الحوار المتمدن
- موبايل
الموقع
الرئيسي
محصّن بألله ومحروس
سرمد علي الجراح
2012 / 2 / 28كتابات ساخرة
هيج شعب حسود وعينه ضيكه ويسوي الدكايك ويتبجبج ماشايف
بس أريد أفتهم على شنو تتبجبجون؟؟
يعني شنو النواب أشتروا سيارات مصفحه؟؟ على شنو زعلانين حضرتكم؟؟
فوك ما انتخبتوهم وورطتوهم بهل شغله الزفره, فوكاها تريدوهم يتعرضون لخطر الارهاب
كذبتوا عليهم وكتولهم الأمن مستتب وتم القضاء على الأرهاب, شو صح الباقي يوميه انفجار, شنو ارواحهم بلاش عليهم.
تردوهم يموتون ويعوفون المليارات البلعوها, والعمارات الشتروها, والحلوات التزوجوهن, والكاوليه اليركصون وياهن, والحشيش والكوكايين
يعوفون كل هذا ويصيرون شهداء حتى يكابلون جهرة الخميني وعلماء الحوزه والزرقاوي بالجنه؟؟
فوك مايريدون المساكين يقتصدون, ومايكلفون الدوله هوايه؟
اصلا المفروض كل واحد منهم نشتريله هليكوبتر, حتى من بيته للبرلمان جفت. ومايمر بالشوارع المكسره, ويشم ريحة الجيفه مال المجاري الطافحه, ويكدر مزاجه بمناظر البنايات المفلشه والزباله المكومه, ولا يشوف ارتال العاطلين عن العمل والمكادي المالين الشوارع, خاف ينكطع واهسه وينغث ومايكدر ينام بالبرلمان زين.
لا وأحلى شي بالموضوع, الأمام السيستاني أبدى أنزعاجه, لا لا بداعت بناتك اليملكن بس شارعين بلندن؟؟
شدعوه غاث روحك يمعود؟؟ لايرتفع ضغطك ويطك عندك علج.
اي شكو عليك مو كاعد بالسرداب وماتدري شكو ماكو, مولانه صح النوم, تره الله وكيلك ولد عمك الايرانيين, وحرس ابن خالتك خامنئي سابين الدنيه, وتارسين البلد مفخخات, والنواب المساكين واحدهم يخاف يروح للتواليت لتنفجر جواه عبوه
مو جنابك ماتدري كاموا النواب يلبسون حفاظات من وره هل شغله.
البلد شوارعه مفلشه وكل شويه طاك تاير سياره, لو صوت صالنصه كايمه, لو مولده كهرباء منتحره, والنايب بنص الطريق للبرلمان يتبلل بنطرونه من الخرعه
لو عنده هذا الشعب ضمير من صدك, جان طلع مضاهرات تطالب بنقل جلسات البرلمان الى سويسرا, وقبل افتتاح كل جلسه, تقام حفله مال كاوليه, بلكي يركبون الكاوليه ويبطلون يركبونا
بس لازم تشترولهم فلل للسكن هناك, اي طبعا وين يرحون لعد؟ قابل ينامون بالمترو؟
والله لو اني من اعضاء البرلمان كان سويت اضراب واركب للبرلمان بعير, حتى بكل جلسه نكطع الشوارع اسبوع علما نوصل
ونشتري البعير مصفح بعشر ملايين دولار على عنادكم
|
التعليق والتصويت على الموضوع في الموقع الرئيسي
التعليقات
1 - ركوب
حمورابي سعيد
(
2012 / 2 / 28 - 08:54
)
خوية سرمد..تقترح في جلسة افتتاح البرلمان ان النوام اقصد النواب يركبون الكاولية . زين النائمات اقصد النائبات عليش يركبن ؟ تحياتي
2 - بعران
سمير فريد
(
2012 / 2 / 28 - 17:55
)
العزيز سرمد
تحية
ولوش التبذير خلي مركتنه على زياجنه ونمنع الاسيراد للبعران مو البلد بيه هوايه بعران مين ما تمد ايدك تلكه بعير مسوي روحه يفتهم وفاتح مكتب يفض منه مشاكل الناس ....تدري عندي اقتراح ان نطلب من الامم المتحده ان تساعد الشعب المسكين لتوزيع البعران الموجودين على كل دول العالم وبنسب مىْويةويخلولنه بعير واحد نمونه بلكت تنفك جبستنه وتتعدل امورنه
تحياتي ومحبتي للجميع
3 - مجتمعاً من الخِراف يخلق حكاماً من الذئاب
الحكيم البابلي
(
2012 / 2 / 28 - 18:43
)
عزيزي سرمد
تعرف .... مرات أفكر بيني وبين نفسي : الم يفقد العراق لحد الأن أكثر من مليون بشر منذ بداية الستينات ولحد الأن ، وبدل ذلك كان بالإمكان أن نقوم بثورة لا تُبقي ولا تذر ، ولا أعتقد كُنا سنخسر عُشر هذا العدد ، ولكن الظاهر شعبنا طلع فاشوشي ومو أخو خيتة ، باوع شلون الشعب السوري يقف بعض رجاله أمام الدبابة ، ونحنُ نايمين على الضيم وما بينة خير إلا بالمسيرات المليونية اللي ما توكل خبز وإلا بركضة طويريج وركضة كل من طاح صبغة من وِلد الملحة
العيب مِنة وبينة كما قال الراحل رضا علي ، ولو جان الوادي يعرف أن الخروف ينطح هم ما جان يتقارش وياه ، تمام ؟
تحياتي
4 - طويريج بوابة مملكة بابل
رعد موسيس
(
2012 / 2 / 29 - 02:35
)
عزيزي الكاتب سرمد
بصراحة ومن غير استحياء شعبنا وعلى هالوضعية يحتاج الى قوافل وطواقم كاملة العدة والعدد من الأطباء النفسايين لاعادة تأهيله من جديد
معقولة جذور هذا الشعب ترجع الى سومر واشور يعني لو قاموا من قبورهم وشافوا الوضع شو راح يحجوا علينا؟
شنوا القضية اشو نظرية التطور لحجي داروين ما تشتغل عندنا.
انت شايف اسود بعد اجيال نسلها يقلب الى خرفان.
يعني تمثال اسد بابل شنو راح نحط بمكانا؟
تحياتي
رعد موسيس
5 - ردود الاصدقاء
سرمد الجراح
(
2012 / 2 / 29 - 14:01
)
العزيز حمورابي, تدري هسه ياله عرفت منك, أكو نسوان بالبرلمان!! ذني المكبعات ولابسات فوطه وشيله تقصد؟؟ تره عبالي وحدتهن سلفي مزين شواربه ومبقي لحيته. ومع ذلك على هل شكول اكيد هم يدورن الكاوليه
تحياتي
الاستاذ سمير, لا ارجوك, البعران ثروه قوميه ويجب الحفاظ عليها, وقطع يد الاستعمار التي تريد نهب بعراننا وتصنيع احذيه امبرياليه من جلودها. بس يمكن تصدير المطايا حاشاكم, وهاي هم هوايه
تحياتي
الاستاذ البابلي, اتفق معك تماما, وهذا يثبت اننا شعب قاصر عن ادراك مصالحه, وان تركيبته الفكريه والنفسيه ليست بمستوى رد الفعل الاساسي للكائن الحي, الذي يعرف ماينفعه مما يضره, فأغلب تصرفات هذا الشعب كمجموع تجلب الضرر والبؤس له, ويصر عليها ولايتعلم من تجاربه السابقه. هل رأيت مخلوقا بهذا الغباء؟؟
تحياتي
الاخ رعد, لا أظن بأي حال اننا من سلالة أولائك العظماء, وانما وكما اعتقد نحن من سلالة البدو اللذين احتلوا هذه البلدان ونشروا فيها ثقافتهم وتخلفهم. اما السكان الاصليين فأصبحوا أقليات ليس لها تأثير وتصارع من اجل البقاء
اما اسد بابل فراح يحطون بمكانه بعير ولابس عمامه
تحياتي
6 - العزيز سرمد
جاسم الزيرجاوي-مهندس أستشاري
(
2012 / 2 / 29 - 15:20
)
العزيز سرمد
تحية لك وللاصدقاء
ما جاء في تعليق الصديق البابلي هو الحكمة ونظيف الى ذال:
العبد الذي لا يعي عبوديته لا يستحق ان يعامل الا معاملة عبد
7 - اخي الكريم سرمد
يونس حنون
(
2012 / 4 / 15 - 01:24
)
ابو السرامد من حلكك لباب السما
عمي خليهم يتصالحون ويتحدون ويؤسسون حزب عساه حزب البعر العصبي الانفكاكي اريد اشوف ورا المصالحة ملا نوري المالكي براس منو رح يبرر اسباب انه الكهرباءماتصلحت
وشلون حيبرر الامن المفقود بالبلد
ذكرتني بحادثة حقيقية
بعد ان احتل صدام الكويت وتنازل لايران عن اراضيها ورجع كل اسراها وانطاها نص شط العرب لان الاثول اتخيل صار عنده حدود بحرية كاملة عباله الكويت باقيه بجيبه
المهم انه بعدها اصدر قرار في ايلول 1990 بتاسيس فرق حرس جمهوري جديدة
علمود يحارب امريكا و30 دولة وياها
راحوا ضباط من الحرس الجمهوري يدورون بمراكز التدريب عن عناصر من الجنود المكلفين للفرق الجديدة
اي جندي مظهره مرتب حسن الهندام يكولوله اصعد بالحافلة انت صرت بالحرس
الى ان وصلوا لجندي مايريد يصير بالحرس
كلله للضابط حتى يتملص :سيدي اني عندي 3 اخوة معدومين لان كانوا بحزب الدعوة
الضابط جاوب: يمعود..... ذوله صاروا اخواننا .....يلله اصعد
وهانحن كلنا صرنا اخوة ورح نصعد
.. بيع -الباب الطافي- الذي حدد نهاية فيلم تيتانيك بسعر خيالي
.. الفنان #محمد_عطية ضيف #قبل_وبعد Podcast مع الاعلامي دومينيك
.. الفنان عبد الرحمان معمري من فرقة Raïm ضيف مونت كارلو الدولية
.. تعرّفوا إلى قصة “الخلاف بين أصابع اليد الواحدة” المُعبرة مع
.. ما القيمة التاريخية والثقافية التي يتميز بها جبل أحد؟