الحوار المتمدن - موبايل
الموقع الرئيسي


بين الملكيه والمالكيه

سرمد علي الجراح

2013 / 12 / 16
كتابات ساخرة


خمسه وخمسون عاما انقضت, منذ تحول العراق من النظام الملكي الى اللا نظام!! والمسمى بالجمهوري, نسبة الى الجماهير!! أي الشعب!! أو بمعنى أصح المغفلين والقشامر واللطامه
لاتحتاج الامور الى فيلسوف أو عالم اجتماع أو محلل ستراتيجي, ليخبرنا بأن نتيجة جهودنا الجباره وتضحياتنا الهائله بالدماء والاموال في بناء جمهورية العراق, تمخضت بعد خمسه وخمسين عاما, عن مزبله وخرابه فكريه وحضاريه وانسانيه, بكل ماتعنيه كلمة مزبله حرفيا ومجازيا من معنى!!!
ان دل هذا على شئ (أحب هيج مصطلحات عاويه) فأنما يدل على اننا أمه فحطانه, بمعنى اننا لانملك القدره والوعي والادراك وحتى النيه (اذا توفرت) على مجرد معرفة الاتجاه الصحيح للبناء والتطور نحو الاحسن
يعني مو بس ما نعرف شلون نتطور ونعيش مثل الاوادم!! لا, تره مانعرف حتى وين الدرب للتطور ويا باص نركبله؟؟ ولا عدنه أي فكره شلون نسأل عن الدرب ومنو نسأله وليش؟؟
هسه واحد يطلعلي ويگلي الخطأ مو بالنظريه الخطأ بالتطبيررر!!! على اساس أكو نظريه وبيها متساوي الساقين وزاويه منفرجه!!
ياجماعه لازم نعترف انو عقلنا على گد الاكل والشرب والنكاح واللطم بس!! هاي عامة الشعب, أما المثقفين سوده عليه, فنقاشاتهم كلش فگريه (بظم الفاء) مثل النقاش حول أحقية الخلافه بين أنكيدو وگلگامش, وزواج المتعه حلال لو حلال ونص؟؟ لو المالكي ماينطيها لو يجي ربكم, لو الحجاب زوجي لو فرضي؟؟ لو بالانتخابات الجايه منو يحصل اغلبيه, خامنئي لو قناة الجزيره؟؟ وأذا حمى وطيسهم فيكون النقاش هل كان الامام علي ماركسي وان لم ينتمي؟؟
يعني نقاشات مصيريه ومحوريه ولولبيه ولبلبيه جدا!!
شوفوا مثال على حالة الضياع التي نتمتع بها: في خبر نشر على صفحات الجرائد وفي مواقع الانترنت الاخباريه, ان احد ابناء تيار (دفي صدرك تره بردت كلش), يسأل, أكبر مداس في التيار, عما اذا تلقى رساله من المرشد الاعلى للثوره الاسلاميه في الشرق الاوسخ, توصي بمؤازره ومساندة أخو أخيته الرفيق الحاج أبو الاسراء والمكلاش, لولايه ثالثه؟؟؟
طبعا يجيب السيد بكل صراحه ووضوح, وكما عهدنا منه الفصاحه في وجهه الصبوح: ماكو هيج رگه تلعب شناو!!!
زين مايگله, شلون تسأل هيج سؤال هي غبي, أحنه تره مو بكيف خامنئي!! أحنه بكيف قاسمي يامطي!!
يعني بشرفكم منين واحد يبدي يسب ويشتم؟؟ حتى گلبه يرتاح!! هيج وصلت, الناس تعرف ومامهتمه؟؟ لا وبعد يسألون؟؟ انو خامنئي هو اللي يعين رئيس وزراء المهجومه مالتنه؟؟ علني؟؟؟ كلش ولا شويه مستحى ولا خجل ولا قطرة شرف؟؟
ماأدري ياهو اللي احقر وانتن واسقط, اللي يسأل لو اللي يجاوب؟؟ يعني منو أجيف الشعب لو القياده؟؟ هاي ينرادلها نزاح طهاير حتى يفتيلنا بيها!!!
هسه نعرف انتوا ناس ماتسوون القندره اللي تلبسوها, بس شويه خلوا عدكم ذره من أخلاق, يعني خلوها سنطه وبلا فضايح!!
أخونا أبو الاسراء والمعلاگ, مامجذب خبر, گاعد يتوسل ومامخلي مداس بقم ماباسه, وحتى تصالح ويه القاعده وگام يطلع المساجين مالتهم بالجمله من السجون!! أي خطيه ميصير احنه والامريكان عليهم؟؟ يطلعهم من صفحه ويسوي صوله البعران من صفحه!! حتى يگول شوفوا اني شلون رجل (بكسرالجيم) المهام المستحيله!! هازبند أوف امبوسبل مشنز!!!
بس شوفوا شلون سبع وگدها, رأسا وره ماانقتل كم ايراني بعمليه ارهابيه, اتصل بروحاني وطمنه وگله, مولاي تره سامحني كتلناهم بالغلط!! وشرف أمك عبالي بس عراقيين بالباص!!!
يعني همين يقصد أخونا النظريه صح بس التطبيررر غلط!!
أرجع واگول العراقيين بزمن الملكيه كانوا يعتبرون المرحوم نوري السعيد عميل بريطاني, بينما بريطانيا كانت تعتبره حليف وتسمع له وتستأنس برأيه
واليوم يعتبرون المالكيه وعمالتها وفسادها, حكم الشعب!! تره ياشباب كلش تسوه ناخذ داس لطم على هل الحاله!!
مااوصيكم اخوتي, انتخبوا خامنئي علني, من رحتوا فدوه لكل مط....الله خلقه وراح يخلقه!!!





التعليق والتصويت على الموضوع في الموقع الرئيسي


التعليقات

1 - الى من يدافعون عن المالكي
وسام يوسف ( 2013 / 12 / 17 - 15:15 )
اول تعليق على المقالة من تعليقات الفيسبوك من احد الذين يريدون ان يبرأوا المالكي ويلقون التبعة على صدام المقبور رغم مرورعشر سنوات على ادخاله حفرة الجرذان
يعتبر المالكي ليس له ذنب!؟
عمي هذا سياسي قرقوز عميل سافل قذر منحط طائفي لا يختلف ذرة واحدة عن صدام
بوجود هذا السافل الايراني فاننا لن ننصلح لا بعد مائة ولا الف عام
و اول اسباب تخلفنا هي مواكب اللطم والتطبير والزيارات التي لاتنقطع طوال العام
فهل هذه اتى بها صدام ؟
يعني شوية خجل مولانا
وعاش قلمك ياسرمد

2 - الاخ وسام
سرمد الجراح ( 2013 / 12 / 17 - 16:58 )
سيدي العزيز, ذكرت في المقاله اننا لانعرف حتى اين هو طريق الاصلاح والتطور, الزمره السياسيه المتسلطه ليس لديها الخبره او الامكانيه او حتى النيه في اصلاح حقيقي. وهذا واضح جدا من تصرفاتهم وجهدهم على مدى العشر سنوات الماضيه. ولاتوجد قياده وطنيه حقيقيه ولاتوجد معارضه بمعنى المعارضه في الديمقراطيات. الخلاصه ظلمه ودليلها هليجي. تحياتي

3 - رائع كالعادة
يونس حنون ( 2013 / 12 / 18 - 22:46 )

ولله يا سرمد موتتني من الضحك ومن القهر ايضا
المأساة ان هذا الشعب لايريد ان يصحو من غيبوبته ابدا
فهنيئا لابو الاسراء والمعلاك

4 - دكتورتا العزيز
سرمد الجراح ( 2013 / 12 / 19 - 00:03 )
في اخطر تصريح له هذا اليوم يقول رئيس وزرائنا المفدى: الذين استهدفوا زوار اربعينية الإمام الحسين (ع) سيكتوون بنار جهلهم بتاريخه. انتهى
يعني واحد شيكول ؟؟ هذا رئيس وزراء لو روزخون, همزين ما كال, الله لاينطيكم, وهسه العباس يشور بيكم!! واذا ماتجوزن أكول لأمي!!
تحياتي واشواقي

اخر الافلام

.. نهال عنبر ترد على شائعة اعتزالها الفن: سأظل فى التمثيل لآخر


.. أول ظهور للفنان أحمد عبد العزيز مع شاب ذوى الهمم صاحب واقعة




.. منهم رانيا يوسف وناهد السباعي.. أفلام من قلب غزة تُبــ ــكي


.. اومرحبا يعيد إحياء الموروث الموسيقي الصحراوي بحلة معاصرة




.. فيلم -شقو- بطولة عمرو يوسف يحصد 916 ألف جنيه آخر ليلة عرض با