الحوار المتمدن - موبايل
الموقع الرئيسي


لحم غنم شعب عراقي خالص

حبيب العربنجي

2014 / 8 / 26
كتابات ساخرة


من زمان أدري إن اللحم العراقي خوش لحم ومرغوب بالشوي، بس ما كنت أتصور أن الإعلان عن اللحم العراقي قوي إلى درجة يوصل للرفيق الأعلى حفظه الله ورعاه ومندوبه الدائم على الأرض الرفيق عزرائيل..حبيبنا وحبيب العراقيين إلى درجة لا إحنا نريده يغادر المائدة ولا هو حاب يتركنا ويعوفنا...طبعاً وين لاگي هيچي دلال ومطلع التارگت مالته...لأن السيد المدير والرفيق الأعلى كل يوم ينطيه تارگت معين والمسكين عمو عزرائيل لازم يحقق هذا الرقم، حاله حال الإنضباطية أيام گبل، من چانت المفرزة تطلع وعدها رقم معين ولازم تجيبه، فتشتغل الأعذار...تعال ليش واگف
تنتظر الباص !!! لعدج وين أوگف...إسكت ولك إنطيني البيرية وإصعد...لو تعال ليش عندك كرش شنو ما تطلع عرضات ...إصعد...هذا عدا التوقيع على النموذج مزور (عبالك هو مدير البنك المركزي ويعرف كل التواقيع المخولة ). فصاحبنا وحبيبنا عزرائيل يومية مطلع الرقم مالته بعشرة أضعاف فقط من زيارة للعراق، ووراها يگعد يضرب اللحم الشوي والتشريب العراقي والچاي المهيل وياخذ "عفية" كل يوم من الرفيق الأعلى وياها بونس...ولك مو يونس...بونس يعني مكافأة !
إي أدري أنت يا الرفيق الأعلى فرد يوم هم أعزمنا على اللحمات إللي عندك...ترى الصداقة أخذ ورد...ليش فرد يوم طاح علينا فخذ مال حورية من السما...لو طاح علينا صندوق من خمر الجنة، لو طگ علينا بوري من اللبن وإحنا واگفين تحت الشمس الحنانية وننتظر الكيا! يابة ما لازم...فرد صندوق من رمان الجنة ميخالف أحنا نفرط الرمان حتى نشوف رمانك لو رمان شهربان قبل الخلافة ! ترى إذا تظل هيچ راح نتفق إحنا العراقيين نتعامل بالمثل، بعد ماكو لحم وشوف لك غير صرافة وشعب طلي غيرنا . بس المشكلة إن السياسيين إللي عدنا مبربعين وياك ..أكو بيناتكم بزنس، هم هذولة راح ينطوك
اللحم العراقي حتى لو إحنا إتفقنا بعد ماكو لحم...هذولة جماعتك، يلمولك اللحم (حلال مو حلال كله ينصرف...الذبيحة والنطيحة والمخنوقة ) ويجي المندوب وقبل ما ياخذ الشحنة همين ياخذ له فرة بالمستودع ويشيل چم طلي، ويصعد لك، والمقابل إنت تنطيهم مليارات ومناصب...ويا ريت لومليارات من عندك...لا حتى بهاي إنت ما تصرف...تاخذ المليارات من حقنا ومن عدنا...عدنا بس مو مالتنا...نسمع عدنا مليارات بس ولا يوم شفناهن، تالي طلعت كلها مضمومة عندك تحت حساب (السياسيين العراقيين)...وشلون شكولات...صدگ شكول شكول ورد الباگلا..يروحون فدوة للمفكر السياسي الإستراتيجي الإستاذ أحمد عدوية من گال السياسة هي " حبة فوووووء وحبة تحت"
وداعة الغالي إللي عندك..إحنا (ومن أگول إحنا يعني مو السياسيين – إلى ذلك نسترعي إنتباه المشاهدين...سنذيع عليكم بعد قليل بياناّ مهماّ صادراّ من القيادة العامة للقوات المسلحة...) ...هذا كان فاصل حماسي ..المهم إحنا متفقين بعد ماكو لحم للتصدير...راح نوزعه بيناتنا..لحم الشعب للشعب تماماً مثل الشعار الطوبائي البروليتاري نفط العرب للعرب...من رخصتك إسمح لي عندي عفطة قوية ...طييييييييييييييييييييييييط...إنتهت العفطة. !
إحنا نريد لحمنا إلنا...آني أذبح جاري وهو يذبحني...تبادل منفعة...ما ننطيك...بس هذولة المناعيل (وفي رواية حفص هذولة الملاعين) إللي كل واحد منهم عنده مليشيات تهريب اللحم العراقي إلك...هذولة ما ينطونا مجال نجوّزك من عدنا ولا ينطونا مجال نقطع الغدا عن مندوبك الدائم ولا نوريه وجه الگباحة بلكن يحس ويعوفنا...صدگني حتى جتي مرات گمنا نسمم نفسنا، ياما شربنا الزرنيخ وماي الباگلا حتى نتسمم...وحتى گمنا نسوي تاتو بأماكن من جسمنا (ما مسموح لي أگول وين..حيا حضوري) ونكتب تاريح إكسپاير للحم..بس هذولة يغيرون كل شي...غيروا حاضرنا وغيروا وطن كنا نتصور ننتمي له..غيروا طبعنا وغيروا كل شي كان يوم من الأيام حلو ...ما يعصى عليهم يغيرون تاريخ الإكسپاير ...وإنت ما شاء الله عليك ...تطحن باللحم وما يهمك ...مسموم ما مسموم...شي هامك...إنت أبو الآنا...تلعب لعب بالموت مثل الدعبل...تكوره باشكال مختلفة...ملونة بألوان ملابسنا وتشمره علينا....وين يجي الدعبل وبراس يا طلي هذا معناه عاجبك هالطلي...وجماعتنا عد عيناك ما يقصرون باللواگة تريد واحد يجيبولك عشرة...تشتغل علينا الحملة الوطنية الكبرى لقتل الشعب...الشحن والتخليص الگمرگي لا تشيل هم...الجماعة متمرسين.
عيوني إنت والمندوب
أكو لحوم بغير مكان...ترى تغيير يفيد الصحة...ولكم والله واحد يمل...شنو أنت وعزرائيل ما تملون...يمعودين يگولون حتى براد بيت مل من لحم إنجلينا جولي خاصة بعد ما سوت عملية وشالت صدرها...كل شي ينمل...شوفوا غير مكان...فرد خمسين سنة تغيير مو أكثر...عود رجعوا همين...وخلال هاي الخمسين السنة يكون أولادنا كبروا وخلفوا وعاشوا عيشة إحنا ما عشناها...وهاي واجبنا تجاههم...جبناهم غير لازم يعيشون...مو جبناهم حتى نشحنهم لموائد التكة الرحمانية... خمسين سنة نريد نعيش...وراها تعالوا من جديد...عود ذاك الوكت الله كريم..شوف منو يحكمنا...يجوز كاكا شيركو خوشناو...عود ذاك الوكت هو يتصرف..
أقول قولي هذا وإستغفر الله لي ولكم...وجيب التكة..بشرط اللحم العراقي...والله الموفج بعد التريوعة.





التعليق والتصويت على الموضوع في الموقع الرئيسي


التعليقات

1 - الاخ العزيز حبيب العربنچي
جمشيد ابراهيم ( 2014 / 8 / 27 - 08:19 )
خوية حبيب انت خوش ولد مبين عليك شلون يعزمك و انت اسمك الثاني العربنچي بالمناسبة چان همينه عندي عربانة من چنت زغيروني بس ولد اسمه كاظم لفته باگها مني ليش لان چنت اگول عليه لفة يابه شسوي چنت احب لفة العنبة صمون و شوية عنبة و بس

لا تزعل مني خوية دا اشاقة وياك بس بشرفك اكو واحد عراقي نباتي حتى يصير كاكه شيركو خوشناو نباتي؟ اصلا احنا كلنا نأكل تكة گلب معلاگ. كلمة نباتي غير معروف بالعراق. اگول حبيب انت ليش ما يتعلم الكردية مو هي لغة بلدك مو شيركو خوشناو احسن من كاظم خلف لو كاظم عگلة على مود يحكم
بالمناسبة مرة لزموني الانضباطية اخوات الگح لان چنت لا بس عرضات يگلي الريس انت ليش ما لابس قيافة گتله يابه ملابس العرضات تگول
اريد الوگ جمشيد ما لوگ انا لغيره
ذبوني بالسجن ثلاثة ايام بسبب العرضات و اني ماعندي كرش
لك الشكر الجزيل و التقدير على هذه اللغة الجميلة

اخر الافلام

.. الأسود والنمور بيكلموها!! .. عجايب عالم السيرك في مصر


.. فتاة السيرك تروى لحظات الرعـــب أثناء سقوطها و هى تؤدى فقرته



.. بشرى من مهرجان مالمو للسينما العربية بعد تكريم خيري بشارة: ع

.. عوام في بحر الكلام | الشاعر جمال بخيت - الإثنين 22 أبريل 202



.. عوام في بحر الكلام - لقاء مع ليالي ابنة الشاعر الغنائي محمد