الحوار المتمدن - موبايل
الموقع الرئيسي


ما تغرگ مراسينه

ميسون نعيم الرومي

2020 / 7 / 9
الادب والفن


امن ابعيد نتفگد بعض
نار البعد تچوينه
انگطعت ابتوت البالگلب
وامخزنه شرايينه
خشخاش روحي صفت
والوكت سابينه
كل يوم طرگاعه ابشكل
حاضرنه چن ماضينه
***
صفصاف نرجف كل وكت
والموت والينه
هانت نگول اونمتحن
ثاريهه تلعب بينه
غربه نموت ابلا وطن
والوطن ناسينه
حصتنه منه بس مرض
والدوه خافينه
***
بالتال صرنه يا شعب
والصدقه.. حلت اعلينه
عصابات تحكم بالوطن
تكتل اوتـذبـَح بـيـنـَه
مجلس قضاء اومدعي
مشهود الجرم واتعينه
مگرود يالتحچي عدل
دمـَّـك تطشــر وينه؟
***
*(مشذوب) كتلوه ابكربله
*بالبصره (عبد الصمد)-
بغداد بالدم اغـْـرِگـَـت
*و(الهاشمي) امدمينه
*الآف جرحى ياوطن
ميات ماتـوا عـيـنـَه
أقـلام حـرَّه سـَـكِـتوا
للوطن چانـت زينه
***
مجهول يذبح بالشعب
والجار غـازيـنه
اوجوه تتبدل تضل
والفگر والينه
يا دهر والله منصفت!
ما تگـدر اعـلينه
ما نرضه المذله بعد!
اسباع والله اهالينه
يوم القريب اوتنتفض
تنقذ مراســينه
ما تغرگ مراسينه
لا.. ما تغرگ مراسينه
------------------------------
* اغتال مسلحون في محافظة كربلاء، السبت 2 فبراير 2019
الكاتب والروائي العراقي علاء مشذوب امام داره
وتفيد المعلومات بأن 13 رصاصة اخترقت جسد مشذوب ادت إلى وفاته على الفور
---------------------------------------------------------------
*اغتيال الإعلامي أحمد عبد الصمد في البصرة يوم 1/1/ ا2020
الذي ينقل الحقيقة واثناء نقله للتظاهرات من قبل مجهولين
--------------------------------------------------------------------
اغتيال الخبير الأمني هشام الهاشمي في يوم الأثنين 6/7/2020*
https://ar.wikipedia.org/wiki/%D9%87%D8%B4%D8%A7%D9%85_%D8%A7%D9%84%D9%87%D8%A7%D8%B4%D9%85%D9%8A
----------------------------------------------------------------------------------------------------------------
*عدد المغدورين في انتفاضة تشرين بلغ
حوالي 1000 شهيد وحوالي 30000 جريح منهم حوالي 4000 معوق
-(من قبل نفس الأيادي الآثمة)-
-------------------------------------------------------------------------
9 / تموز / 2020
ســـــــــــــــــــتوكهولم





التعليق والتصويت على الموضوع في الموقع الرئيسي


اخر الافلام

.. بحضور عمرو دياب وعدد من النجوم.. حفل أسطوري لنجل الفنان محمد

.. فنانو مصر يودعون صلاح السعدنى .. وانهيار ابنه




.. تعددت الروايات وتضاربت المعلومات وبقيت أصفهان في الواجهة فما

.. فنان بولندي يعيد تصميم إعلانات لشركات تدعم إسرائيل لنصرة غزة



.. أكشن ولا كوميدي والست النكدية ولا اللي دمها تقيل؟.. ردود غير