الحوار المتمدن - موبايل
الموقع الرئيسي


خواطر ورباعيات أبا الأصباح المقاري

صبحى إبراهيم مقار
(Sobhi Ibrahim Makkar)

2020 / 7 / 27
كتابات ساخرة


بتمر السنين بجمالها وقساوتها، بذكرياتها الحلوة والحزينة، أوقات بتزرع فينا أفراح وأوقات تانية بتزرع فينا جراح وأحزان وآلام، وما بين أوقات الأحزان وأوقات الأفراح يحيا الإنسان ويتفاعل ويتعايش طوال مدة حياته على الأرض. ولكن تبقى هناك بعض الأحداث والمواقف التي قد تؤثر في الإنسان بدرجة أكبر من غيرها فإما أن يقف عندها ليتعلم منها الأخطاء والدروس المستفادة لإكمال مسيرته في الحياة بنجاح، وإما أن يقف ويتجمد ويكتب نهايته عندها وتنتهي تجربته على الأرض بهذا الحدث أو ذاك الموقف الذي قد يجعله غير قادر على مسايرة الحياة وتحدياتها في المستقبل.
وأعرض فيما يلي بعض الخواطر والرباعيات، والتي أعتقد بأنها قد تكون مناسبة من الناحية التعبيرية لتبقى ذكرى قد يراها البعض جيدة في التعبير عن مشاعره وحالته الإنسانية في بعض المواقف المشابهة. وتنقسم هذه الخواطر والرباعيات إلى: خواطر ورباعيات إنسانية، خواطر ورباعيات وطنية، خواطر ورباعيات إدارية.
أولاً: خواطر ورباعيات إنسانية:
1) أكتب إيه عنك يا أمي والكتابة مش هتوفيكي حقك. في البداية أقول "ياربي إديني نعمة أفهم وأقدر كل عزاباتها وآلامها وتضحياتها عشاني" وساعتها بس هقدر أوفيكي حقك وأكتب عن كل اللي قاسيتيه واتحملتيه بكل فرح عشان تسعدي أيامي.
2) أنا غيرك إنت وإنت غيري أنا، وأنا هفضل أنا ومش هبقي إنت، وإنت هتفضل إنت ومش هتبقي أنا، والدنيا إيه غير أنا وإنت، وما ينفعش تكون أنا وبعدين إنت ولا إنت وبعدين أنا، ولا أنا يا إنت. فلازم أنا يكمل إنت، وإنت تكمل أنا. فهمت يا إنت؟.
3) فيه ناس ماتت بس هتفضل عايشة جوانا تسعدنا وتواسينا في كل اللي بنشوفه في دنيانا. وفيه ناس عايشة بس ميتة ومش سمعانا، ودايماً سبب لتعاستنا وبتخلي الفرح ينسانا عشان ما بتسيبش غير الجرح جوانا وناسيا إنها في الأصل كانت إنسانا.
4) أجمل أيامنا جايز نكون عايشينها، بس مش حاسينها عشان مش فاهمينها ورافضينها ومش قابلينها ولا عايزينها. ونفضل طول عمرنا منتظرين الأجمل منها اللي مش موجودة غير في أحلامنا، ويضيع معاها عمرنا وأيامنا.
5) كل حاجة في زمنا بقت كئيبة، والنفوس حوالينا اتغيرت بطريقة عجيبة. وإنت يارب وحدك اللي حاسس بكل النفوس الحزينة، وقادر ترجع لها الفرحة اللي راحت وتخليها دايماً منك قريبة.
6) وابتدى المشوار ومش خايف من طول المشوار عشان واثق في ربي القوي الستار اللي مش هيخليني أبداً أتعب ولا أحتار. جايز هكون وحيد، لكن هكون معاه سعيد ويخليني أبدأ من جديد بحماس شديد وعزيمة حديد وللزمن عنيد وبقلب جديد ولخطاياي أبداً مش راح أعيد.
7) ما تخافش من إنسان بيظهر اللي في القلب على اللسان، لكن خاف من لسان بكل الألوان عامل فيها إنسان يحميك من غدر الزمان وهو أول من يبيع وأول من خان، فما تسمعش كلام أي حد مش جد عمياني عشان وقت الجد هيخلع ويسيبك لوحدك تقول آه ياني، فحب وعيش بإخلاص وأمانة مهما قابلت من غدر وخيانة، أصل الحياة ما بتقفش على إنسان أو إنسانة.
8) بحلم وأنا صاحي وببكي وأنا بحلم وبضحك وأنا باكي، لا عرفت أصحى ولا قدرت أحلم ولا بطلت أبكي، لكن إنت بس اللي تقدر يااارب تخليني أحيا، تخليني أحب، تخليني أحس إني موجود لأشكرك دوماً يارب الوجود.
9) الإنسان الحقيقي الغلبان ما بيتغيرش مع مر الزمان، بيمر عليه فلان وفلانة وفلان، وصولي حسودي انتهازي للمصلحة طمعان. وبعد ما حقيقتهم تتكشف وتبان، بيفضل على طبعه غلبان ويعاملهم دايماً كإنسان عشان هو اللي من غيرهم كسبان مهما طال الزمان.
10) سعادتك بتزيد لما ناس بتصغر في نظرك لحد ما تخرج من دايرة حياتك، ولما ناس تانية بتكبر في نظرك لحد ما تملى دايرة ومثلث ومربع حياتك. فكن محباً للوفاء تكن وفياً لمن تحب فالأصل هو "حب الفضيلة وليس حب الأشخاص".
11) لما تلاقي القريب يبيعك من غير تمن بيزيد تقديرك للغريب اللي يبيعك بتمن، فإبعد عن الإنسان القريب البعيد وقرب من الإنسان البعيد القريب، فالحزن كلمة وفعل من إنسان أو إنسانة والسعادة كلمة وفعل من إنسان أو إنسانة المهم نعرف إزاي نختار الإنسان والإنسانة.
12) أيام ورا أيام بتطول علينا التجارب وقسوة ومرارة الآلام وملناش غيرك إنت ياربي اللي تقدر تفرحنا وتهون علينا الألم وكثرة الأحزان. أيام ورا أيام ويرحل الإنسان ومش هيفضل غير صورة وسيرة وذكرى بأجمل وأحلى الأيام.
13) ولسه ما بنتعلمش، بنتصدم وما بنحرمش، ونتألم وما بنتكلمش، وعلى وضعنا ما بنتغيرش بنضحك لكن ما بنفرحش.
14) فلوس ورا فلوس بيجري مهووس ونفوس ورا نفوس بيخسر ويدوس، وخطية ورار خطية بيفضل محبوس، وحزن ورا حزن هيعيش طول عمره متعوس وشهواته تتحول لكابوس.
15) بطل تكون حسن النية مع اللي مش حسن النية، وخليك معاه حسب النية وخلي لربنا حساب النية عشان النية النية بقت مستوية من كتر اللي حصل لها من آسية.
16) في بيت العيلة كنا هنا عايشين في فرح وهنا مع كل اللي كانوا هنا، وراحوا هناك وسابونا هنا من غير فرح ولا هنا.
17) يا لضعفي عند ركوعي في الصلاة ويا لتواضعك عند سماعك للصلاة. يا لقوتي عند نهضتي من الصلاة ويا لرحمتك ومحبتك عند استجابتك للصلاة يا الله يا وديعاً وليس في طبعك ضعف، ويا قوياً وليس في طبعك عنف. اغفر لنا يا الله يا واحد يا ديان وأعن ضعف إيماننا لأنه ليس عبد بلا خطية ولا سيد بلا مغفرة، وليس عبد بلا ضعف ولا سيد بلا قوة.
18) أعلم أنك تعلم وتستطيع أن تعمل ما لست أعلم وما لست أعمل، فخليني أعيش إنسان وأموت إنسان وأسيب حزني وهمي عليك إنت يا خالق يا ديان.
19) حان وقت غروب شمس كل عناء مع من تسبب في كل شقاء، وأناجي رب السماء كالبرج الصاعد في أعنان السماء أن يكون سماء لقلبي وسماء لعقلي، سماء لحزني وسماء لفرحي، سماء لصبحي وسماء لليلي، سماء ليومي وسماء لغدي، سماء لحياتي وسماء لمماتي.
20) سماح ياربي سماح ياربي، سماح لروحي سماح لجسدي، سماح لقلبي سماح لعقلي، سماح لسمعي سماح لبصري، سماح لصوتي سماح لصمتي، سماح لضعفي سماح لظلمي، سماح لعمري وسماح لصبحي.
21) ما بين دموع الفرح ودموع الحزن يحيا الإنسان، ولا تعتبر دموع الفرح نتيجة لحدوث شئ جيد يجلب السعادة والرضا للإنسان ويعبر عن مدى حبه لخير الآخرين، فربما تعبر هذه الدموع في بعض الأحيان عن مدى بغضه وكراهيته لهم وفرحه في حالة تعرضهم لأي مكروه. وأيضاً لا تعبر كل دموع الحزن عن مدى الألم والحسرة التي يشعر بها الإنسان قبل أن يتوب عن خطية معينة، أو نتيجة لضرر تعرض له أو فقدان شخص ما كان قريباً منه وغالي عليه جداً. فربما تعبر هذه الدموع عن الحزن الردئ والندم على عدم ارتكاب خطايا معينة أو استغلال مواقف معينة لتحقيق مصلحة مادية أو معنوية لا يستحقها. فإمنحنا يا الله النعمة والقدرة على أن نحيا دموع الفرح ودموع الحزن فيما يرضيك أنت وحدك وليس لإرضاء أنفسنا أو الآخرين.
22) إمنحنا كلنا يارب قيامة من الموت في الخطية والشهوات الأرضية إلى الحياة في التوبة والقداسة السمائية، قيامة من حياة اليأس والمرض والشقاء إلى حياة الأمل والصحة والرجاء، قيامة من حياة الهزيمة والانكسار إلى حياة العزيمة والانتصار، قيامة من حياة الحزن والهموم إلى حياة الفرح والسرور، قيامة من الحياة في الفشل والظلمة إلى الحياة في النجاح والنور. قيامة من الحياة في حب الذات إلى الحياة في حبك أنت يا ينبوع المحبة الكاملة التي تحب وترحم وتفدي كل ذات.
ثانياً: خواطر ورباعيات وطنية:
1) جذورك يا وطني متأصلة فينا، وعارفين كويس أوي مين اللي بايعنا ومين اللي شارينا، وعمرنا ما هنبيعك أبداً مهما دمروا وقتلوا وفجروا فينا.
2) يا جندي يا مجند يا زميلي الحبيب ياللي دايماً إرادتك من حديد وبمعونة ربنا في وقت الشدة بتكون قوي وشديد. يا جندي يا مجند يا زميلي الحبيب منتظرينك تعود لينا بالنصر الأكيد ومعاك الفجر الجديد. فجر قاتل لكل خاين وإرهابي عنيد. فجر يجفف دموع أمهاتنا على كل شهيد. فجر نبنى فيه مصر من جديد ونكون فيه كلنا إيد فى إيد. فجر مليان بالفرح وكل مصري يكون فيه سعيد ويرجع زى ما كان طول عمره متميز فريد.
3) لو عايز تعرف يعني إيه وطن ويعني إيه سيادة؟ بص لصاحب البيادة اللي محروم من أهله ومن مظاهر الترفيه والسعادة. ورغم كده، كله رضا عشان هو وطني بزيادة وبيحب وطنه حب عبادة، حب يخليه يضحي بحياته عشاني وعشانك ويبقى ده بالنسبة له مجرد عادة. وده طبعاً غيرك إنت ياللي عايش بس عشان جماعتك وزي مرشدك بتقول "طز في الوطن وفي السيادة.
4) كلنا إنسان يا بتوع حقوق الإنسان، بنتولد إنسان وبنموت إنسان، فياريت تعاملونا كلنا كإنسان ومش بس الإنسان اللي بيشاور لكم عليه الأمريكان حتى لو خرب أو خان. فاهمين يا بتوع حقوق الإخوان قصدي "الإنسان"؟ عشان كلنا إنسان والجندي الغلبان عالحدود إنسان والضابط السهران يحمي بلده برده إنسان.
5) إنت وأنا وإنتي مكتوب لنا نعيش وسط ناس أصلاً مش ناس معدومة الوطنية والإحساس، طول الوقت شغالة وسوس وهسهاس ينخر في كل أساس ويشكك في أي إنجاز وتصدق بس أي مصيبة أو إشاعة ملهاش أي صحة أو أساس.
6) حزني وحزنك يا أخويا يا مصري حزن واحد سببه إرهابي واحد بينفذ فتاوي جاحد بيروجها له إعلامي جاهل لصالح عدو غادر وفاجر، والمصري بمعونة ربنا هيكون عليهم كلهم قادر وقاهر.
7) قولوا لجبان داعش ليه دايماً في الجحور عايش؟ وليه مخبي وجهك وفي نقاب النساء والحزام الناسف لابس؟ وليه لرحمة ربنا عن الغلابة حايش؟ وليه تضربهم في ضهرهم وعلى الزناد دايس؟ وليه رصاصك عن إسرائيل حابس؟ وناسي إن ربنا لحقيقتك كاشف وهتفضل طول عمرك من الجندي المصري خايف وكاشش. إني أدعوك يا جبان داعش: إنزع عنك حزامك الناسف وواجه كراجل الجندي المصري الشجاع اللي على دمك بمعونة ربنا حابس وعلى رقبتك بالبيادة هيفضل دايماً دايس.
8) متجمعين في الخداع وللأكاذيب متجرعين، متجشعين في الكراهية ولتميم وقردوخان متجمعين ومتدلدلين ومتجمعين في الخيانة، وفي الشرخ العربي مكملين.
9) العمر لحظة صدق للوطن، العمر لحظة حب للوطن، العمر لحظة فداء للوطن. صدق وحب وعمل وفداء = انتصار للوطن.
10) العين أم الباء؟ المشاريع أم المشاريب؟ تلك هي المشكلة. سادت الباء فساد وباء أصحاب المشاريب وغاب رخاء أصحاب المشاريع. إمتى تسودي يا عين ونشوف رخاءك فين؟.
11) عن خط بارليف: لكل حاييم إسرائيلي لئيم يوجد بطل مصري إسمه باقي طول عمره زكي وأمين على مصر زي النبي يوسف الصديق أكبر وأعظم منه في المقدار وهازم وقاهر له في الاتجاه.
12) زي ما بتاخد لازم تدي، ولو فاكر إنك بتدي لبلدك أكتر ما بتاخد، تبقى غلطان عشان كل اللي بيحصل ده للبنيان وعلاج دائم للمشاكل المتراكمة على مر الأزمان.
13) جنودنا الأبطال بتحافظ على الأوطان، والإعلام بيحافظ على الإعلان، ومفيش إعلان من غير وجود أوطان، ومفيش أوطان من غير وجود أبطال. المجد كل المجد لجنودنا الأبطال حتى لو ما اتكلمش عنهم إعلام الإعلان.
14) الانتماء للوطن والانتماء للتنظيم الدولي للخونة الإرهابيين دونت ميكس، وفي كل دول العالم محاربة الإرهاب ومحاربة كورونا دونت ميكس إلا في مصر بيمكس لوجود جيش وطني قوي من شعب مصري مخلص رافض لكل أتباع التنظيم الدولي للخونة الإرهابيين اللي دايماً مع الإرهاب بيمكس.
15) أما بلاوي بلاوي زارعينها في وطنا العربي بتقول كيماوي. يسمعها اللي دافع لهم ويعيدها تاني. كيماوي يقتل ولادنا ويحرق وطنا وتفرح بلاوي، وتطلع بلاوي تقولك أصله ما كانش ناوي يحاربك لولا الكيماوي. أما بلاوي بلاوي ربنا ياخدها ويحمي وطنا من كل خاين عالشر ناوي.
16) بكل إيجاز ملناش غير الإنجاز هو اللي بيهون كل الصعب ويحقق الإعجاز، وهو اللي بيحمينا بمعونة ربنا من كل خاين أو حاقد أو منحاز.
17) زيادة الاستهلاك بدون ابتكار في الإنتاج يساوي هلاك وحياة لونها بلاك حتى لو كان الحاكم ملاك.
18) يا أيها السيد المسئول غير المسئول عن كل مسئولياتك، لو تعرف وفاهم يعني إيه مسئولية؟ هتشتغل بكل إخلاص وضمير وذمة يا أيها السيد المسئول غير المسئول عن كل مسئولياتك.
ثالثاً: خواطر ورباعيات إدارية:
1) في السلم المقلوب فوق بقي تحت وتحت بقي فوق بالشقلوب، وفوق اللي عقله يادوب مابيسمعش لتحت المبدع الموهوب عشان السلم يفضل دايماً مقلوب. إصحي يا فوق وفوق، مش كل تحت فعلاً تحت، ولا كل فوق فعلاً فوق، ومسير تحت بمعونة ربنا هيعدلك يا سلم يا مقلوب.
2) مستشار مستشار مستشار لقب من نار ومنصب جبار، كله وقار وخبير في الكار مهمته الأساسية تقديم حلول للمشاكل اللي بيحتار قدامها أصحاب القرار، فيسهل له اختيار المسار السار ويبعده عن المسار الضار. فين راح كل مستشار اللي يستحق بجد لقب وقيمة مستشار؟ وليه ييجي مكانه مستعار؟.
3) قيادات ليست كالقيادات ما يقولونه في العلن غير ما يقولونه في الحجرات، أتباع لكل اللي فات وخادمين لكل من هو آت عشان كرسي ولا فلوس بقوا ضعاف نفوس فاقدي الكرامة قدام أنفسهم وإنسانيتهم قدام الناس.
4) عندما تسود المصالح الشخصية على المصالح العامة في أي مجتمع، تحدث عملية اتحاد وتوأمة بين طرفين: طرف أول منفذ الفساد وطرف ثاني مراقب ومكافح الفساد، فيتحول الفساد الجزئي غير القانوني إلى فساد كلي فهمي نظمي رسمي يأكل الأخضر واليابس والقالع واللابس في المجتمع.
5) لكل فاسداتي وحاسوداتي وحسيباتي: سيبك من الحساباتي والواسطاتي والمحسوبياتي، وركز في الإنجازاتي اللي بتصنع المعجزاتي وبتخلق القياداتي. فخلي دايماً راسك من غير بطحة تعيش دايماً في سعادة وفرحة.
6) من قاموس الواكع: الرقابة المالية هي التي تقارن الأرصدة المالية والمادية للسادة المسئولين بإنجازاتهم الفعلية كماً وكيفاً. بينما الرقابة المائية هي التي تتشكل وتتلون لتتوافق مع طبيعة حائزي الأرصدة دون النظر إلى طبيعة وحجم الإنجازات.
7) تتوقف سرعة اتخاذ القرار ودرجة عدالته على كفاءة الإتش آر ودرجة نزاهته، عشان الإتش آر عنصر هام في صناعة القرار وخطورته تظهر لما يتحيز لقرار، بيضلل متخذ القرار فيحبط الإتش ويبدد الآر، ومن هنا يبدأ الضرر والشرار.
8) ألف باء تنمية موارد بشرية التواصل مع كل الموارد البشرية والاقتناع بأنها موارد بشرية لا تقل أهمية عن المسئولين عن تنمية الموارد البشرية.
9) خبراء الجودة هم الأكثر دراية بكيفية تأهيلك لفهم وتطبيق نظام إدارة الجودة لإنجاز خطط العمل بأقصى كفاءة ممكنة، وليس الأكثر دراية بالحودة الشمال التي تزيد من حوكمة وجودة الفساد في كل المستويات الوظيفية.
10) واحد رايح بشلته، وواحد جاي بشلته، فياريت يا شلة اللي جاي تعرفي تشيلي شيلته زي ما بتشيلي غلته.
11) فيه ناس بتغير الكرسي، وناس تانية الكرسي بيغيرها. وفيه ناس بترفع الكرسي، وناس تانية الكرسي اللي رافعها، إسأل نفسك الأول: إنت إيه من غير الكرسي؟.
12) يعني إيه تعديلات هيكلية (لية مش ليهم): عدالة وإنصاف في الحقوق اللي ليا والواجبات اللي عليا بتبقى وصفة هنية تساع من الحبايب مية في الإنجازات والتنمية عشان بتحقق عدالة مكانية للمكان وعدالة تمكينية للإنسان فيتحقق مستقبل أفضل للأوطان.
13) لو فيه ناس معينة في أماكن معينة بتاخد مكافآت معينة، فلازم يكون عندها قدرات معينة وبتعمل أعمال معينة ما تقدرش تعملها ناس تانية غير معينة في الأماكن غير المعينة، وإلا الناس غير المعينة هتنقل عند الناس المعينة في الأماكن المعينة اللي بتقبض مكافآت معينة وما بتعملش الأعمال المعينة. ومش هيبقى عندنا ناس معينة بقدرات معينة في أماكن معينة بتقبض مكافآت معينة مقابل أعمال معينة (الحلقة المفرغة للتمييز غير المعيني).
14) مكافأة التميز يتم منحها بدون تحيز من مدير ذو عقل بيميز لموظف مميز بأداء كافة أعماله بكفاءة وتميز.
15) صعبان عليا اللي عايز يركب الموجة لما ترجع بيه الموجة تاني. ليه كده يا موجة ملكيش مبدأ؟ مش كنتي رايحة إيه اللي رجعك تاني؟.
16) ليه يا عقلية يا مصلحجية بتبقي سلم طريق واحد ذهاب للمصلحة الجاية من غير عودة للمصلحة السابقة، هتكتشف العقلية دي لما ييجي عليك الدور في سلم مصالحهم.
17) ببساطة: عم بسيط راضي بأبسط بسيط، وربنا بيبارك ويزيد. وتلاقي كام حويط بياخدو فلوس بالعبيط باصين لعم بسيط عشان يملوا كرشهم الغويط. فيا كرش يا متكرش، إمتى هتشبع يا أبو كرش يا متكرش؟.
18) الشاطرة برجول أو من غير رجول هتفضل دايماً في الأمام قاطرة، واللي جابولها رجول الدنيا كلها هتفضل برده مش شاطرة.
19) "لو دامت لغيري ما وصلت إلي" جملة يجب أن يفهمها ويعيها جيداً كل مسئول بيخشى الله فعلاً ويريد تكريس كل طاقته وخبراته وسلطاته لخدمة وتطوير المكان والإنسان اللي تحت رئاسته عشان دايماً بتحصل مقارنات بينه وبين اللي قبله واللي بعده. فياريت كل مسئول يركز في الهدف الأكبر والأسمى على المدى الطويل، وهو إنه يكون في أعلى درجات سلم التفضيلات ضمن المسئولين الأكثر قدرة وكفاءة وأمانة وإخلاص وعدالة، وليس في أسفل السلم ضمن المسئولين الظالمين المصلحجية الفاسدين المفسدين لمن حولهم. فلا يستحق أي منصب مهما كان أن يفقدك كرامتك تجاه نفسك أو إنسانيتك تجاه الناس أو أبديتك تجاه الله.





التعليق والتصويت على الموضوع في الموقع الرئيسي


اخر الافلام

.. الفنان أحمد عبدالعزيز يجبر بخاطر شاب ذوى الهمم صاحب واقعة ال

.. غيرته الفكرية عرضته لعقوبات صارمة




.. شراكة أميركية جزائرية في اللغة الانكليزية


.. نهال عنبر ترد على شائعة اعتزالها الفن: سأظل فى التمثيل لآخر




.. أول ظهور للفنان أحمد عبد العزيز مع شاب ذوى الهمم صاحب واقعة