الفيسبوك
التويتر
اليوتيوب
الانستغرام
لينكدإن
تيلكرام
بنترست
بودكاست
الحوار المتمدن
- موبايل
الموقع
الرئيسي
وصايا إلى دكتاتور لحيمي
سرمد علي الجراح
2012 / 2 / 23كتابات ساخرة
لحيمي هو فرخ الطير الخارج من البيضه بدون ريش, ويطلقها العراقيون على عديم الخبره او الجديد في الصنعه
بداية لابد من القول إن أغلب العراقيين أصبحوا لايكترثون لمن هو على سدة الحكم, بعد أن شبعوا ديمقراطيه وفجل وباميا وماينتج عن اكلهما
وبعد أن أتضح لهم أن زعمائهم ماهم إلا نتاج وخلاصة مجتمع, ظاهره التدين والأخلاق, وباطنه الأنحطاط والسفاله. فهذا الروث من ذاك البغل
بمعنى إن إصلاح الحال من المحال, فحتى لو تغييرت الجوقه الموجوده الان, فستصعد جوقه أحط وأقذر من سابقتها
مما تقدم وبناءا على رغبة فخامة رئيس الوزراء للترشيح لولايه ثالثه ورابعه وعاشره. ولأننا على يقين وقناعه تامه بأن رغبته تلك ستتكلل بالنجاح, ليس لشطارته أو قوته وجبروته, وإنما لفساد أخلاق الشعب وقبوله الضيم والظلم كمسلّمات وبديهيات ليس له عنها غنى
مما تقدم أضع أمام فخمامتكم, أعزكم الله وسدد خطاكم لما فيه من خير لكم ولأبنائكم وعشيرتكم وحمايتكم ودجاجكم, بعض الوصايا والأرشادات التي تنفع دكتاتورلحيمي مثلكم, أو طاغيه في طور الانشاء والبناء
ـ بداية عليه أن ينزع عن قلبه الخوف أو التردد أو بقايا من رحمه أو أخلاق. وأن لايخشى أحدا, حتى لو كان ميسي ومنفرد بكول ريال مدريد
ـ من اصول الشغله أن يكون هو الشقاوه الوحيد, فلا ينفع أن يكون ديكا بين ديكه, وإنما يجب أن يكون ديكا بين دجاج. أول مره اشوف ديج لابس مناظر!!
ـ أن يكون هو الحرامي الوحيد, فكثرة الحراميه تقلل من هيبة دولته وسلطتها, مو مشكله تنطي وتوزع وكالات النهب على الاولاد والاحباب, بس لازم يكون بعلمك وحسب شروط الوكاله مو اكثر
ـ أن يكون هو المجرم الوحيد, لتخافه الناس وتخشى سلطانه ويصبح لعقابه معنى, المهم تعرف الناس إنك سبع ومتخاف وماعندك لحيه مسرحه
ـ أن يستتب الامن برعايته ويقمع بعنف كل من يفكر مجرد التفكير في تحدي قوانينه, لازم تنطي قوانينك قداسه أكثر من كل كتب الله والشيطان
ـ أن يكون واضح الهدف, وهو بقاءه على الكرسي الى آخر رمق, وياويله وسواد ليله اللي يفكر بالكرسي المقدس. تره هوايه أكو سرسريه وبسرعه يطمعون إذا شافوك رخي.
ـ أن يبطش بخصومه ذوي الشأن ليكونوا عبرة لأذنابهم, هاي تكدر تراجع بيها سيرة أخو هدله لأن كان المرحوم, بروفسور في قص الأجنحة ونتف الريش وسلق الخصوم
كلمه أخيره بالأصاله عن نفسي ونيابة عن شعب الله المحتار: نرجو من الله ثم منك, أن تطلع كدها وتصير دكتاتور أخو أخيته
وتخلصنا من شرور أنفسنا وخبث طويتنا
فقد مللنا الديمقراطيه لأننا لانعرف كيف نختار, ولأن الشريف مايعيش بنصنه
دعاءنا لكم بالموفقيه وسدد خطاكم وجعل شعاركم العصا لمن عصى لعلكم تفلحون
|
|
التعليق والتصويت على الموضوع في الموقع الرئيسي
التعليقات
1 - اكثار
حمورابي سعيد
(
2012 / 2 / 23 - 15:55
)
اخي سرمد...ولا تنسى ان توصيه بالاكثار من اكل البامية والفجل وشرب الكولا,لان النواتج رح تنفخ بطنه ويصير ابو هيبة وشمخرة ,وهاي النواتج يمكن تتوجه للي يعارض.تحياتي
2 - استاذ سرمد
شذى احمد
(
2012 / 2 / 23 - 19:19
)
عاشت ايدك المقال رائع وضحكت كثيرا وان كان ضحك كالبكا على الفقرات المختارة بدقة وفعلا روحك مرحة ..اول مرة اشوف ديج لابس مناظر
تسلم وذكر ان نفعت الذكرى
كل التقدير ويسلم نفسك الذي لا يهادن وان كان المخاطب لا يحتاج لوصية فهم كلهم من طينة واحدة والعراق ابتلى بهم
3 - نصيحة عوازة
يونس حنون
(
2012 / 2 / 23 - 19:52
)
عيوني ابو السرامد
نسيت نصيحة مهمة تتعلق باظهار الشعبية
ان يستقبل على الاقل مرة بالشهر لملوم من رؤساء العشائر اهل العكل بمختلف تطريزاتها ممن يجيدون التكميز وهم رافعين ايديهم وان يكون بينهم 2 او 3 اختصاص (ها خوتي ها) وان يضع صاحبنا يده على صدره عربون للشكر على كل دارمي نفاق وهوسة تفريج يقاطعون بها كلمته
مع تحضير علاليك مليئة بامهات الخمسة وعشرين الف في نهاية المقابلة يدهن بها زردومهم كي تستحي العين فلايبدأون بسبه وشتمه بعد انتهاء اللقاء كما هي العادة بل يؤجلوها على الاقل حتى يوصلون لبيوتهم
4 - تحياتي للجميع
شامل عبد العزيز
(
2012 / 2 / 23 - 19:54
)
حلوة منك - ميسي ينفرد بكول ريال مدريد وبالمناسبة سوبر هاترك على فالنسيا
بمناسبة أن يستتب الأمن فاليوم قد أستتب على 70 قتيل و200 جريح
بالنسبة للدكتاتور لحيمي أبو نظارات فسوف يزعل منك أهل الليبرالية العراقية والعلمانية التي تشبه علمانية الدول الاسكندنافية وديمقراطية سوق مريدي ؟
راح الكثير عزيزي سرمد كما يقولون - 9 سنوات فقط باقي 991 لأن المدة المقررة 1000 حسب أهل العلم بالحوزة والمصدر قم والله أعلم
هل تعرف : شر البلية ما يضحك - العراق اليوم هكذا - لا علاقة له بما يجري في العالم مجرد لطم وتطبير ومفخخات وعبوات والسبب بقايا أزلام النظام السابق الذي لم يبقى منهم إلا نفرات في بعض الرؤوس المغلقة والأدمغة المتحجرة
حقيقة لو كتب العالم مجلدات حول ما يجري في العراق فسوف لن يشكلوا إلا جزءاً يسيراً مما يحدث والأنكى - ليبرالية - علمانية - ديمقراطية والتي كنا محرومين منها سابقاً والآن تضاهي النمسا - إذا ما تصدك تعال وشوف شنو يصير بالبلد وعلى حسابي ؟؟؟؟؟؟؟؟؟؟؟؟؟؟؟
شكراً لك عزيزي سرمد
5 - ردود الاصدقاء
سرمد الجراح
(
2012 / 2 / 23 - 21:07
)
الاخ العزيز حمورابي, الحقيقه ذكرتني بتوصية ان يكون هيبه. لازم يتعلم شلون يوكف كدام الكامره ومن يتكلم يشيل تك حاجب ويعوع بابوج حلكه ويستعمل جمل كبيره بدون معنى مثل سوف نعمل على وسنقوم بزيادة مستوى وسنرفع من انتاجية البابنك. يعني خريط بس مرتب
تحياتي
الاستاذه شذى, شكرا لمرورك وتعليقك, ويسرني انه رسم ابتسامة على وجهك. سيدتي المشكله مو بالديج اللابس مناظر. المشكله بالشعب اللي صاير دجاج اسلامي بالكاري والكشمش
تحياتي
دكتورنا العزيز يونس, همزين ذكرتني بهذوله جماعة ها لوتي ها, تره احنه شعب فريد بالعالم ويملك قابلية التلون اكثر من الحرباء. والمفروض دارون كان يسوينه صنف وحدنه. ولازم منظمة اليونسكو تعتبرنه صنف معرض للانقراض ويجب المحافظه عليه في محميه طبيعيه كما ذكر صديقنا مازن البلداوي في احد ايميلاته
تحياتي
استاذنا العزيز شامل, يمكن لك ان تتخيل اننا احتجنا الى 14 مليار سنه حتى يصير الكون وتصير صدفه ننخلق بيها على الارض. وحظنه ماجابنه بهل صدفه الا يم اللطامه. لعد شكد فكر احنه
تحياتي
6 - صدفه 1
كعك ابو السمسم
(
2012 / 2 / 25 - 15:25
)
احنه مو شعب الله المحتار,لان ادري المحتار هو اللي يفكر بعده اشياء او شيئ واحد و ميكدر يتخذ قرار او ميريد طبه مرض ,المهم المحتار اللي يفكر هاي اللي اريد اكولها ف احنه شعب ميفكر -لا-ما اعتقد :احنه شعب المغضوب عليهم و الضالين و شعب ميستحي و مخبل و جبان و مؤمن خطيه و كمش و شايف نفسه و ميحس و خلي اطيكم مثال من قلب الحدث
صدفه جنت بالكاظميه اول البارحه بليله الخميس و صدفه قناة الشرقيه بالشارع و ديسولفون ويه محافظ بغداد-من اهمداج بغداد عله هيج جهره -وصدفه جنت واكف وره الكامره و سمعته يكول للمذيع هذه الحجي :يعني صحيح اليوم راحو 450 عراقي ضحايا الاعمال الارهابيه بس مو بهذه السوء اللي تصوره وسائل الاعلام.
ههههههههه
وهذ الكلام جان مباشر ها مباشر و صدفه لخ بس قبل ساعتين جنت دا اقره عن احداث 11 ايلول و انحفرت براسي عدد ضحاياهم 2973 نيويوركي بذيج الصبحيه الكشره-صدك جذب ما ادري-وسبوهه للدنيا و كلكم تعرفون الباقي
يتبع لطفاً....
7 - صدفه 2
كعك ابو السمسم
(
2012 / 2 / 25 - 15:43
)
صفنت شويه و الصفنه مو الي و عبرت الجسر اللي ماتو عليه فوك الالفين عراقي و عراقيه و اذكرت شلون اصاله نصري تكله لنصير شمه جيب تكتات الطياره اللي صرفته من جيبي عبالي انته الحفل هذه اللي يروح ريعه لضحايكم استفاد منه اني هم مو ابلاش يسلمو
يا عراقي
رجعت للبيت و ممحتار -لا- متاكد بان حياتنه من صدك صارت حقيره ومو اني بس -لا-شعوب الارض ويايه تتفق بهذه الطرح و ماطول جبتوهه عالطوبه ؟ زين لعد ,شفتو لميسي وفريقه و الفريق اللي لعب ضده و المشجعين ذاك اليوم شلون وكفو دقيقه حداد عله ارواح اثنين و سبعين من ضحايا اعمال شغب -مو ارهاب-بلمعب بورسعيد المصري
اخوي سرمد ردت اكلك هاي المدونه او الموقع مالتك بعد ما اطبها اله ترجع توصف وصف دقيق لبلدنه العريق و لشعبنه الميستحقه بس اعترفت اني باني حقير و اطب ما اطب مراح يفرق شي.
.. الأسود والنمور بيكلموها!! .. عجايب عالم السيرك في مصر
.. فتاة السيرك تروى لحظات الرعـــب أثناء سقوطها و هى تؤدى فقرته
.. بشرى من مهرجان مالمو للسينما العربية بعد تكريم خيري بشارة: ع
.. عوام في بحر الكلام | الشاعر جمال بخيت - الإثنين 22 أبريل 202
.. عوام في بحر الكلام - لقاء مع ليالي ابنة الشاعر الغنائي محمد
