الحوار المتمدن - موبايل
الموقع الرئيسي


جحا وزيرا للنفط العراقي

جحا العراقي

2006 / 1 / 18
كتابات ساخرة


قام جحا بالصياح ووقف منتفضا وقدم استقالته لان البانزين والمحروقات صعدت اسعارها بعد الانتخابات طبعا جحا ماجان يدري بهذا القرار ابدا بروح ابوه الي بعد مامات مجان يدري بهذا القرار المهم استلم خطابه التاريخي والقومي والاسلامي والعربي والتحريري التلفزيون ساعتين حتى يفهم الناس ليش استقال احتجاج على رفع اسعار المحروقات (ولحد يظن الاحتجاج يعني حجاج ) ولم يقبل بان ترتفع اسعار المحروقات وقد ( زلغ روحه تزلخ ولم يقبل على هذا القرار ولحد يسالني شنو زلخ روحه بس هي كلمة ايطالية معناها حركه نفسه ) طبعا هو دائما مهتم بمصلحة المواطن ( لان المصلحة انقرضت هي والكوسترات وبقت بس الكيا فمحد يسال على المصلحة ) طبعا الزيادة اثرت بشخصيته وخلته مينام الليل.
جحا والله خطيه مينام الليل بسبب ارتفاع المحروقات الي يضر بابناء الشعب العراقي طبعا هذا ماكان يعتقده المواطن العراقي وجان يقول على هذا الوزير والله خطيه جحا شوفوا مدمر نفسه علمودنا احنا.
طبعا جحا لم يكن مقهور على الشعب ولا المواطن البسيط جحا كانت لديه حصة من تهريب بعض تناكر البانزين الى دول صديقه ( صديقه وهي كلمة تعني صاحبته اي الكبل مالته ) وكان الفرق بالسعر يسويله مبلغ يكفيه للصرف على محطته الفضائية والجريدة الي هو رئيس تحريرها (ورئيس التحرير كلمة اتت من بطل التحرير القومي والبطل يعني قنينة بيبسي ) وطبعا الباقي يوزعه على الويلاد اقاربه الي حشكهم حشك بالوزارة بحيث من المدير للفراش كلهم من عشيرة وحده واصبحت وزارة النفط تدعى بوزارة جحا النفطية .
المهم جحا بعد رفع سعر المحروقات وبعد الانتخابات والتقسيمات الي راح تصير على الوزارات وصله باص (والباص مصطلح اغريقي يعني رسالة بالانكليزي ويعنيmessage بالعربي ) انه احتمال يدكوله طابع والطابع معناه ( الطبع غلب التطبع ) يعني احتمال يقولون له رحمه الله والديك اخلع من الوزارة ترى مصختها بالخمط لذلك قرر ان يخرج بكرامته ( والكرامة مصطلح عربي يعني التذلل من اجل البقاء في المنصب ) المهم سواءها ظلمه جحا وقال انا لايمكن ان ابقا في وزارة انا مامستفاد منها اي شي ليش تحجون عليا وتقولون حرامي هي مئتين مليون دولار خلال فترتي انا خمطت اعتذر انا اتكافاءت على قيادتي للوزارة وجانت قيادتي قيادة حكيمه ( وحكيمه اخت سليمه الي تغني بالمقام العراقي ) شنو جم مليون دولار استفاد شهريا من تهريب النفط ليش بس عليا الناس كادره وتحجي متروح تشوف بقية الوزارات مو البوك واصل بيها للستار ( الستار هو حاجز رملي دفاعي يستخدم في الحرب ) طبعا جحا يومين ودز عليه الرئيس الملهم لمجلس الطماطم والخيار اهووووه والله لساني يريد يورطني وي البايات ( البايات معناها بايات الدرج الي تستعمل في بناء الدرج ) دز عليه رئيس الوزراء الملهم مفجر الثورة الحديثة وصانع امجاده ( امجادها كلمة معناها الكابتن ماجد مسلسل افلام كارتون ) وقال لجحا ان اربع محافظات بقت بيها اسعار المحروقات على السعر القديم وترجاه ان يبقى هذه الفترة ويستفاد من هذا الفرق واكمل حديثه رئيس الوزراء (وداعتك راح احسبلك كل الي تهرب على السعر القديم بس ابقى مو ترى فشلتنا قدام العالم وقدام اليسوه (الامريكان) والي مايسوها ( العراقيون ) طبعا جحا فرح بقرار مجلس قيادة الثورة المرقم اهوووه قمت اشمر على الماضي فرح بقرار مجلس الوزراء ورجع للخمط .
وجحا اول مارجع قلهم لجماعته من هسه تحضرون نفسكم لازم نطلع حصتنا مال مئة سنة ليقدام خلال شهر قبل تشكيل الحكومه حتى نطك ونصبح طكوك (والطكوك معناه الضرب على الطبل في الفرقة السمفونيه ) .
حكمه هذه الحلقه ( ليس كل مسوول يهتف ويريد الحق معناه انه يدافع عن المواطن العراقي البسيط )





التعليق والتصويت على الموضوع في الموقع الرئيسي


اخر الافلام

.. تكريم إلهام شاهين في مهرجان هوليود للفيلم العربي


.. رسميًا.. طرح فيلم السرب فى دور العرض يوم 1 مايو المقبل




.. كل الزوايا - -شرق 12- فيلم مصري يشارك في مسابقة أسبوع المخرج

.. الفيلم اللبنانى المصرى أرزة يشارك فى مهرجان ترايبيكا السينما



.. حلقة #زمن لهذا الأسبوع مليئة بالحكايات والمواضيع المهمة مع ا