الحوار المتمدن - موبايل
الموقع الرئيسي


الله يسامحك و يرحمنا يا ياسين الحافظ

مازن كم الماز

2020 / 7 / 23
اليسار , الديمقراطية والعلمانية في المشرق العربي


ما بعرف إذا كنت محظوظ ياسين أو مو محظوظ لإنك ما عشت في هذه الأيام .. آسف ياسين , بيجوز هالكلام مو إنساني , بيجوز ما بيصير , بس صدقني ياسين , الأكتر إني ما بعرف إذا كنا نحن محظوظين أو ما عندنا جنس الحظ إنه وصلنا لهالأيام "الخالدة" .. طبعا أكيد بتتذكر إنو كل أيامنا "خالدة" ياسين , خالدون مثلنا ما بيعيشوا إلا أيام خالدة , و لنا عودة إلى الأيام الخالدة ياسين , بس صدقني إنو هذه الحيرة هي جزء من حيرتنا أمام ما نقوله و نفعله في هذه الأيام .. مو اكتشفنا ياسين إنه التأخر الحضاري اللي كنت تقول عنه و حاولت تحلله و تحاربه هو مجرد إشاعة استشراقية و استعمارية .. فاتك نص عمرك ياسين أو كل عمرك يمكن , آه لو فيك تسمعنا و نحن عم نربط بين كل شيء سلبي و غير إنساني مع التقدم اللي كنت تحكينا عنه أو ما يسميه المستشرقون تقدما .. ياسين , ما ضل فيه مصيبة بالعالم و لا مجزرة أو مذمة لم ننسبها إلى التقدم و لا ميزة أو قيمة إنسانية إيجابية و لا أي شيء جميل في تاريخ البشر و حاضرهم لم ننسبها إلى التخلف أو ما يسميه المستشرقون الاستعماريون العنصريون بالتخلف و ما وصفته أنت , بكل أسف , بالتخلف الحضاري .. إذا كان الغرب قرر أن يتقدم و أنه فعلها و تقدم فهذه مشكلته , نحن ما لنا مضطرين نقلده أبدا و لا مضطرين نجاريه و نتقدم , مو بس إنه هالكلام تعبير عن رؤية مركزية أوروبية استشراقية استعمارية حاقدة و عنصرية , بل هو أيضا محاولة للقضاء على كل الأشياء الجميلة التي نحتفظ بها من عصور أجدادنا و آبائنا المتخلفة كما يصفها المستشرقون العنصريون الحاقدون .. اسكت , مو طلع إنه أجدادنا كانوا عايشين بديمقراطية حقيقية لكن بخصائص محلية , أكيد بتتذكر قصة الخصائص المحلية .. مو طلع الحجاج و قراقوش و إخواتهم أول من مارس الديمقراطية بالعالم و بالتاريخ و إنه المستشرقين الكلاب كانوا مفهمينا العكس و أن ابن تيمية سبق روسو بقرون طويلة إلى كل ما هو إنساني و ديمقراطي و أن فتاويه سبقت فولتير بقرون و أن نساءنا كانوا حرائر قبل ما الغرب يكتشف إنه عم يقمع المرأة و قال شو , بدو يحررها .. أما كلامك عن الهزيمة و الإيديولوجيا المهزومة فالله يسامحك عليه .. ياسين مو طلعنا نحن غير مهزومين البتة , و إذا ظهر و كأننا مهزومين فإن هذا مو ذنبنا أبدا , المشكلة بأعدائنا أنفسهم اللي وصلت فيهم الوقاحة لأنهم ما عم ينهزموا , بكل وقاحة و صفاقة , شفت وقاحة أكثر من هيك .. و اتصور ياسين إنه المجتمع الدولي قاعد و عم يتفرج على هزيمتنا , عم يتفرج بكل صفاقة , متصور إنت , شفت أو ممكن تتخيل انعدام إنسانية و قيم و أخلاق أكتر من هيك , و بخجل احكيلك شي عن ما بعد الحداثة , أستغفر الله و لا حول و لا قوة إلا بالله .. مو طلعت الراديكالية اللي بنحتاجها ليست أبدا البتة في القطع مع كنت تسميته بالعالم القديم , ما عندك خبر إنه الماضي التليد و الرسالة الخالدة طلعوا شغلات مظبوطة و حقيقية و إنه اللي سميتهم أنت بالتقليديين الجدد هم الذين كانوا على حق , طلع إننا بحاجة لبعث بس من دون البعثيين , مفيش بعث بعد اليوم , نحن البعث .. و مو طلع بكداش على حق لما اتهمك إنك عميل للسي آي إي , إي , بيجوز ما كنت تقبض مباشرة بس أفكارك هي نفس الأفكار اللي المخابرات الأمريكية و الغربية و المستشرقين و الاستعمار و ما بعد الحداثة , أستغفر الله , بيحاولوا يروجوها بيننا و بين أولادنا .. ما بعرف ياسين شو قول أكتر من هيك , الحقيقة خجلان منك , أمة بأكملها واقفة عم تنظر إلى الوراء , عم تشتم التقدم و تمجد الماضي التليد و مسكرة عقولها و تقدس أشياء و بشر و عم تتخانق و تتقاتل حوالي بشر و أشياء لا تستحق إلا السخرية .. ما بعرف إذا لازم استغفر منك أو لازم نطلب لك الغفران من إله أجدادك و أجدادنا , و هل أساسا يجوز لنا أن نطلب من الله العلي القدير مثل هذا الطلب أو يجوز أن نترحم عليك .. الله يرحمنا يا ياسين , الله يرحمنا , اتشهدوا يا شباب اتشهدوا





التعليق والتصويت على الموضوع في الموقع الرئيسي


اخر الافلام

.. لبنان.. مزيد من التصعيد بين إسرائيل وحزب الله | #غرفة_الأخبا

.. ماذا حققت إسرائيل بعد 200 يوم من الحرب؟ | #غرفة_الأخبار




.. قضية -شراء الصمت-.. الادعاء يتهم ترامب بإفساد انتخابات 2016


.. طلاب الجامعة الأمريكية بالقاهرة يهتفون دعما لفلسطين




.. قفزة في الإنفاق العسكري العالمي.. تعرف على أكبر الدول المنفق