الحوار المتمدن - موبايل
الموقع الرئيسي


إللي تلدغه الحية بيده يخاف من جرة الحبل

حبيب العربنجي

2013 / 1 / 12
كتابات ساخرة


يابة طلع كل إللي يحكمونا خطية ما عاشوا طفولة سعيدة ومليانين عقد، وحتى إبن صبحة ما دمرتنا غير عقدته من طفولة بائسة، وهسة إللي إجوا وشالوا أبن صبحة بكرين أميركي في ساحة الفردوس همين عايشين طفولة بائسة وحقيرة إلى درجة أنهم كلهم چانوا يخسرون لعبة (الحية والدرج) وما ناسين هاي اللعبة بعد ما صاروا وزراء ورؤساء ونواب ونوام. أي واحد بيهم ينحصر حصرة الچلب بالجامع رأساً يگول عوفوني ترى راح نرجع للمربع الأول ، لأن أكو حية راح تاكلنا وما تخلينا نوصل لآخر مربع في لوحة الحية والدرج.
ما كرهت أحد من المخترعين مثل ما أكره هسة مصمم ومخترع لعبة (الحية والدرج)، لأن هاي اللعبة صارت لعبة سياسية وإستحضار طفولة بائسة عاشها رئيس أو وزير، لو مو هاي اللعبة لا چان عدنا المربع الاول ولا أي تهديد من العودة إلى المربع الاول، لأن طلعت لعبة (الحية والدرج) هي أساس مشكلة عقدة الطفولة وغياب الدلال بمرحلة الطفولة ، هذا الدلال المهم للمستقبل، شاب قوي غير معقد، يقبل الآخر مو يباوع عليه على أساس لاعب يريد يزاغل عليه ويرجعه للمربع الأول.
وآني أتذكر إن أول لعبة چان يتعلمها الطفل العراقي ايام زمان قبل إنتشار لعبة الرمانات والهاونات چانت لعبة الحية والدرج إللي چانت تنباع بخمسة وسبعين فلس في العطلة الصيفية وستين فلس بعطلة نصف السنة، والعوائل الفقيرة چان الأب هو إللي يگعد يلون كارتونة مربعة ويسويها لعبة الحية والدرج، الكارتونة بخمسطعش فلس والپاستيل أبو ثمان أقلام بعشرين فلس. چنا نگعد ونشترط شروط اللعبة، نلعبها بزار لو بزراين، إذا پولين على نفس المربع يصير لو لازم واحد بيهم يرجع للمربع الأول، وإذا واحد يوصل للمربع 98 لازم ينتظر 2 بالزار يللا يفوز لو مو شرط، أي رقم أكثر من أثنين مقبول، هيچ چنا متقدمين في فرض شروط اللعبة السياسية...العفو لعبة الحية والدرج على اللاعب المقابل.
وبعدني أتذكر چانت أكو حية برتقالية كلش خبيثة في المربع 98 يرجع الواحد إلى المربع 23، وحية بنفسجية ناسي بيا مربع چانت ترجعنا إلى المربع الاول، لأن چانت ضد العملية السياسية ومن أيتام النظام السابق وما چانت تريدنا نوصل للمربع الآخير.وللتاريخ، چانت هاي الحية تشبه رفيق حزبي ما أهتز شواربه فأضطر إلى حلق الشوارب تماشياً مع التغيير الديمقراطي الأميركي.
وعلم النفس يگول أن مشاكل الطفولة تطلع عنف في المستقبل، وإللي ما ناسي لحد هسة خسارته بلعبة الحية والدرج أكيد يصير قنبلة عنف عنقودية إنشطارية متسلسلة من تنفجر هاي القنبلة، بعد ما أحد يگدر يوقف التفاعل المتسلسل.
شوفوا أي واحد يطلع ويگول المربع الاول، وروحوا أقروا عن طفولته، تشوفون طفولة مليانة قهر، ماما تطلع الصبح فرحانة وترجع الظهر وتگلب البيت على راس الاطفال لأن الباميا محروگة، وخالو يجي يطلب فلوس من ماما من بابا رايح للگهوة وإذا ماكو فلوس يشبع ماما ضرب وشتايم، وبابا يجي ويسأل عن نعال أبو الأصبع مالته وإذا ماكو يشبع ماما كتل بالنعال اللاستيك، وفوگ كل هذا الأخ الچبير چان مشبعهم كتل وزغل ويخليهم يوگفون عد الحية البنفسجية حتى يرجعون للمربع الأول، وبالتعاون مع دول الجوار...أقصد أبن الجيران لأن الأخ الچبير چان يلعب على بنت الجيران ولازم يتلوگ له على حساب نزاهة اللعبة السياسية....اهوووووووو...همين العفو أقصد لعبة الحية والدرج.
أبو الأزلام ضيعنا بعقدة بابا وبعقدة صبحة إللي رفضت تجيب الصينية حتى بعد ما غنت موفق بهجت (يا صبحة هاتي الصينية)، وهذولة راح يضيعونا بعقدة طفولة مليانة خسارات بلعبة الحية والدرج إلى درجة صار الرأي الآخر يمثل الخسارة بالنسبة إلهم، ويمثل إسترجاع كل ذاك التاريخ المليء بالقهر، والحية البنفسجية والعودة إلى المربع الأول، وفوگاها، راح ياخذون زار ولوحة اللعبة ويباوعون علينا ويگولون " بعد ما ننطيها".





التعليق والتصويت على الموضوع في الموقع الرئيسي


اخر الافلام

.. الفنان الجزائري محمد بورويسة يعرض أعماله في قصر طوكيو بباريس

.. الاخوة الغيلان في ضيافة برنامج كافيه شو بمناسبة جولتهم الفني



.. مهندس معماري واستاذ مادة الفيزياء يحترف الغناء


.. صباح العربية | منها اللغة العربية.. تعرف على أصعب اللغات في




.. كل يوم - لقاء في الفن والثقافة والمجتمع مع الكاتب والمنتج د/