الحوار المتمدن - موبايل
الموقع الرئيسي


مستقبل التُنْگه گِحف

سرمد علي الجراح

2013 / 1 / 11
كتابات ساخرة


العراق العظيم في هرج ومرق ومرج, والمواطن الغبي مثلي كاعد يفر بأذنه ومايدري وين يروح ولا وين ينطي وجهه؟؟
وصايره الشغله مثل ماكال المتنبي: وسوى الروم خلف ظهرك روم فعلى اي جانبيك تميل
يعني تصير ويه المتضاهرين يكولون عليك سلفي بعثي, تصير ويه الحكومه يكولون عليك ايراني صفوي!!
ماشاء الله بعد اكثر من 1400 سنه, تطور الفكر الاسلامي ووصل الى ان شرب بول البعير اعجاز علمي, وان اللطم وضرب القامه هف الحياة والسبب الذي خلق الله من اجله الأنسان
نرجع لمصيبتنا
الأخوان بالأنبار طالعين يحتجون على حكومه طائفيه, بمطالب وشعارات طائفيه!! وبتوقيت ماكو احسن منه
فبعد ان كان المالكي منتهي سياسيا, أجت هاي المظاهرات بشعاراتها كحبل انقاذ لمستقبله السياسي. ولو بيده كان راح باس ايدين المتضاهرين واحد واحد على هل طلعه الحلوة
هيج شعب يستاهل هيج حكومه, وللعلم حتى إذا سقطت (بالمشمش), فاللي راح تجي, أكيد ولازم ومن كل ولابد وبالضروره والحسين والعباس وعبد القادر وداعت العزيزه حسنه الدوري, تجي بدلها حكومه, أحط وأوسخ وأتفه وأجهل وأجيف وأنتن وأبلد وأغبى وأمر وأقسى وأكذب وأنكس وأقذر وأفسد وأطغى
وأننا لفي مبغى, متفق عليه!!
هيج استنتاج ماجاي عن عبث, وإنما عن قراءه خلدونيه بسيط هي, ان الدجاجه تخلف دجاجه والمطي يخلف مطي
وهيج شعب غبي وعنصري وطائفي واحمق لابد ان تنولد حكومته مثله, بل ياريت مثله, ففي مثل هكذا حالات سيبرز لها ويتلاقفها الأسقط والأوطأ والأخس ليفوز بها
بس تبقى اكو اشياء تحير العقل وتخلي الواحد يشك بغباءه!! معقوله اني صرت مثلهم ماافتهم, يعني اللي نظم المضاهرات معقوله مايدرك ان الطريق لأسقاط حكومه فاسده هو ان تنادي بالأصلاح والوحده والوطنيه وابعاد الطائفه والدين عن السياسه, مو بالعكس!!
معقوله مايدركون ان هل حكومه مايهمها لو اعتصمتوا الف تالاف سنه, وخصوصا اذا كنتوا وحدكم وباقي العراقيين تاركيكم؟؟ حذرا وخوفا من هكذا شعارات؟؟
معقوله مايدركرون ان قاعدة هاي الحكومه ومركز ثقلها هو الطائفيه
الحكومه ماتهتم لمطالبكم مو لأن طائفيه, ببساطه لأن لاتحل ولاتربط. ولأن حتى لو رادت تهتم, فمتعرف شتسوي!! هذا عدا انو عدهم اولويات كلش مهمه, مثل مكافحة النزاهه والقضاء على الامانه والاخلاص, وكنز الدولار واليورو, لأن يكولون الله بالجنه كام يحاسب على المشروب والحور العين!! والباقي اوبن بوفيه !!
أكول شي أخوان بس لاتكولون سرمد تخبل, كلما اصفن, اشوف محد استفاد من هل الأحتجاجات غير المالكي اغا !!
شلون ما اشوف يمكن هو اللي منظمها ؟؟


التُنْگه بظم التاء وتسكين النون هي مشربة الفخار التي كانت تستعمل لحفظ الماء وتبريده
گِحف احد شضايا التُنْگه بعد ان تتكسر





التعليق والتصويت على الموضوع في الموقع الرئيسي


التعليقات

1 - جاجيك
سمير فريد ( 2013 / 1 / 11 - 20:37 )
العزيز سرمد

تحية

وشويه اْندوس ميانه كل الاْطراف العلوية والسلفية ...العفو ..السفلية مستفبده من الطائفية وماعده غير هل ورقة ولووكعت هل ورقه من كدام راح يطلع ماكو شي ولو وكعت من وره الله الستار وراح يطلع عشرة الالاف سعدي الحلي الله يرحمه ..خلي نتصور ماكو طائفية بيش راح الربع يحجون ..تخطيط مشاريع لو بناء معامل لو تقدم طبي لو غزو الفضاء لو يحجون بس بالنفط وكيفية تهريب النفط والفط الدولار لفط ..وروح ابونه ادم كلهم موقعين للعم سام ولتنسه تره هاي مو سبة ولا عيب جا هو سام مو من ادم ...عيني سرمد خلينه بقهرنه وراح ادز على ماعونين جاجيك والبقية عليك

تحياتي ومحبتي للجميع

2 - الاخ سرمد الجراح: لو عرف السبب بطل العجب
مالوم ابو رغيف ( 2013 / 1 / 11 - 22:51 )
الاخ العزيز سرمد الجراح

والسبب يا عزيزي لخروج هذه المظاهرات على ما اعتقد هو :ـ
ان الدلائل والاعترافات على تورط العيساوي بالارهاب لا تقبل الشك، فالرجل كان مرتبطا بتنظيم حماس العراق الارهابي وفي زمن القتل الطائفي وسيطرة القاعدة على الفلوجة كان طبيبا في المستشفى الذي استخدم من رجال القاعدة لعلاج جرحى تنظيم القاعدة، لذلك لا بد من هذه ضجة التظاهر وطائفية الهتافات لاعطاء الانطباع ان التهم الموجهه له هي ضمن حرب طائفية شاملة
والثاني ان الاصرار على المطالبة بالغاء 4 ارهاب هو لاسقاط احكام الاعدام عن طارق الهاشمي الذي ادين وفقها، فهي تقول ان الممول والمخطط والمضيف يعاقب بنفس عقوبة المنفذ، وكما نعرف ان طارق الهاشمي لم يقتل بيده انما كان يعطي اوامر القتل ويمول العمليات، ولا يمكن الغاء هذه المادة بدون ضجة طائفية
لكن وكما ترى ان زخم التظاهر ليس بذلك الاتساع ولا قوة الزخم لذلك اتجه اهل العمائم المصلاويين الذين يقودون التظاهرات الى اثارة حماس الرجال بتعيرهم بان الرجل الذي لا ياتي للتظاهر المرأة افضل منه.كذلك استخدموا شعار انتهاك شرف النساء كتحريض واضح لاثارة غيرة الرجال
كذلك هم يهتمون بجمهورهم وبس

3 - قلت ما في قلوبنا
وسام يوسف ( 2013 / 1 / 11 - 23:57 )
وفوك القهر ياتي كاتب كنا نعتبره محترما مثل عبدالخالق حسين وهو طبيب بلا حسد يعيش في انكلترة ويقبض بالباون ليكتب لنا وهو اليساري 10 مقالات يثرم فيها بصل برؤوس الشعب ويندد بمن يطالب المالكي بالاستقالة ويتهمه انه من الطغمة البعثية لان المالكي اتت به الديمقراطية لاخوش تنكة
تخيل
يعني الذي طلعت روحه بسبب قوائم المولدة وانعدام الوطنية بنوعيها الاخلاقي والكهربائي هم بس البعثية
ومن كفر بالحكومة لان بيته غرق بسبب الامطار اكيد صدامي حقير
والذي لعبت نفسه من اضطراره لدفع رشوة حتى لو اراد ان يستعمل مرافق صحية في مكان عام فهو بما لايقبل الشك عفلقي قومجي
هذا هو المنطق السائد
فلا عاب فمك اخي سرمد على وصفك

4 - روعة ياسرمد
يونس حنون ( 2013 / 1 / 12 - 07:22 )
شأريد اكولك ياسرمد الورد
المفروض مقالتك تصير افتتاحية بكل جريدة عراقية ويقراها كل عراقي بلكت تتفتح الادمغة المعفنة
المالكي عضو في حزب طائفي ولهذا وصل الى رئاسة الوزراء
وبدلا من اسقاطه بسبب فساده وفساد وزارته وفشله الذريع حولوها الى عركة شيعة وسنة
وطبعا سيلتف الشيعة الذين لم يستفيدوا من هذه الحكومة حتى بشعرة حوله فقط لكي لاتروح للسنة
وسنبقى هكذا حتى يرث الله الارض وماعليها
ما الومك على كل الاوصاف اللي وصفت بيها الشعب
وخلي ياكلون مازال المالكي طيب

اخر الافلام

.. مهندس معماري واستاذ مادة الفيزياء يحترف الغناء


.. صباح العربية | منها اللغة العربية.. تعرف على أصعب اللغات في




.. كل يوم - لقاء في الفن والثقافة والمجتمع مع الكاتب والمنتج د/

.. الفنان أحمد سلامة: الفنان أشرف عبد الغفور لم يرحل ولكنه باقي



.. إيهاب فهمي: الفنان أشرف عبد الغفور رمز من رموز الفن المصري و