الحوار المتمدن - موبايل
الموقع الرئيسي


يـَ (الكرخي) بس دلينه

ميسون نعيم الرومي

2021 / 10 / 22
الادب والفن

نصحونه نصبر نصطبر– ندري الصبر ياذينه
صرنه يربي مكفخه – ياهو اليجي يولينه
مدري قشامر صدگ ! – واجلاف تلعب بينه
واللي يصدگ بالنذل – مگرود وامضيع موازينه
والله الصبر ياذينه
***
لا شغل عدنه لا عمل – حسره علينه الفلس
حلت علينه الصدقه – هلسوْ وطنه هـَـلس
التـُهم عدهم جاهزه – واسهلهه طلقه اوحبس
عقدين مرّ امن الزمن – بس موت المخاوينه
اوندري الصبر لاوينه
***
-(بغداد) صارت تابعه – جيـران تلعب بيهه
گطعـَـوْ الماي ابقصد – حكـّامنه اتجاريهه
عطشت الگاع اتصحـّـرت – ياهو الذي يرويهه؟
يا ناس! المن نشتكي؟ - سافل مرتشي الوالينه
هذا الصبر چاوينه
***
اشِـفـّـنـَه يربي امن العمر؟ – حروب اورعب موت اوقهر
ثـروات عـِـدنه امتلتله – حصتنه حزن اوسـَـهر
اولهه (دكتاتور) العصر - وانوبه ولد الكفر
لعبونه زوج اوفرد – ابنار او جمر شعلونه
صار الصبر ياذينه
مدري شنو تالينه
*يـَ (الكرخي) .. رد اعلينه
------------------------------------------------------
*الكرخي الشاعر الشعبي العراقي المعروف عبود الكرخي
-(1861-1946) نظم الشعر باللهجة البغدادية
نظمت هذا النص على غرار قصيدته المشهورة (المجرشة)
-----------------------------------------------------------------------------
22/10/2021
ســــــــــــــــــتوكهولم

---

---

---

التعليق والتصويت على الموضوع في الموقع الرئيسي

---

.. الممثلة رولا حمادة تتأثر بعد حديثها عن رحيل الممثل فادي ابرا


.. جيران الفنان صلاح السعدنى : مش هيتعوض تانى راجل متواضع كان ب




.. ربنا يرحمك يا أرابيسك .. لقطات خاصة للفنان صلاح السعدنى قبل


.. آخر ظهور للفنان الراحل صلاح السعدني.. شوف قال إيه عن جيل الف




.. الحلقة السابعة لبرنامج على ضفاف المعرفة - لقاء مع الشاعر حسي