الحوار المتمدن - موبايل
الموقع الرئيسي


والله الموفج

حبيب العربنجي

2014 / 8 / 15
كتابات ساخرة


يا رب والله أحبك بس أنت گالب وجهك وخلگك ضيگ وياي..المهم هسة مو هذا موضوعنا...الموضوع هو عندي دعاء زغير بلكن تمشيه وتخلي جماعتك عد العرش يخلون عليه طابع وما ينيّمون الدعاء بالوارد وينسي هناك أربع سنوات...راح تسألني ليش أربع سنوات وأجاوبك وأگول: مو هي هاي مدة إكسپاير لدعاء العراقي.
الدعاء يارب هو نريد حيدوري يعرف يلعب حية ودرج مو يطلع دثو كل شي ما يعرف بهاي اللعبة مثل صاحبنا أبو إسراء ( صدگ حيدوري أبو من بلا زحمة ) ، ثمان سنوات وما گدر يطلعنا من المربع الأول...خطية من چان زغير گضى عمره يتابع برنامج الأرقام من هاي إجانا وراح وهو بس يذكر أرقام عبالك بالع دليل تلفون أيام زمان قبل الموبايل...كانت العوائل تتباهى أكو عدهم دليل بالبيت ويخلونه جوة فوگ الميز بالصالون حتى ياهو يجي يشوفوه...آيباااااااااااااخ هذولة عدهم دليل ... صدگ كشخة.
يا رب...نريد حيدوري يعرف وين يصعد بالدرج ووين أكو حية تطيح حظنا، نريده مو يشمر الزار برة اللعبة وتعال روح دور عالزار وين شمره تالي يطلع واحد من دول الجوار ضام الزار بجيبه. ما نريد هيج وداعة الغالي عندك...ترى اللعبة صارت ماصخة ومملة...ممكن تشوف إلنا لعبة MAINCRAFT بالآيپاد يعني أشوية تغيير ! وإذا لا وحضرتك مصر إلا لعبة حي ودرج وي العراقيين فهمين خلينا أشوية نتدلل عليك بجاه مولانا الخليفة وجاه الدواعش إللي مفضلهم على كل عبادك، ومن هالدلال نريد كل الوزراء إللي يجون وي حيدوري يعرفون لعبة حية ودرج...يعني تدخلهم عندك دورة وياخذون كورس..شوف بأي چايخانة بالجنة وخلي مدرب رسمي يدربهم...إحنا چايخانات إللي عدنا ملتهية بالأزنيف...وما عدنا مدرب أرضي يدربهم... أو تدز إلهم وحي...ليش لا لأن صار له ما أعارف كم سنة ما عنده شغل..فيا رب قبل ما يصيرون وزراء بلكن وحي إلهي ينزل إلهم بالحلم ويعلمهم شلون حية ودرج...شي يصير يعني...شي يصير لو العراقي خلال أول شهر وي حيدوري يطلع من المربع الأول...خو مو كفر ! وإذا كفر گول... لا تخلينيا ما نعرف شنو السالفة والموضوع...مو من جوة جوة تحفر إلنا وإحنا عبالنا خوش عباد أضبط من داعش...تالي طلعت كل ضرباتنا آوت وإحنا خابصين الدنيا نهوس گووووووووووووووووول !
نريد أي وزير يجي عنده شهادة تثبت هو ماخذ كورس حية ودرج ولاعب مرخص بهاي اللعبة..Certified Snake and Ladder Player ...وخلي بالإجتماع الأسبوعي لمجلس الوزراء...حيدوري يلعب حية ودرج وي كل وزير حتى يعرف إمكانيات الوزير إللي عنده...شلون يطلع من المربع الأول...وخلي تصير عدنا حملة وطنية شاملة للعبة حية ودرج...قناة العراقية خليها تبث قوانين وأسرار لعبة حية ودرج وأهم اللواعيب في تاريخ هاي اللعبة الذكية، وخلي خطباء الجوامع والحسينيات وخالد الملا والصافي والقبانجي كلهم يذكرون محاسن هذه اللعبة في خطب الجمعة ويجيبون أحاديث وشواهد أن هذه اللعبة مو حرام وأن لاعبها في الجنة وتاركها في النار...وخلي كل مدارسنا تعلم لعبة حية ودرج...وكل يوم خميس وي تحية العلم ( مو مهم يا علم هسة أخاف تسالني...يابة حتى لو علم ليفربول هم ميخالف) يلعبون حية ودرج حتى تصير عدنا ثقافة الخروج من المربع الأول.
يا رب
ترى ما بينا حيل همين يطلع الفلان الفلاني بعد ستة أشهر ويگول بعدنا بالمربع الاول ، ترى كافي، أدري شنو ماكو لاعب ططو تضحك عليه غيرنا؟ ما شايف لك دثو ومطفي غيرنا حتى تنطيه هاي اللعبة والزار ما أعرف منين جايبه كله صفر ويا ريت هب بياض...لا هذا كله هب سواد...هسة نريد دوشش مرة ولا إجت خلال ثمان سنوات...يابة دوشش واحد حتى نگول د نلعب بزار رسمي مو زغل...ولا...تعيش ...ليش شفنا شش...اللهم إلا إذا ردنا نلعب بچايخانة بأربيل...ذيچ الساعة كلها دوشش ومن نوصل يم الحية... نقرا " وجعلنا من بين أيديهم سداً" ونتفل بيدينا ونبخ على الحية ...تنام الحية وتصير برداً وسلاما على اللاعبين ونوصل للمية وإحنا ما نعرف شلون !
يا رب...يابة...هسة ما رايدين شي...بس يجونا يعرفون شنو حية ودرج...هاي مو صعبة عليك. وداعتي بس سويها وشوفنا شلون كلنا نصير دواعش...دواعش شنو...زرق ورق...راح نصير أضبط ( بعدنا ما لاگين الأسم) بس راح نذبح كل شي وتدلل...بس خلينا نطلع من هذا المربع إللي صرنا عِشرة عُمُر وياه...وداعتك وين نشوف مربع يگوم يسلم علينا وينزل چايات على حسابه...واحد كلش لزگه.
اللهم مشيه هذا الدعاء عندك...عود نشوف نرتب وضعنا وياك.
راح أتلوگ وأگول:
والله الموفج





التعليق والتصويت على الموضوع في الموقع الرئيسي


التعليقات

1 - الاخ العزيز حبيب العربنجي
جمشيد ابراهيم ( 2014 / 8 / 15 - 17:47 )
چا شلون خوية ميعرف حيدوري حية و درج بعد ما تخلصنا من لزگة جونسون وداعتك مبين من وجهه خوش ولد خطية فدوة خلي يحاول چم شهر بلكن يتعلم من العزة و يرفع علم يا حسين يا عطششان و هاي المرأة بالعباية هاي منو هي اني حبيت اگلها
ذبي العباية ذبي العباية
سوي علي احسان ذبي العباية
بالحسن اية بالحسن اية
مع تحياتي و شكري لهذا النص الجميل

2 - الأستاذ جمشيد إبراهيم
حبيب العربنجي ( 2014 / 8 / 26 - 13:31 )
أستاذي العزيز
شكراً لمرورك الكريم وتعليقك الباسل....نتواصل
محبتي وإحترامي

اخر الافلام

.. كل يوم - لقاء في الفن والثقافة والمجتمع مع الكاتب والمنتج د/

.. الفنان أحمد سلامة: الفنان أشرف عبد الغفور لم يرحل ولكنه باقي



.. إيهاب فهمي: الفنان أشرف عبد الغفور رمز من رموز الفن المصري و

.. كل يوم - د. مدحت العدل يوجه رسالة لـ محمد رمضان.. أين أنت من



.. كل يوم - الناقد الرياضي عصام شلتوت لـ خالد أبو بكر: مجلس إدا