الحوار المتمدن - موبايل
الموقع الرئيسي


أمه لطامه واحده ذات عمامه خالده

سرمد علي الجراح

2012 / 4 / 26
كتابات ساخرة


خرج علينا أحد نواب البرلمان الأيراني بتصريح مفاده, بأنه يجب أقامة وحده أندماجيه بين إيران والعراق
لا أعرف حقيقة, لماذا إنزعج العراقيون بمختلف طوائفهم واعراقهم من هكذا تصريح
فالذي يجب أن يخاف وينزعج هو الشعب الايراني الشقيق, فوك غضب الله والعمايم على روسهم, ندزلهم هيج سياسيين من عدنه؟
لَكْ هلوْ عيني, هذوله مايدرون شنو السالفه, وداعتكم جماعتنه ينفضون إيران بشهر ويخلوها تجدي من الصومال.
خو خامنئي وره اسبوعين تشوفوه حاط بحضنه نجادي وكاعد بباب الامام الرضا ويصيح لله يامحسنين
أصلا المسأله ماتحتاج كلشي, كلما هناك كم نائب عراقي يكعدون بنص البرلمان الايراني ممثلين عن محافظة عراقستان, وشوفوا شراح يلعبون لعب
أول شي راح يعلموهم الفشار بنص البرلمان, ومن ثم إعطاء دروس في أحدث طرق التزوير,
أما السرقه والأختلاس فهاي يفتحولهم بيها دورات تدريبيه وباختصاصات متعدده مثل إفراغ البنوك بالطرق الرسميه وغير الرسميه, وإنشاء الشركات الوهميه, واطلاق مقاولات لأعادة الأعمار, مثل تبليط الشوارع على سطح القمر, وعمل مجاري مياه ثقيله في المريخ, وإنشاء مترو بين عبادان واستراليا
هاي عدا تنظيم وإدارة العصابات والمافيات وباختصاصات متعدده من القتل والتسليب وإدارة بيوت المتعه الى تهريب النفط والاثار
وكذلك تكوين المليشيات المكبسله بطرفيها الشني والسيعي والمختصه بالذبح الاسلامي الحنيف
أما لو استطعنا نقل محافظ بغداد ونسويه محافظ طهران, فأكيد وره سنتين تاخذ طهران كأس البطوله من بغداد وتصير أجيف مدينه بالعالم
وإذا نقلنا لهم تجربتنا في العمليه السياسيه, وره شهر, كل مراجع حوزة قم المقدسه, يكومون يجرّون ويسكي ساده من الدوخه
ومجلس تشخيص مصلحة النظام تلكاهم يدكون اصبعتين, وشادين وصله ويهزون رگبه
هذا النائب الأيراني أكيد شبع رزاله وطيحو حظه, أكو واحد يجيب عثه ويحطها بنص هدومه؟؟
الله وكيلكم ينزعوكم حتى هدومكم ويبيعوكم انتوا وياهن بسوك الهرج
عمي تره عدنه ناس خلت امريكا تدخل أزمه اقتصاديه ماصارت ولا استوت ولاسامعين بيها عبر التاريخ
أصلا من ورانه لاس فيكاس راح تصير شيوعيه
هدوره علينه إيران, والله العظيم يبيعوها تفصيخ, والبرنامج النووي يكلبوه مصنع بريمزات وفتايل
أخوان تره احنه نتحمل, لأن اخو هدله دخلنه تدريب على طيحان الحظ خمسه وتلاثين سنه, وإلا الشعب الأيراني أذا سمع خطاب واحد لمقتدى, نصهم يصير بيهم شلل!!
لا والنائب الطنان أبو ضحكه جنان, علي شلاه يصرح, بأن تصريح النائب الأيراني, مجازي!!
مجازك يابه شنو؟ اللي نعرفه, من نسمع جملة, يد الله فوق ايديهم, فيد الله هنا مجازا تعني إرادته,
يعني قصدك النائب الأيراني يكول ارادتنا بالوحده متحققه, ترضون ماترضون؟؟
لا والله إحنه مانرضه إلا تصير رسمي وعلى الورق حتى نشعل ابهاتكم
وحتى نتوسل بأميركا من جديد وتجي تحتلنا كلنا سوه





التعليق والتصويت على الموضوع في الموقع الرئيسي


التعليقات

1 - الجمهورية اللطامة العركجية الكبرى
غانم نباتي ( 2012 / 4 / 26 - 19:27 )
الامه لطامة والاب دنبكجي عرك عصرية او زحلاوى او مستكي

2 - حجايات ابن الرافدين
اسماعيل الجبوري ( 2012 / 4 / 26 - 19:49 )
اتذكر كان يبث برنامج من الاذاعة الاسرائيلية ليهودي عراقي واسم البرنامج ابن الرافدين وبعد التعليق على حدث معين وباللهجة العراقية الدارجة ينهي برنامجه الشيق والمثير ويقول اتفضلوا واسمعوا هذه الحجاية٠كان هذا البرنامج مشهور ومعرف لدى اكثرية العراقين وبالذات الفلاحين وكانوا يتداولون حجاياته واحاديثه الشيقة في مجالسهم والتي كانت تدور حول اساليب الحكام العرب وسطوتهم واضطهادهم لشعوبهم .مقالة الصديق الجراح وبالهجة العراقية الدارجة والتي يصعب على غير العراقي فهمها ذكرتني بابن الرافدين وبرنامجه الجذاب والمثير للجدل٠استاذ سرمد امضي بهذا النوع من الادب الساخر لفضح هذه المهازل الجارية في العراق ولكن لاتنسى ترى شعبنا انتخبهم ودعه يدفع ثمن اختياره الخاطئ حتى يتعلموا من ينتخبون مستقبلا
تحياتي

3 - حلوه
عدنان عباس ( 2012 / 4 / 26 - 21:09 )
لك باع كبير سيدي بعمل تحف رائعه باللهجه العراقيه
عشت

4 - خشنه
حمورابي سعيد ( 2012 / 4 / 27 - 08:35 )
خوية سرمد ..بالاضافة الى ما اتفضلت ,تره ماك تدى زلمه خشنه واول ما راح يسويه هو يكعد خامنئي ونجادي كدامه عل كاع مثل الزعاطيط ويثرم براسهم بصل وبعدين يامر باطالة اللحى .تحياتي

5 - خويه سرمد
محمد الرديني ( 2012 / 4 / 28 - 05:42 )
تحية ود
كعادتك كنت ساحرا
ولكنك نسيت ان المطابع الايرانية والعراقية تستعد الان لاصدار آخر المجلدات عن انواع المستكي والزحلاوي المندثر وانواع المزات العراقية التي ستطوف انحاء ايران وقيل ان احد فروع الالمسيح الجديد هم السرمهر سيتغير اسمه الة خرم شهر لمؤلفه الحاج الشهربازي بن الاشقنحي ابن ابيه
تحياتي لك ولكن بشكل مجازي

6 - رفض اتهام العراقيين
ام احمد ( 2012 / 4 / 30 - 09:07 )
الاخ سرمد تعليقك يجوز يونس لنه اسلوبه ساخر ولكن هو منو اللي هجم العراق ومنو اللي درب وامر النواب سرقة ومنو ربى المالكي والصدر وغيره ومنو ومنو ومنو ؟؟؟؟؟؟ اللي خلى كل فاسد يتقن الفساد غير ايران بعدين اهل العمايم همة اصلا عركجية اصليين منين جابو فتاويهم بالصلاة اذا صلوا (لان معظمهم ايات في ايران ومعفيين من الصلاة) والخمور مع الوجبات فماكو داعي كل سوء نلزكه بالعراقيين لان اصلا كلنا نعرف لو اللي لازمين سدة الحكم ومن كل المواقع عراقيي الانتماء والاصل ما كان ظهرت عدنا هالظاهر السلبية الخزي

اخر الافلام

.. المخرج الاردني أمجد الرشيد من مهرجان مالمو فيلم إن شاء الله

.. الفنان الجزائري محمد بورويسة يعرض أعماله في قصر طوكيو بباريس



.. الاخوة الغيلان في ضيافة برنامج كافيه شو بمناسبة جولتهم الفني

.. مهندس معماري واستاذ مادة الفيزياء يحترف الغناء




.. صباح العربية | منها اللغة العربية.. تعرف على أصعب اللغات في