الحوار المتمدن - موبايل
الموقع الرئيسي


من مذكرات حرب أكتوبر.. عزام وغريب

جمال الدين أحمد عزام

2021 / 10 / 5
الارهاب, الحرب والسلام


من مذكرات حرب أكتوبر
عزام وغريب:
كنت جندي لا سلكي في الكتيبة 43 المكلفة باقتحام نقطة بورتوفيق، في جنوب قناة السويس؛ أقوى نقطة في خط بارليف، وكنا اتدربنا على نموذج زيها بالضبط في عين حلوان.
كان ميعاد عبورنا بعد سعت س بثلاث ساعات. وبالفعل قرب المغرب نزلت سريتنا؛ السرية الثانية بقيادة النقيب جمال عزام القناة في ثلاث مجموعات مراكب، وكنت في مركب من المجموعة يسار مجموعة قائدي جمال، واللي تأخرت في النزول عنا بدقايق. وكان على راس مركبي الرقيب متطوع شكري مجلع؛ أو الوحش زي ما كنا بنسميه.
وبدأ الضرب من النقطة، ورغم ذلك نجحنا في الوصول للساتر، وفورا طلع شكري، وطلعت وراه. وبعدين لقيته رقد على الساتر، قلت له: يا شكري، أنت نمت ولا إيه؟! بصيت لقيت رصاصة داخله في راسه وطالعه من ورا. سحبت الجثمان وسلمته للي تحتي اللي سلمه للي تحته، لغاية ما نزلوه عند القارب.
وبدأ الضرب يشتد علينا من مزغل في دشمة غايره في الساتر؛ المدفع النص بوصة كان بيضرب بكثافة؛ لو عقب سيجارة يجيبه، النقطة ما كانتش بالقوة دي لما هاجمناها في الاستنزاف عام 1969، حفرت عشان أنزل تحت مستوى الضرب، وحاولت اتصل بقائدي جمال عشان أقوله الضرب علينا جامد، التفت لقيت قارب النقيب جمال، والقارب اللي جنبه وقارب مجموعة اللاسلكي وراه مضروبين، بس لقيت القائد جمال بيعوم ناحية الضفة الشرقية ومعاه مجموعة جنود، وكان مصاب.
الوضع كان سيء جدا؛ مجموعتنا مش عارفة تتمركز في الموقع، والمراكب بتضرب في الميه واحد ورا التاني، المدفع مش مخلي حد قادر يرفع راسه، لكن قائدي جمال وصل للضفة، وبعدين خد حزام قنابل وطلع الساتر، ودخل جري لجوه على الدشمة اللي جاي منها الضرب، ورمى فيها حزام القنابل ورمى نفسه وراه، وحصل انفجار شديد، المدفع سكت وهديت الأجواء وبدأت السرية تعبر.
جت لنا أوامر بحصار النقطة وحاصرناهم 8 أيام واستسلموا يوم 13. وبدأنا نجمع جثامين بعض الشهداء ولم نجد جثمان لقائدي جمال، كان المنظر صعب؛ أشلاء جمعناها في بطانية ودفناه في مقابر الشهداء بالسويس، رحمة الله عليه؛ كان مثال للخلق والتواضع، كان بطل لا يعرف المستحيل.
المقاتل جندي اللاسلكي؛ السعيد عبد المعطي غريب.





التعليق والتصويت على الموضوع في الموقع الرئيسي


اخر الافلام

.. منها متحف اللوفر..نظرة على المشهد الفني والثقافي المزدهر في


.. ماذا تضم منظومات الدفاع الجوي الإيرانية؟




.. صواريخ إسرائيلية تضرب موقعًا في إيران.. هل بدأ الرد الإسرائي

.. ضربات إسرائيلية استهدفت موقعاً عسكرياً في جنوب سوريا




.. هل يستمر التعتيم دون تبني الضربات من الجانب الإسرائيلي؟