الفيسبوك
التويتر
اليوتيوب
الانستغرام
لينكدإن
تيلكرام
بنترست
بودكاست
الحوار المتمدن
- موبايل
الموقع
الرئيسي
المقامه الواويه النفطيه
سرمد علي الجراح
2012 / 4 / 19كتابات ساخرة
صارت عركه مصلاويه بين الديج والواويه*
أهزوجه كنا نرددها ونحن صغار, يعني قبل ألف تالاف سنه, من راح سرجون أبو العرك, وأجه فسنجون أبو المرك
ولم نكن ندري ولا المُنجم يدري, أن سيصبح لدينا ديج هراتي, له أعوان ومريدون, ويحكم بدولة الربابه والقانون.
ومن حوله واويةٍ متربصون, لاتمتلئ بطونهم ولايشبعون
فكان من أمرهم أن الديج بدء يشعر بالقوه والعظمه, بعدما أستتب له الملك وسيطر على الوزارات الأمنيه, ووضع القضاء في جيب الخرده
فلما تيقن إن المارينز قد رحلوا
وأبو عمامه بالفرهود منشغل
قام بتصفية من لايرتاح له من الخصوم, والتحرك لضمان بقاءه الحاكم الوحيد للمزبله
فجن جنون الواويه, وتشاوروا لصد هذي البليه. فقال أحدهم لانريد دكتاتوريه, وقال آخر علينا إجراء انتخابات ديمقراطيه
فمر بهم حمارا يجر عربانة نفط, وهو منظر تراثي من زمن أبونا الشمبانزي
فأوقفوه وقالوا له أيها الصابر المحتسب, هل لك ان ترشدنا بحكمتك فأننا رهن أشارتك
فقال لهم, خير شبيكم ملتمين؟ وشكو دتلطمون وتونّون
فشرحوا له الحال وقالوا له ماهو الحل في رأيك؟
فصاح ونهق, وتجشأ وحبق, وقال لهم, لاأدري هل أنا الكديش أم أنتم, وهل أبي حمار أم آبائكم وأجدادكم؟؟
فقالوا وكيف ذلك أيها الحكيم؟ فقال, ومن نصب هذا الهراتي على المزبله غيركم؟ وهل هو إلا واحدا منكم, تأكلون وتتقاسمون الغنائم معه, ثم تدّعون أنكم خصومه وأنداده.
وهل حقا يهمكم حالي وحال هذه العربه؟ أم مايهمكم فعلا هو السلطان
فتبا لكم ولمكركم أيها الكاذبون
سوك عمي سوك
نـــفط نـــفط
*الواويه جمع واوي وهو أبن آوى في اللهجه العراقيه
|
|
التعليق والتصويت على الموضوع في الموقع الرئيسي
التعليقات
1 - جميل
نشأت المندوي
(
2012 / 4 / 19 - 09:34
)
اسولب ساخر ومقتضب لكنه معبر ويثير الاسئله والغبار رغم قصر المقاله . المهم ذكرتني هذه الكتابه بحجايات ابو كاطع (االمرحوم (شمران الياسري) وشطحات (حسن العاني ) وبسامير ( (داوود الفرحان)وغيرهم ممن كانت الصحافه العراقيه (متروسه منهم) ووين ما تندار او تلتفت يكابلك واحد المهم الله يكثرهم ويديم عليهم النعمه والكتابه وضيجه الخلك وعين الحاسود بيه عود
2 - يعني ليش مصلاوية ؟ شنو حرشة ؟
شامل عبد العزيز
(
2012 / 4 / 19 - 10:08
)
عمي سرمد
الله يساعدك
يعني هي السالفة معروفة مال أبو القانون والربابة ؟
هو حالياً رئيس الوزراء والقائد العام للقوات المسلحة
ووزير الدفاع
ووزير الداخلية
عمي يمكن ماكو زلم بالعراق بس هو ويخاف لا يجي واحد يطيح حظه فكال شسوي آني راح أصير مكان هذولة كلهم بلكت تمشي الأمور
وهاي انت دتشوف أشون دتمشي مشي ؟
عمي والله راح نترحم على الماضي ؟ هسه يكولون بعثس قاعدي ( حامضي )
تحياتي سرمود
3 - احتجاج
فؤاده العراقيه
(
2012 / 4 / 19 - 11:38
)
ليش شبيهه الدجاجه قابل احسن من الديج يا اخويه حمورابي
4 - ربعية ... مو مليونية ؟
سرسبيندار السندي
(
2012 / 4 / 19 - 14:37
)
بداية تحياتي لك ياعزيزي سرمد لما تزيد لجراح جراح ، الجود فعلا من الموجود ، وإليك التعليق؟
1 : واحد عرقجي ملعب بعد أضرب من أبو السبح ( أبو الجروخ ) فد يوم راح للجامع وشاف صاحبه الشيخ يخطب حول العرق ( العرق حرام والمزة حرام والجلوس مع العرقجية حرام ، ووو ) ؟
فسأله العرقجي شنهي أنواعه ومنيش يصنع ، فكام الشيخ يشرح ويوضح العرق حتى أنواعه ، بطل ، نص ، ربعية ، زحلاوي مستكي ، هذا اللي يسموه حليب سباع .. ألخ ) وأخذ يجر ويعر بالخطبة ؟
فكام العرقجي وسأله مولانا والله ماإفتهمت ، شنو بطل ، شنو نص ، شنو ربعية ، شنو زحلاوي شنو مستكي ، فكام الشيخ المسكين يشرح ويعيد وكلله للعرقجي إفتهمت ؟
فكلله العرقجي وألله إفتهمت بس ما إفتهنت شنو الملونية ، فعاط الشيخ وصاح ( إبني ربعية مو ملونية ، تريد تهجم بيتنا ) فكلله العرجي شنهي الربعية وشنهو حليب سباع ، ضاج الشيخ وطكت روحه ومد إيدا بعبة وطلع ربعية عرق وصاح ، يعني إلا أكللك مثل هذه إبن النعل وعاف المنبر وشرد ؟
2 : فسالفة ديج أبو ميردي محتاجة مو بس واحد عرقجي يدوخ راسه ، بل أيضا وعذرا للكلمة واحد قحبجي يعرف دماراته وأساساته حتى يعوف المنبر ويشرد ؟
5 - هههههه طلعة حلوة
اسماعيل حمد الجبوري
(
2012 / 4 / 19 - 14:44
)
استاذ سرمد
تذكرني كتاباتك الساخرة بالراحل ابو كاطع. والكتابات الساخرة هي نوع من انواع الفن الاعلامي مثل الكاريكتير ولها وقع وتاثير على القارئ واالمتلقي اكثر من المقالات وهو اسلوب تحريضي ممزوج بالفكاهة والنكتة الساخرة. اتذكر كان الراحل ابو كاطع له عمود يومي في جريدة طريق الشعب اليومية جريدة الحزب الشيوعي العراقي ابان السبعينات وكانت سوالف ابو كاطع لها اصداء على الشارع العراقي مما دعى المجرم طارق عزيز وكان وقتها وزير لاعلام هتلر بغداد بتوجيه انذار للجريدة في وقتها لعدم تحمل النظام لهذه المقالات الساخرة. واتذكر كان الوالد المرحوم مشترك بالجريدة وهو امي لايقرا ولايكتب وهو شيخ عشيرة فكان يستدعي احد ابنائه او احد الجالسين في الديوان ان يقرا له ماكتب الراحل ابو كاطع في هذه الجريدة وتقرا وكان لها صدى قوي على الفلاحين وكان اسلوب ابو كاطع يقترب من لهجة الفلاحين العراقين وكان محبوبا من قبلهم لانه تبنى قضاياهم ودافع عن حقوقهم ولان ابو كاطع هو اصلا فلاح ويعرف كيف يدخل الى عقولهم
تحياتي لك الصديق سرمد ومزيد من عطائك الساخر ث
6 - زعل
حمورابي سعيد
(
2012 / 4 / 19 - 15:58
)
يا ست فؤادة ...كي لا تزعلي ,استبدل كلمة دجاجة ب..ديك مخصي .تحياتي
7 - ردود الاصدقاء
سرمد الجراح
(
2012 / 4 / 19 - 20:35
)
الاخ الكريم نشأت, شكرا لأطراءك ويسرني انك تشبهني بالاستاذ ابو كاطع
تحياتي
الصديق العزيز شامل, شلون ما أشوف بالدوره الانتخابيه الجايه راح يضيفلهن وزير النفط والماليه ووزارة الحور العين والولدان المخلدون بس على عنادك ماكو وزاره الويسكي
تحياتي واشواقي
الاخ العزيز حمورابي, هاي شورطك استلم عزيزي, كلشي ولا تحجي على الدجاج, اصلا ممنوع هنا تحجي على انثى الدينصور وتكول انقرضوا لأن ماتنطي بوسه
تحياتي
الاخت الكريمه فؤاده, والله اني اؤيد كلامك, واشجب واستنكر واندد بالتطاول الذي وقع على دجاج المرجعيه وخصوصا انه دجاج بياض ويجب ان يتمتع بكامل حقوقه في الاجازات السنويه واجازة الحمل, اختنا العزيزه تره دا امزح
تحياتي
الاخ الكريم السندي, يمعود خليها صنطه اهل العمايم لو تبقه وياهم على العرك كان زين بس هذوله مابقت مكسوره بالدنيا ماسووها
تحياتي
الاخ الكريم اسماعيل الجبوري, يسعدني مرورك وتعليقك, واتمنى ان تصل كلماتي الى عقول وقلوب الناس لعلهم يدركون مايجري لبلدهم
تحياتي واحترامي للجميع
8 - اعتراض
يونس حنون
(
2012 / 4 / 20 - 00:09
)
ليش هالشكل عيوني سرمد
في هذا الزمان الاغبر لايحمي الانسان من الموت قهرا الا ان يصبح مثل ابو صابر صافنا ضاربا دالغة لا تهتز شواربه او اذانه حتى لو انقلب عاليها سافلها
لكن ان تجعله في مقالتك بكل هذه الحكمة
فهذه مسالة اصابتنا بالاحباط
ليس لاننا لاسمح الله نتخيل اننا اذكى من الحمير
فالانتخابات تثبت كل مرة ان البعض منا في تفكيرهم واختياراتهم يروحون فدوة للزمال
لكننا على الاقل كنا نمتلك مرجعية نقلدها و تجعلنا بمأمن من التاثيرات السلبية لتشغيل المخ
فكيف سننطيها الطرشة والعمية بعد اليوم رحمة بما تبقى من عقولنا اذا كان قدوتنا في هذا الزمان اصبح يفكر ؟؟؟؟
ينرادلها صفنة ...مو تمام؟
9 - دكتورنا العزيز
سرمد الجراح
(
2012 / 4 / 20 - 07:25
)
دكتورنا العزيز
في البدايه تحياتي وأشواقي وكذلك عتبي بأنك لم تكتب لنا منذ زمن, فنحن مشتاقون لمقالاتك ولسعاتك. همزين اني دا أكتب شئ يحركك ويخليك تكتب تعليق وذلك أضعف الأيمان
عيوني دكتور يونس, حاشاكم أحنه وين والزمايل وين, هم شفت بحياتك زمال يؤذي نفسه أو يلطم او يطبر او يفجر نفسه حتى يقتل الحمير اللي مثله.
أما سالفة أنو أحنه مأجرين عقلنه فارغ مو مفروش, فهاي ما وردت لا على إنس ولاجان, خويه هوه البشر اللي يسأل شلون يروح للمرحاض وشلون ينام ويه مرته!! شنو تترجى منه؟؟ ومره ثانيه هم شفت حاشاكم زمال يسأل هيج أسأله دون مستوى الصرصر
تحياتي
.. كل يوم - لقاء في الفن والثقافة والمجتمع مع الكاتب والمنتج د/
.. الفنان أحمد سلامة: الفنان أشرف عبد الغفور لم يرحل ولكنه باقي
.. إيهاب فهمي: الفنان أشرف عبد الغفور رمز من رموز الفن المصري و
.. كل يوم - د. مدحت العدل يوجه رسالة لـ محمد رمضان.. أين أنت من
.. كل يوم - الناقد الرياضي عصام شلتوت لـ خالد أبو بكر: مجلس إدا
