الحوار المتمدن - موبايل
الموقع الرئيسي


اليوم لخمر .. غدا فجري

محمد نور الدين بن خديجة

2022 / 4 / 26
الادب والفن


محمد نورالدين بن خديجة
٣١ أغسطس ٢٠١٢ ·
اليوم لخمر ..غدا فجري ./
زجل : محمد نور الدين بن خديجة.
* * *



علاه يا ليل تنكر دمعي
وتشمت في قرعة ولكاس *
وندماني زادوا ندمي
ماعرفوا للخمر قياس
طلعت كمرة وطفى نجمي
واش نجمي بايت عساس ؟
داخت لفكار ..طال غشمي
وطريق ادات لبلا ولباس
ماغنيت ع العود نغمي
هذ النغمة طلعت ف الراس
نهرس العود ..نعض لحمي
بلاش علي ..نعض الوسواس
شلا ندبر ..نرثي لأمري
واش غدا خمري يتباس ؟
أمرؤ القيس ماهو عمري
كيف نسكر ..نفقد إحساس
قلت نحلا ..يدوقو شعري
طلع شعري حدجة * ونحاس
علاش ياشعري ..ساير تجري
بفضايح تحرض ف الناس؟
دار الكاس..وطاسة جمري
نحط إيدي ..نغرق الساس
تلهب النار كامل صبري
يطلع صبري خايب دساس
يشك ف نخل ..يسقط ثمري
ثمري مر ..مايليق لعراس
ماغلبتك علايل تمري
ف جسدك مخبي لهواس
ف جسدي كنت من صغري
امهرب شلا إحساس
غير بكلمة دمعي يجري
وتتهور في لنفاس

* * *

علاه يا ليل تنكر دمعي
وأنت يا ليل خاين خناس
خبيتي عني كمرة *سري
خليتيني ف ظلمه تدماس
فين لمصباح ..نشد طريقي
فين حماري خصو تحلاس
فين المنغاز ..زاد حريقي
هذ الدبرة مابغات نعاس
طار نومي ..هرب رفيقي
واش يهودا ولى كساس*
قلت نصبر لمسامر صلبي
دم لقصايد يرش الناس
تفرقت الطريق لفاهم يدري
كيف تدري ..طريقك تعكاس
وهب الريح بعجاج فقري
هذا فقري غلس تغلاس
فين لمصباح ..هاكو ثمري
نخلي علا ..علا ف حباس
لام لقفاص ..تعرف أمري
وجناح الطير ماعليه عساس
لازم الخيل تخرج تجري
تنزع لوتاد ..تهجر لمراس
فين الخيال لسمر خمري
علام العز..ماهر سياس
اليوم لخمر ..غدا فجري
وامرؤ القيس مزين بلباس
لابس لقروح ..قروح تسري
ناظم لهموم بميزان وقياس
كاشف لعيوب..شامخ نسري
ف مداد الدم..مغمس تغماس
ولو لهموم عكاز كبري
نسوس لقروح عواصف تتساس
بانت لقصايد فتانة تغري
كيف لصبري على نهود وكاس
بغيت نشرب يطلع زهري
لكن كاسي خصو لوناس
ياولد أمي وتعرف قدري
ما نبيع نديم ..مانكون نخاس
سوقهم هذاك ..فيه امبري
شحال يبيعوا بفلوس بخاس
كان طريقهم هو طريقي
كيف يهودا ولى كساس
نكروا دمي ودم حريقي
سرقوها حرثة ودراس
فين لمصباح ..نكشف خبري
هذ المصباح تهرس تهراس
نجمع زاجو ..لمداد حبري
نخط كلام ..يبرق ف ادلاس
قاصد أمري ..أمري يعري
شحال منهم قرد ونسناس
اليوم لخمر ..غدا فجري
فجركم ضاوي ..لازم يتباس


ـــ قرعة : قنينة
ــ حدجة : حنظل
ــشلا : كثير
ــ كساس : جاسوس





التعليق والتصويت على الموضوع في الموقع الرئيسي


اخر الافلام

.. الحلقة السابعة لبرنامج على ضفاف المعرفة - لقاء مع الشاعر حسي

.. الفنان أحمد عبد العزيز ينعى صلاح السعدنى .. ويعتذر عن انفعال



.. االموت يغيب الفنان المصري الكبير صلاح السعدني عن عمر ناهز 81

.. بحضور عمرو دياب وعدد من النجوم.. حفل أسطوري لنجل الفنان محمد



.. فنانو مصر يودعون صلاح السعدنى .. وانهيار ابنه