الحوار المتمدن - موبايل
الموقع الرئيسي


الله يذكرك بالخير يا كاكا شوان...

موسى فرج

2021 / 12 / 1
كتابات ساخرة


كاكا شوان صديقي وزميلي في الدائرة خلال عقدي السبعينيات والثمانينيات وكان قبل ذلك ضابط مهندس في معمل تجهيزات وزارة الدفاع الكائن في باب المعظم...
وكاكا شوان لأنه متفوق دراسياً ويروح بدربه ويجي بدربه بعثته الحكومه الى القاهرة للحصول على شهادة الماجستير في الهندسه...
كاكا شوان يكَول من چنت بالقاهره ما عندي قارش وارش ومن الجامعه للشقه ومن الشقه للجامعه بس ما أحب أكل المصريين فاذهب كل يوم جمعه لسوكَ الخضره اتسوكَ هالقاسمه الله... وبذاك اليوم آنا بسوكَ الخضره ومحمل بيذنجان وطماطه وخيار وعمبه وچان تجي لوريات عسكريه زيل وتقتحم السوكَ يكَول كل لوري بيه جنود أثنين واكَفين بالبدي وجنود أثنين يحضنون الواحد من أباطه ويناوشوه لزملاءهم البلبدي...
يكَول والله حطوا اديهم تحت أباطي وناوشوني لجماعتهم الفوك ماطولت الشغله دقائق معدودات تحركت اللوريات بينا واتجهت على طريق المطار يكَول آنا أحسّب مع نفسي ليش ...؟ وشنو السبب يجوز لأن لابس دشداشه وستره وهم يلبسون جلابيات ...؟ لكن هذا السبب غير كافي للإبعاد من أرض العروبه، احتمال الحكومتين العراقيه والمصريه خربانه العلاقه بينهم على حين غره فقررت الحكومه المصريه ابعادنا بس اللوريات مصريين همين بيها...
يكَول والله صرنا قريبين من المطار وكَفت اللوريات ونزلونا وكل واحد ينزل ينطوه علم ورقي ما اعرف أليادوله ويكَولوله هفي بالعلم من يمر الموكب اثاري بذاك اليوم جاي احمد سيكتوري ضيفاً على جمال عبد الناصر...كَول مر الموكب واحنا نهفي حيل وورا ما مر الموكب سربتونا واللوريات الجابتنا ما أجت حتى ترجعنا ونرجع كَحف وما وصلنا الا المغرب وطماطاتي راحن ووياهن الخيار والبيذنجان وكل مسواكَي للأسبوع...
هسا اليوم شفت فديو للناطق باسم احد فصائل المقاومه يكَول ما ألك محط رجل من الناس التطوعت لإجبار الأمريكان على مغادرة العراق ومن بين المتطوعين وعلى حد قوله شرائح المدنيين ومن يسمون أنفسهم أحزاب تشرين وطبعاً المدنيين والتشرينيين ما منخيين هذا بلدهم لكن اللي نسمعه أن الأمريكان مزهبين حالهم لرحيل قواتهم القتاليه من العراق والإبقاء على مستشارين وفنيين فقط...بهاي الحاله اليتطوعون مطلوب منهم المكاون لو يهفون بالعلم لتوديع الأمريكان مثل كاكا شوان ...؟؟؟





التعليق والتصويت على الموضوع في الموقع الرئيسي


اخر الافلام

.. إعلام إيراني يناقض الرواية العراقية حيال -قاعدة كالسو- وهجما

.. شبّه جمهورها ومحبيها بمتعاطي مخدر الحشيش..علي العميم يحلل أس



.. نبؤته تحققت!! .. ملك التوقعات يثير الجدل ومفاجأة جديدة عن فن

.. كل الزوايا - الكاتب الصحفي د. محمد الباز يتحدث عن كواليس اجت



.. المخرج الاردني أمجد الرشيد من مهرجان مالمو فيلم إن شاء الله