الحوار المتمدن - موبايل
الموقع الرئيسي


برودة الجو و الكورتان

نوزاد بندي
کاتب و شاعر
(Nawzad Bandy)

2016 / 5 / 4
مواضيع وابحاث سياسية


برودة الجو و الكورتان

(نوزاد بندي )

لحد الان
نحن العراقيين , ما رزقنا بحارس مرمى تمام ..
خو منريد ايكر كاسياس او مثلا بوفون ...
بس يا جماعة يا هو الليجي يسجل علينا هدف ...
و لازم احنا نصفق ...و تصفيقات حارة ..
يعني تصفيق حار للنفط ، بس اتراك و ايرانين و البريطانيين و جماعة الهوليود مستفادين من نفطنا ...
الحالة الامنية ، ماكو يوم ما يسجلون اكثر من هدف علينا ..
بينما جيش الوزراء و النواب الموجودين و الهاربين و المتقاعدين و الذين على استعداد تام لكي تدخلون في غمار المليارات ( عفوا ) الوزارات ..جيش مثل جيش محمد عاكول ..
يسجلون علينا اهداف حية و اهداف مسجلة اصلا و اهداف معلبة .. اهداف مادية .. اهداف معنوية .. اهداف تربوية ..
ذاك اليوم سمعت اجا قطع غيار عربات نيسان الى جنوبنا الحبيبة ملوثة بالاشعاع ...
يعني يا جماعة حتى اليابانيين يسجلون اهداف اشعاعية ..
و الجوز الامريكي المنتشر في البلاد , جوز محترم و سعرها رخيص نسبيا ..هم اكيد بها هدف ، شلون خلصنا المواد الملوثة ب مفاعل تشرنوبيل النووية ، من شاي و الاسماك ..اكيد هذا الجوز مثلما يكولون بها ان ..و (ئينه ) هاي صعبة نحلل رموزها و طلاسمها ( و الطلاسم هاي خوش كلمة ، و اعتقد اخ واثق معجب جدا بكلمة طلسم و طلاسم ..و يستعملها في مجال تحليل اللوحات الفنية .. )
لان مثلما يقولون وراء كل رجل عظيم امراءة ، ايضا وراء كل هدف اجنبي خبيث علينا , مسؤول عراقي سافل ..طبعا ..شلون ماكو مسؤول عراقي ؟ اذا يقول نزار القباني: ما دخل اليهود من حدودنا بل تسربوا كالنمل من عيوبنا .؟؟
و ذاك اليوم واحد ( مخلص ) من قوات امن الغذائي ( بتاعنا ) وقف ( شحنة ) حليب المنتهي المفعول الى بلد الجار الحبيب النور العين ( ايران ) ... شاحنات مليانة حليب اكسباير ...بعد ( هنيهة ) ( و الله حلوة - هنيهة - هاي ..يعني احلى من - طلسم و طلاسم بتاع صاحبنا .. و البتاع الكلمة الحلوة الوحيدة التي اخذتها من اخوة المصريين و على راسهم عادل امام .. و -على راسهم - هاي المصطلح الوحيد التي تخلصنا من عندها بعد احداث ( عفوا ) الاهداف المسجلة علينا باسم الاطاحة بالصنم ، حيث يوميا تدخل اسماعنا عشرات بل و مئات المرات : اهنيء القيادة السياسية و على راسها ..... )
المهم ..خلي نرجع لموضوع الحليب الاسكباير .. بعد جم دقيقة امر بفك اسر الشاحنات المتوقفة و التي تحتوي على الحليب الفاسد بمجرد (رنة هاتف ) من مسؤول الفاسد ( الواقف ) خلف هذا الهدف المسجل علينا ...
ادري بكم ..هسه تكولون شوف هذا الكردي ( الكغردي ) المايفتهم .. يا ول هذا الهدف احنا سجلناها على الايرانيين ، نبيعهم حليب فاسد و نحصل على كومة تمنات ..
هههههههههه
بالمشمش ..
عراقي يسجل هدف ؟؟؟
ماكو .. حتى اهداف يونس محمود و هوار الملا ، و اهداف فنية لشذى حسون , اهداف بول بريمرية حتى يثبت بان المعمورة التي هو مسؤول عليها في مقدورة تسجبيل اهداف فنية و رياضية و يصبح مثلا بطل اسيا او نجم عرب ايدل ...
المهم ..
اخواننا الايرانيين ينتجون من هذه او هذا ( ما اعلرف حليب مذكر او مؤنث او خنثي ) الحليب و التي يقف خلفها مسؤول مخنث ، لبن ..لبن سائغ للشاربين ( الشارب فاعل عراقي طبعا مبني على الفتح ، لان الفاعل منصوبا و ليس مرفوعا في بلدنا )
يعني شلون .. هم طلع احنا من الذين كفروا ؟
نعم ..
حليب منتهية المفعول + عبور الحدود الايرانية العراقية + اتصال هاتفي من مسؤول بغية تسهيل العملية الوطنية الشفافة = البان طازجة ايرانية الصادرة الى الاخوان العراقيين الاشاوس ..طبعا من الحليب الفاسد ( بتاعنا ) يعني مثلما يكولون منا و بنا ..
يا اخي كلها اهداف علينا ..
هسه اني ككردي احكي على نفسي ، اتراك يبيعون نفطنا و رواتبنا ماكو .. يعني اخوان شلون يصير بلد نفطي و الراتب ماكو ..؟ و الاحلى منه : الموظف كاعد ساكت ..و من ثم اتراك يقصفون اخواننا الكرد التركيين في قنديلنا .. يعني الكردي المناضل شلون ينقصف على ارضنا و باسلحة الاجنبية ؟ يصير .. ضم عينونك و هاي هي.. و حتى ما ااخذ من وقتكم الرخيص ( لان ارخص شيء عند الحارس المرمى الطايح الحظ هو الوقت ) احكي لكم حدث و صار طرفة على ( ضم العين ) قديما واحد من الاغاوات عندنا صار عليه نوع من الثورة الشعبية ، فينهزم و ينجو بجلده ، الاغا و واحد من حراسه .. فيروحون للجبال و يسدل الليل جدائله ، و الطقس بارد ..فالاغا يقول لحرسه : ( اني بردان ..جب لي بطانية ) الحارس يقول : ( و الله سيدي هذه الطلعة مو مثل طلعاتنا السابقة ، ما عندنا بطانيات ..بس عندنا لباس الحمير ) نحن بالكردية نسميه ( كورتان )... الاغا يتعصب و يسب الحارس على ذكره كلمة ( كورتان ).. و شوية شوية الطقس يبرد اكثر ..فيقول لحارسه : ها .. ما لقيت شيء ؟؟ .. يقول الحارس : بس كورتان موجود ...فيقول الاغا : كلب ابن الكلب جيبه و لا تسميه ...
احنا ايضا لا نسمي اعداءنا و اهدافهم .. خلي يسجلون علينا الاهداف ، بس احنا ما نسميهم نظرا لبرودة الجو ..





التعليق والتصويت على الموضوع في الموقع الرئيسي


اخر الافلام

.. هنية يزور تركيا لإجراء محادثات مع الرئيس التركي رجب طيب أردو

.. توقعات بموجة جديدة من ارتفاع أسعار المنتجات الغدائية بروسيا




.. سكاي نيوز عربية تزور أحد مخيمات النزوح في رفح جنوبي قطاع غزة

.. حزب -تقدّم- مهدد بالتفكك بعد انسحاب مرشحه لمنصب رئاسة مجلس ا



.. آثار الدمار نتيجة قصف استهدف قاعدة كالسو شمالي بابل في العرا