الحوار المتمدن - موبايل
الموقع الرئيسي


جحا العراقي وزير للدفاع

جحا العراقي

2006 / 3 / 13
كتابات ساخرة


شلونك جحا اخبارك اشو صارلك فترة ماطالع على التلفزيون وفاجاتنا اليوم بطلوعك عليه اكو شي مضوجتك الاحداث اشو انتهت بعد شتريد ارتاحيت دمرتوا وحدة العراق ومزقتوه وسويتوا شي ما كدر اي احتلال ان يسويه وخليتوا الناس تضحك علينا من وراء عقلياتكم وافكاركم وتصرفاتكم انا مااريد ادخل نفسي بالموضوع الاخير لان الشغلة الي وصلتني بيها معلومات هي اكبر من مجموعة عفطية تطلق على نفسها قاعدة تفجر مرقد لكن مااريد افتح جروح بعدها ماطابت شكول خلي اسكت وانجب احسن الي وهي الناس مع الوقت راح تفتهم منو سوا هذه الشغلة .
هذا مو موضوعنا وانا هالايام جاي اشطح اهوايه .............
جحا العراقي استلم وزارة الدفاع من قبل وزيرها السابق طبعا وللامانه اقولها ان وزيرها السابق صحيح كان من جماعة النظام السابق قبل سقوط بغداد الا انه كان توب مرضي الكادر والجنود مالته وكان الكل بالوزارة تحبه دك مكافئات وفلوس يهب الامير بما لايملك وللامانه اقولها لحد الان جميع من في الوزارة والحرس الوطني يحبوه ويعبدوه بعد رغم انه كان حرامي لكنه عرف بخطر التدخل الايراني في الموسسات الحكومية وخاصة وزارة الدفاع والداخلية وكان عنده جهاز استخبارات خاص بيه قدر يجيبله وثائق عن هذا التدخل الايراني في بعض الوزارات وعرضها على جحا القوي الامين الي لايهش ولاينش شلون قوي ماعرف طيعا القوي الامين صفن بالشغلة وكله لا خطية ذولاه اخوتنا الايرانيين احتمال جاي يتفرجون مو يدخلون ليش انت مكبر الشغلة جحا اشتغل زين واترك شغلات الاستخبارات علينا احنا كدها ( كدها كلمة صينية تعني حمار ) .
طبعا وكان الوزير السابق متفق مع مديرة الحسابات بالنسبة للخمط بالعراقي اما بالنسبة للعقود الخارجية فكان المسوول عنها جنرال امريكي مانحب نذكر اسمه مابينا حيل ندخل بمشكلة وي وزارة الدفاع الامريكية طبعا هذا الجنرال امر وزير السابق بشراء صفقة اسلحة فاسدة من بولونيا مقابل عمولة لوزير الدفاع و وعد انه راح امريكا تضل تدعمه لمنصب وزير الدفاع طبعا الاخ صدك ووقع على الصفقة ( كلش فهيم ).
وضرب الجنرال بوري للوزير بالانتخابات وخوش بوري وصار الوزير السابق مثل بلاع الموس مايقدر يطلع الوثائق الي عنده (والي هي وثائق اصلية مو استنساخ لان كاشول الوزارة كلها من الوثائق حتى يضمن على نفسه مستقبل سياسي ) لان تفضح تعاملات وزارة الدفاع الامريكية وتعاملات الجيش الامريكي وبوكهم وخمطهم وتفضح تدخل الايراني في وزارات الدولة واكتفى بمشاهدة الموقف العراقي من بعد وتطمينات امريكية بانه مكان محجوز على الحكومة بعد القادمة مو القادمة طبعا وخاصة انه ماخذ حصانه امريكية ويخاف لايعرض الوثائق وتطير الحصانه منه مايدري انه خوالنا الامريكان من يدكون طابع لاي واحد يعنى انتهى .
وبعد استلام جحا عراقي الجديد للوزارة قام بتصفية الكادر السابق الرئيسي وليس الاداري من الوزارة واحضر استاف العمل وياه وللامانه اقوله بقى مديرة الحسابات بالبداية بنفس منصبه لكنه شعر انه كان عدها اتصال بينها وبين الوزير السابق وخاصة انه قامت تهرب بعض المعلومات ونسخ المعلومات والعقود الجديدة للوزير السابق وهي هم حراميه درجة اولى تلعب على كل الاطراف وماعرفت انه انكشفت من قبل اهم حزب ديني بالعراق وبلغوا جحا وجحا قام باتخاذ الاجراءات اللازمة لااعتقالاها يلا حرامي يعتقل حرامي الله كريم .
جحا وزير الدفاع الجديد يلقب بوزارة الدفاع من قبل الكادر الرئيسي للوزارة لقب ب ( المخربط ) طبعا وللامانه اقولها انه مايعرف انه مسمي بهيج لقب لا هو يعرف بيه ولامدير مكتبه اما البقية من موظفي الوزارة كلهم يعرفون بلقبه وهذي مو اشاعة اما ليش مخربط فهو بكلشي مخربط حتى بلبسه وبتسريحة شعر يوميه يضحكون عليه بالوزارة من باب الاستعلامات وصولا باكثر الموظفين ويقولون يمكن متعارك بالبيت ومطردي بره البيت يلا مو مشكلة .
طبعا جحا حتى يضمن مستقبل السياسي وخاصة انه انسان هادى وذكي وحاس بان الطابع جاي صفح وبقوة زوج بنته لشخصية ظهرت على الساحة العراقية بعد السقوط وهي شخصية عدي العراق الجديد ومبروك بس والله لو عازميني كان قمنا بالواجب لان الوزير انا اعرفه معرفة شخصية .
طبعا جحا حتى يضمن بقاء ومساندة الجميع له فقد عين كادر من ابناء محافظته وعشيرته واصدقاءه ودز الكثير منهم بالملحقيات والسفارات العراقية وبرواتب مغرية حتى يستفادون وحتى يحاولون ان يتصلولوا بالدول الي بيها مجال تقدمله حماية اذا دكوله طابع الامريكان صدك ذكي ويعجبني تفكيرك جحا واحترمك عليه انا اعرف انت مو طائفي لان زوجتك من نفس عائلة اهم رجل ديني في العراق والي من وراء لقبها صدام شك بتصرفاتك وعرف انه بديت تتصل بدول مجاورة في محاولة لاسقاط نظام السابق والساقط .
جحا انت ترسم للمستقبل زين ومخليلك شخصية ماظاهر بالوزارة مستلمة عمولات العقود والمقاولات والتجهيزات للحرس الوطني ودك عمولات ونسبتك واصلة طبعا كل هاي وانت عود مامبين بالصورة اما بالنسبة للعقود الخارجية فابشرك انه انت داز جماعة يتعاقدون وليقدام طالعة حصتك من العقد للامانه انا عندي مصدر موثوق من اخر شركة تعاقدت وياها على اسلحة جدا خفيفة بلغني انه جماعتك استلموا النسبة مالتك ووضعولك اياه بمصرف باحد الدول الاوربية بس للامانه والتاريخ مااعرف اسم المصرف بس مبلغ العمولة ممكن اجيبلك بيه كشف .
جحا انت جدا ذكي ومسوي نفسك اهبل يم رئيس الوزراء ووزير الداخلية وباجتماع سري ضم حضرتك مع جم واحد مهم بالدولة بدون ذكر اسماء طلبوا منك انه تاخر نشر تحقيق ملف تعذيب سجن الجادرية الى ماوراء الانتخابات وظهور النتائج ومقابل هذه الخدمه راح ماينسوك بمنصب في حالة اذا تخلت عنك عشيرتك وابناء طائفتك وانت وافقت تذكر بالاجتماع من ابتسمت مااعرف كانت ابتسامة من كل قلبك لو ابتسامة ساخرة .
جحا احترمك على برنامج تدريب الحرس الوطني والمليارات الي انصرفت عليه وبضمنها حصتك كل هاي والجنود منطقة صغيرة مثل تلعفر ماكدروا يحررروها من قبضة الارهابيين واستعينتوا بجماعات مسلحة تقاتل الامريكان لغرض تنظيف المنطقة وتمشيطها من الارهابيين والتكفيرين وتصويرها على انه صورت من قبل قناة العراقية وساعدوكم هاي الجماعات وطردوا الارهابيين ومن سلموكم المنطقة جاهزة طلعتوا وقلتوا احنا حررنا المنطقة صدك ماكدر احجي غير اكول عفطة على هيج تدريب بالمليارات يخرجلي جنود حرس وطني يخافون من طلقة ويستعينون بجماعات مسلحة تشتغل بالمعارضة المسلحة . من امدانا وسفه على الزلم لك جنا جنود بلواء مايعادل خمسمائة نفر نحرر منطقة بيها اكثر من خمسة الاف جندي ايراني واحنا اجنود . صدك من امدانا.
بوي جحا على كيفك اعرف خمطك هالايام صار سريع بسبب انه احتمال ماراح تستلم اي منصب ولو اتوقع انه القوي الامين واعدك بمنصب مستشار او سفير بدولة اجنبية حسب مااذكر باحدى مقابلاتك وياه . بس هو قوي بالحجي وامين في العهد الي قطع على نفسه بتقسيم العراق بس اريد اسالك سوال جحا عن مقتل اخر شخصية مهمة من ضباطك الي راد يستلمون الملف الامني للرمادي من الامريكان وصلتني اخبار وبعدني مامتكد منها بس هي شبه موكدة انه بعض مجموعة من يعملون بوزارتك كان لهم ضلع بالعملية و مشتركين بعملية اغتيال هذه الضابط من خلال اتصال جرى من داخل مبنى وزارة الدفاع على خط شركة عراقنا لشخص يعمل في مكتب اصماخ كبير يعطي عن وجهة وتحركات الضابط وكانت مكالمة عادية بالعراقي بس مشفرة بالحجي وللاسف ماعندي دليل قوي يثبت هذه الحجية بالوقت الحالي وانا هنا مااعرف اذا كان عندك علاقة بالامر اما لا .
بس الي اعرفه انه الخط مو ابو الفاتورة اذا امكن تجري تحقيق اذا انت فعلا مالك دخل بس مو مثل تحقيق سجن الجادرية .
جحا ترى لاتزعل مني احنا الشريف عمرنا ماراح نذكره غير بالطيب فلاتزعل يكفيك انه انت محصلك جم مليون دولار تعيشك انت وعائلتك بره معزز مكرم من وراء العمولات والعقود تجهيز ومن قبل عقود المقاولات البنايات العسكرية وعقود تدريب الجيش العراقي الي لو جايبنا نواب ضباط من الجيش السابق يدربوهم احسن من الف ضابط من ضباط الدول الي جاي يدربون بيها يلا هي خربت بقت على هاي .

حكمه الحلقة ( نصيحة الى كل مسوول عراقي شريف بان لايقبل منصب وزير دفاع لانه ان كان شريف قتل وان كان غير شريف اجى طابع بالكصة ) .





التعليق والتصويت على الموضوع في الموقع الرئيسي


اخر الافلام

.. الأسود والنمور بيكلموها!! .. عجايب عالم السيرك في مصر


.. فتاة السيرك تروى لحظات الرعـــب أثناء سقوطها و هى تؤدى فقرته



.. بشرى من مهرجان مالمو للسينما العربية بعد تكريم خيري بشارة: ع

.. عوام في بحر الكلام | الشاعر جمال بخيت - الإثنين 22 أبريل 202



.. عوام في بحر الكلام - لقاء مع ليالي ابنة الشاعر الغنائي محمد