الحوار المتمدن - موبايل
الموقع الرئيسي


عذابات إضطرابات خيبات

حبيب العربنجي

2013 / 9 / 26
كتابات ساخرة


بالزمانات، كنا نسمع (بات) بشغلتين، مرة بكل رمضان بلعبة المحيبس، ومرة عد الطبيب الفاشل من يحير شنو الموضوع وشنو المرض وليش الوجه منفوخ فيگول : لو حالة نفسية لو إلتهابات ! بغير هاي ما چانت عدنا علاقة وي الباتات...لا إضطرابات ولا إنتخابات ولا تسريبات...عافاكم الله وإيانا من تسريبات سياسية وجسمانية !
بس بعد الترويج الدعائي لبرنامج (نصيبك مع الديمقراطية) العالمي ، صرنا نسمع هذا المقطع كلش هواية...إنتخابات إنتخابات ، وصرنا حتى نشوف هذا المقطع شوفة العين في طبطبات سياسية قبل الإنتخابات وبعد الإنتخابات.. وصرنا نحس هذا المقطع في متلازمة ثلاثية سببها طفرة وراثية ديمقراطية حيرت العلماء وهي عذابات إضطرابات خيبات !
وهاي المتلازمة المرضية تسبب حالات هلوسة ثنائية، عد الناخب وعند إللي مرشح نفسه للإنتخابات، فالناخب حاشاكم وأبعدكم عن هذه الصفة القبيحة يدخل في هلوسة تصرفات غريبة، واحيانا يكون الناخب راديو متنقل ينشحن ذاتياً حين التوريق ، راديو بموجة إف إم وحدة ما تتغير..بالبيت والشارع وحتى من يروح لبيت الخلاء ما يسكت، يخاف من يسكت يضيع الموجة، ويضيع هو وي ترددات الموجة الإنتخابية ...خو عد الناخبة لا تحچيها...كل يومين مسوية گعدة لف الدولمة وتعالوا يا صويحبات يوسف ...وتگوم وي كل لف تحلف براس فلانة لو فلان...هم خلاص البلد...وهم الصراط المستقيم...مَن زلّ عنه مثواه جهنم وبئس المصير...وجهنم هنا تجي بمعاني كثيرة تبدي من الخطف ...وما تخلص عد الإسكات بكاتم الصوت والصورة !
وهلوسة عد إللي يرشح نفسه للفوز بثواب الإنتخابات.. مثلاً يحلف بالعباس وهو الملحد الجسور أو وحدة تگوم تلبس چادر بيتنجاني وهو إللي چانت عالمودة ونص قريبة من موجة سامحني يا بابا قبل مشاهدتها لبرنامج (نصيبك مع الديمقراطية)، أو وحدة ملاية تگوم بقدرة التمويل الإنتخابي تصير (الناشطة الإجتماعية) وهاي الكلمة هي التعبير السياسي للملاية إللي هي نشيطة جدا في المناسبات الإجتماعية وحضور مجالس العزاء...او واحد مساعد مضمد (يعني يمسح الجرح قبل ما يجي المضمد ) ويصير الوحيد القادر على تضميد جراحات الشعب والوطن...لانه عنده خبرة بالتضميد عالريحة !
وبسبب هاي الهلوسة...تبدي عذابات الشعب، وين يروح؟ لأن البوصلة تفقد التركيز، والمجال المغناطيسي عالي خاصة المغناطيس المالي والهدايا والوعود والشعارات، عذابات تهدد حياته ورزقه إذا ما نطى صوته لهذا أو ذاك..عذابات شوفة چهرة واحد مفروض عليه شوفته كل يوم من يطلع للبيت ومن يرجع للبيت، فوگ قهر شوفة چهرة أم فلان بالبيت تعال شوف چهرة أبو فلان ملزوگة بپوستر إنتخابي عبالك كابتن نادي برشلونة يبتسم بكل فخر وإعتزاز وإبتسامة نصر موعود بالإنتخابات ..طبعاً بعد تبييض أسنانه القذرة بفلوس الحزب إللي تدعمه...وتبييض تاريخه القذر بقدرة.."عفا الله عما سلف"! هاي العذابات تبدي قبل الإنتخابات بستة أشهر وما تخلص بعد الإنتخابات أبد...في حالة الفوز والخسارة...وحتى التعادل والتوافق السياسي !
ثم تبدي مرحلة الإضطرابات...سياسية وإجتماعية ....أمنية وإقتصادية ..إضطراب سياسي من بوس اكتاف وبوس ما أعرف شنو...ومسح وجوه من اثار غزوة فموية ثخينة ثم رذاذ منتشر ! وإضطراب إجتماعي سببه شاف ما شاف شاف منصب وجواز دبلوماسي وتهستر ! وإضطراب أمني سببه شيلني وأشيلك لو تفخخني وأفخخك....اختر ما يناسبك وأختر ما يناسبك من موديلات القتل...مفخخة..لاصقة...حزام ناسف...إنتحاري منغولي...أنتخاري مكبسل..إنتحاري عنده كبت جنسي..لو عبوة زاحفة تندل طريقها مكوّكة عالهدف ! وإضطراب إقتصادي..سوگ صاعد وسوگ نازل بسبب التمويل (الذاتي) للحزب الحاكم في البلد لحملته الإنتخابية من أموال أعضائه ألله وكيلك لا قناة حكومية ولا جريدة حكومية ولا ميزانية حكومية ...حرررررررام!
ثم مرحلة الخيبات وهي أطول المراحل...تبدي وما تخلص...تاتو على گصة كل ناخب ما يعرف شلون وإلمن وليش إنتخب فلان ومو فلان..ويا ريت لو تاتو بيه شوفة لو حلو..طمبغة خيبة ما تروح...يگوم وي كل مراجعة لدائرة حكومية فاشلة يخلي إيده على گصته يتحسس خيباته ويلعن نفسه والديمقراطية لأن إنتخب فلان لو فلانة...لو وي كل خبر عاجل يزف البشرى لو يزف (المجاهد) إلى الحورية يخلي إيده على گصته ويگول ...شلون نودي هدية لهذا العريس الدموي...صدگ خيباتنا خيبااااااااااااات !
وهاي المتلازمة المرضية تسبب إلتهابات مؤلمة ...إلتهابات في النسيج المجتمعي وعلاقة مشجعي نادي ريال مدريد بمشجعي نادي برشلونة ومشجعي نادي الحزب الفلاني بمشجعي نادي الحزب العلاني..إلتهابات في الجهاز العصبي وهي إلتهابات نادرة تسبب حالة عصبية وتشنج حواري وعدم قبول دخول الآخر حتى لو بالكرتة...وإلتهابات في الجهاز الهضمي تسبب عدم قدرة هضم الآخر وبلعه حتى لو بكرتونة أينو لو نص گونية نومي بصرة !
والله يرحم أيام المحيبس...من چنا نصيح بااااااااااات...نسمع وراها أغاني وصفگة..مو مثل هسة...من نسمع بااااااااات...نگول راح تبدي عذابات إضطرابات خيبات !





التعليق والتصويت على الموضوع في الموقع الرئيسي


اخر الافلام

.. تكريم إلهام شاهين في مهرجان هوليود للفيلم العربي


.. رسميًا.. طرح فيلم السرب فى دور العرض يوم 1 مايو المقبل




.. كل الزوايا - -شرق 12- فيلم مصري يشارك في مسابقة أسبوع المخرج

.. الفيلم اللبنانى المصرى أرزة يشارك فى مهرجان ترايبيكا السينما



.. حلقة #زمن لهذا الأسبوع مليئة بالحكايات والمواضيع المهمة مع ا