الحوار المتمدن
- موبايل
الموقع
الرئيسي
كأنى بموت
رمزى حلمى لوقا
2022 / 2 / 24الادب والفن
كَأنِّى بَمُوت
(عامية مصرية)
؛؛؛؛؛؛؛؛؛؛؛؛؛
قتلتوا الحِلم جوّايا يا أهل الخير
وأنا مش غِير
أنا عادى
مُجرد إسم
كان نكرة
صبح نكرة
وبكرة بتدفنوه
نكرة
ومش طمعان ولا بحلم
بأكتر من حيطان الستر
تئوينى
وتحمينى
كما الميت
ف ليل العتمة يدّارى
ويتحامى
ف ضل القبر والتوابيت
سلبتونى
صلبتونى
أنا والجرح والحواديت
كأنّى رِضيت
وأنا ف الحق مش عادى
لِقولة الحق مَعنَى وبيت
وأنا والحق مش راضى
ولا مشتاق
ولا عايز
ولا حنّيت
ولا قَبِّلت أعتابِك
ولا بابِك
وف غيابِك
ولا حطِّيت إيديّا ف شق
ولا اتعفرت يوم الجرح بترابِك
ولا اتحَنِّيت
ولا ف يوم اللُقَا هَجِّيت
أنا غضبان
يا جرح الجرح
من جوّة
وكتم الجرح مش هَيِّن
ولا قوة
أنا بصرخ بِ عِلو الصُّوت
أنا المكبوت
لكنّى ف اللُقَا بضحك
كَأنِّى بَمُوت
؛؛؛؛
كلمات
فبراير ٢٠٢٢
|
التعليق والتصويت على الموضوع في الموقع الرئيسي
.. VODCAST الميادين | مع الشاعر التونسي أنيس شوشان | 2024-03-27
.. إصابة نجل الفنان الراحل فؤاد المهندس إثر حريق داخل شقة
.. فودكاست الميادين| مع الممثل والكاتب والمخرج اللبناني رودني ح
.. كسرة أدهم الشاعر بعد ما فقد أعز أصحابه?? #مليحة
.. أدهم الشاعر يودع زمايله الشهداء في حادث هجوم معبر السلوم الب