعليقات

1 - اضافة
عباس فاضل ( 2011 / 10 / 11 - 13:39 )
وبالامكان سيد سرمد ان تضيف : الراقصات حلوات ويونسون الناس بس جماعتنه كل واحد كالب خلقته ومن يحجي عبالك مداين ربه فلوس . عمرك شفت راقصة تلغف 40 مليار وتمشي؟ اكو راقصة فجرت نفسهه وكتلت اوادم ؟ سمعت بعمرك واحد جاب راقصة خاطر تركص وجلبت ومتقبل تطلع وتضل تركص ؟

2 - تحيّة للكاتب
رعد الحافظ ( 2011 / 10 / 11 - 15:58 )
سأبدأ من السطر قبل الأخير
لازم الطوبة وما ينطيها ... وذاك اللاخ علاوي / ألعب لو أخربط الملعب
أولاً مبروك على فوز الفريق العراقي على الصين في عقر دارهم واحد ... صفر
ولو فوز ضعيف وبالشافعات وجماعتنا ضيعوا 85 دقيقة من ال 90 دقيقة ولعبوا 5 فقط والكولجي وحده ضيع 80 دقيقة ههههههههههه
ولو كنت أتمنى الفوز بشرف , بس معليش ,,, لمسات زيكو واضحة على الفريق وممكن نترشح للدور التالي مع الأردن
**********
بالنسبة للوادم ... وبهذه المناسبة اليوم سمعت خبر من الدانمارك وانها غيّرت من شروط الهجرة وجعلتها أسهل نوعاً ما وألغت بعض المعوقات لكن المهاجر سيتكفل بنفسهِ يعني لازم يعمل ليعيش مو مثل الان ... أكثر المهاجرين يتفاخرون بخديعة بلد المهجر وشهادات طبية ليحصلوا على المعونة , وقد يعملوا بالاسود حتى لايدفعوا ضريبة
******
لقطة صغيرة / كنتُ اليوم في منطقة يكثر فيها المهاجرين , ومطاعم شرقية وماشابه
لوهلة تخيلتُ أنّي في حي في عَمّان او بيروت أو الشام , لكن شوية أبرد وأنظف
لكن النظافة التي اقصدها تقارن مع المدن العربية وليست مع المدن السويدية التي يقل فيها المهاجرين وهي من أنظف مدن العالم على الإطلاق

3 - خرجية
حمورابي سعيد ( 2011 / 10 / 11 - 18:26 )
اخي سرمد....تره ال27 مليار دولار مال الكهرباء ما ضاعت ,هذي اشاعة المغرضين .بس الويلاد اشتروا بيها شوية كركري وشعر بنات ولفة ابيص وبيض وسيفون ودخلوا سينما بيها فلم علي بابا والربعين حرامي ,وبعدين ركبو مراجيح ودولاب الهوا وبهلشكل انصرفت الفلوس .تحياتي

4 - ردود الاصدقاء
سرمد الجراح ( 2011 / 10 / 11 - 21:20 )
الاخ الكريم عباس فاضل, والله يااخي كولة عادل امام كلنا حنرئص يوم القيامه. والظاهر الجماعه هم رواكيص بس بجهنم انشاء الله
الصديق العزيز رعد الحافظ, مبروك للفريق العراقي ولكل مشجعي كرة القدم, اكول ليش ذكرت الدنمارك اعرفك مو لوجه الله لازم بيها ان الشغله؟؟ ههههههه اريد اصير ناصريه اليوم. تحياتي واشواقي
الاخ العزيز حمورابي, يله خلص الحر واجه الشته شيسوون بالكهرباء. كولتك خلي الويلاد يفرحون بالمراجيح وهنه كم فلس لويش هالحسد. تحياتي لك

5 - وفوز السويد أيضاً
رعد الحافظ ( 2011 / 10 / 11 - 21:44 )
ههههههههههههههه
زين هذا خبر من السويد / حار ومكسّب
اليوم يوم الإنتصارات الكروية
العراق فاز على الصين .. هناك
والسويد فازت على هولندا 3 مقابل 2 وصعدت الى نهائي أمم اوربا 2012
وداعتك سرمد ذكري للدانمارك ... ما بيه إنّه لكن هسّه إنت ذكرتني ههههه
بصديقنا الرائع هناك عمر علي , أكثر مهاجر يفهم ويلتزم بقوانين البلد
تحياتي لك ثانيةً

6 - منع البوشيه
سلوم السعدي ( 2011 / 10 / 12 - 09:24 )
تحيه استاذ سرمد
انا اتعجب لماذا منع ارتداء (البوشيه)قطعه سوداء شفافه تغطي وجه المرأه
في مجلس النوام (عفوآ) مجلس النواب!!!!!ّ!ا
خصوصآ كان معمولآ به ولا يزال في مجالس المحافظات العراقيه ولا ننسى المحرم مع النائمات المحترمات
هل يوجد قانون يحدد ذالك ام هو تصرف شخصي؟؟؟
مع وافر الاحترام والتقدير لمجلسنا الموقر وسيروا الى الامام ونحن الئائمون ورائكم
والله الموفق
تحيه للجميع

7 - ردود الاصدقاء
سرمد الجراح ( 2011 / 10 / 12 - 14:03 )
عيوني استاذ رعد, تره الهولنديين استخطوكم وكالو يله لايرحون يلطمون -خصوصا اكو هوايه لطامه بالسويد- إذا ماوصلتوا للبطوله
تحياتي
الاستاذ السعدي المحترم, أعتقد والله أعلم بمجلس المحافظات يمكن اكو كم زلمه, فيلبسن بوشيه, بس بالبرلمان الضاهر ماكو زلم غيرهن
تحياتي

اخر الافلام

.. بحضور عمرو دياب وعدد من النجوم.. حفل أسطوري لنجل الفنان محمد

.. فنانو مصر يودعون صلاح السعدنى .. وانهيار ابنه




.. تعددت الروايات وتضاربت المعلومات وبقيت أصفهان في الواجهة فما

.. فنان بولندي يعيد تصميم إعلانات لشركات تدعم إسرائيل لنصرة غزة



.. أكشن ولا كوميدي والست النكدية ولا اللي دمها تقيل؟.. ردود غير