الحوار المتمدن - موبايل
الموقع الرئيسي


جحا العراقي عضو من أعضاء الجمعية المنتخبة

جحا العراقي

2006 / 9 / 20
كتابات ساخرة


أولا أخواني أحب أن اهدي أبيات قصيدة صديقي العزيز الأستاذ الشاعر مظفر النواب إلى جميع أعضاء الجمعية الوطنية ( بوي لازم تفرحون لان جتكم هدية وانتوا مشايفين يا مكاريد الجمعية ) لان أشوف هذه القصيدة تنطبق عليهم كلهم بدون استثناء فأرجو أن تعجبهم هديتي أعضاء الجمعية واني منتظر رأيهم بالقصيدة ورأي الجمهور بشاعرنا العظيم ..........

أولاد الفعلتي (......) لست خجولا حين أصارحكم بحقيقتكم
أن حظيرة خنزير اطهر من أطهركم
تتحرك دكت غسل الموت أما انتم لا تهتز لكم قصبة
ألان أعريكم في كل عواصم هذا الوطن العربي قتلتم فرحي
في كل زقاق أجد الأزلام أمامي
أصبحت أحاذر حتى الهاتف حتى الحيطان وحتى الأطفال
... إلى أن يقول ...........
يا شرفاء مهزومين ويا حكاما مهزومين ويا جمهورا مهزوما
ما أوسخنا ما أوسخنا ونكابر ما أوسخنا لا استثني أحدا
يا جمهور في الليل يداوم في قبر مؤسسة الحزن
سنصبح نحن يهود التاريخ وناوي بالصحراء بلا مأوى

وأحب أن أبين انه انتخابات طلع رئيس مفوضيتها حرامي ومرتشي شلون نعترف بيها ما ادري بس كلشي بالعراق ممكن .
وألان نبدأ بموضوعنا الأساسي وهو جحا عضو بالجمعية الوطنية بوي صدك شلون جمعية استهلاكية وشلون وطنية ( لطمية أحسن ) طبعا أصبح أخونا جحا العراقي عضو بالجمعية الوطنية وبسبب انه استفاد من الوضعية وجطل بحزب ديني ولزك نفسه وصار عضو حتى يدافع عن حقوق المظلومين من أبناء مو شعبه ولا طائفته أخوان لا تفتهمون غلط ودماغكم يروح كلش كلش بعيد يابه قصدي أبناء عائلته وعشيرته صدك مطي واستلم عضو جمعية شيسوي يكلابها كلاب كل الجمعية الوطنية من اكبر فردة حذاء بيها لأصغر أنعال وأنا اعتذر للنعال ألي شبهته بهيج ناس أرجو أن يتقبل شديد اعتذاري وأسفي الشديد .
طبعا الناس بره جاي تذبح وتتكتل يوميا بالمئات وضل أخونا جحا العراقي وي جماعته أول ما استلموا المقاعد البرلمانية ثلاثة أسابيع يعقدون اجتماعات مكثفة ويتباحثون ويومية مائتين جثة تذبح وتنقتل من الطرفين وهما جاي يجتمعون مو علمود الناس لا أخوان والله راح أخليكم تضحكون لو تعرفون علمود شنو علمود المخصصات المالية مالتهم ورواتبهم الحالية ورواتبهم التقاعدية ..... ناس مشايفة وحافية ونعال جانت تتحسر عليه وصارت بيوم وليله أعضاء شيسون غير يدكون طابع للشعب الي انتخبهم بمسميات وكلاوات حلوة جند المرجعية وتوافق المظلومين وابو رجاج وياهم وحوار مولدي وسحب وبعثي وتحالف النينجا الكردستاني الشوفيني مخبلني بهاي الكلمة محافظ اربيل كلما يطلع بالتلفزيون يعني على اساس انه هو وأبوه مو اكبر شوفنيين ( والشوفيني اخوان باللبناني تعني يعني باوعني او شوفني اشكد انا حلو واهمبل هوايه وهاي أرقام تلفوناتي اتصلوا بيه افتهمتوا اخوان ) . طبعا كعدوا ثلاث اسابيع يدرسون مخصصاصاتهم هي مو كالو محاصصة طائفية هي صارت بيناتهم مخاصصة مالية طبعا جميع أعضاء الجمعية الوطنية بدون استثناء ومن ضمنهم جحا العراقي اتفقوا ورفعوا أيديهم بالإجماع على المخصصات المالية الي تقدر بالآلاف الدولارات وراح أشوفكم ذولا الحثالة ولد الزبالة شسوه للشعب وشنو الاتفاقات الي جرت بيناتهم لان هم لو شرفاء جان طلعوا للشعب وكالولهم أحنا هلقد مخاصصات نستلم واحنا خيط برجل دجاجة ما نعرف نفتحه شلون راح ندير دولة ..
وهسه لازم اذكر ميزات أخوانا الي رحنا متحدين الموت لنتتخب هولاء الزبايل الي لا صوها ازيد من رئيس الوزراء السابق عبقرينو قصدي جعفرينو الي هو اساس الخربطة كلها بهذا البلد أي صدك نسيت مو هو الي جان راح يخلي الناس يعيشون بالجنة ويدخلون الجنة صدك فهيم .
وناتي للمخصصات الجمعية الاستهلاكية .....

1. راتب جحا العراقي بالجمعية الوطنية هو تسعة آلاف دولار أمريكي لان هم ما يعترفون بالدينار العراقي لأنهم صناعة أمريكية فلازم يأخذون بالأمريكي .
2. راتب الحماية والمرافقين جماعة الجمعية الوطنية (مجموعه مبالغ الحماية لكل عضو ) خمسة آلاف دولار وصعد إلى سبعة آلاف دولار تعطى لجحا وأعضاء الجمعية ويقوم كل عضو وجحا العراقي معهم بتوزيع نصف هذه المبالغ للحماية والباقي بجيب جحا وأعضاء الجمعية لان مستخسرين على حمايتهم أن يعطوهم كامل الفلوس .. تعرفون اخوانا حثالة ومشايفين فلوس شيسون حقهم عاد وراح نجي بالترتيب نذكرهم التحالف الكردستاني نصف أعضاءه يسلمون نصف مخصصات الحماية والباقي بجيبهم جبهة التوافق العراقية نصف المبالغ للحماية والباقي في الجيب الائتلاف الموحد العراقي نصفه يعطي نصف المبالغ الحماية ومن ضمنهم الرفيق الي راد يصير رئيس وزراء عادل عبد المهدي الجلف ابن الجلف والباقي بجيبهم أما جماعة حزب الفضيلة وبعض من أعضاء المحافظات الجنوبية فقد وجدوا طريقة أسهل هي تسجيل مرافقيهم والحمايات في وزارة الداخلية وإعطائهم رواتب من وزارة الداخلية وهم يداومون حماية للعضو لكي يتسنى العضو اخذ جميع المبلغ ولغفه في جيبه طبعا أنا مستعد انه اعطي اسماء وقوائم كاملة لكن راح اكتفي بان يفتح تحقيق من قبل أي جهة ماعدا مفوضية النزاهة الايرانية حتى يعرفون مدى صحة هذا الأمر وإذا اكو شريف ابن شريف من الجمعية خلي يطلع يكذب هذا الأمر ويقول ماكو هيج شي بس صدقوني ماكو شريف .
3 . تعرف الجماعة مشايفين ويريدون فلوس لذلك اقروا لهم مخصصات بالبداية مئة الف دولار لكل عضو جمعية وطنية أي ما يعادل مئة وخمسون مليون دينار عراقي .
4 . بسبب ان جحا العراقي وأعضاء الجمعية نفسهم جايفة رجعوا مرة أخرى بعد ثلاثة اشهر باقرار مخصصات جديدة لهم بستين الف دولار يعني تسعون مليون عراقي .
5 .استلموا سيارات وايفادات وعطلات ومخصصات أكل ينصرفلهم طبعا كل هذا وعطلتهم صارت بوقت مال ناس جاي تذبح بالشارع وهم رايحين لدول أوربية يفترون بيها ولا الهم علاقة بالناس الي راحت انتخبتهم صدك خوش حراميه والصرف كله على الدولة ومخصصات الايفاد لأي عضو بالجمعية تعادل رواتب عشرين موظف لمدة سنة وانتو حسبوها عدل ..
6 . طبعا الأخوان كلش مشايفين توزعت الهم مسدسات ليقوموا بدورهم بتسليمها الى حراسهم الشخصيين والى حمايتهم فكاموا الاخوان ومعهم جحا بتوزيع هذه المسدسات لاقربائهم لان الحماية عندها رشاشات شيسوي بالمسدسات صدك كلش مشايفين وميستحون واولهم جحا .
7 . طبعا جحا شعنده اقرباء من جده السابع عشر وانت صاعد جابوهم وعينوهم بأرقى مناصب الدولة بحكم علاقاته الرائعة الي صارتله وهو مشايف عادي هي بقت على هاي .
8 . طبعا حتى أعضاء كل حزب جابوه للمقاعد الجمعية أقربائهم إلي اكو بيهم حتى ممسجلين بالحزب اصلا بس لخاطر رئيس الحزب اما القياديين والمناضلين الحقيقين بالحزب الي ماطلعين على الصورة دكولهم طابع صدك للكلاب حظوظ .
9 . البلد محترك ومشعول شعل وهم قاعدين يناقشون امور مو اساسية وتاركيلي كل الامور الأساسية يناقشون كم يوم عطلة الهم وعطلتهم السنوية وكم يوم سفراتهم وايفادتهم وتاركيلي الناس الي انتخبتهم تذبح وتموت بهاي المفخخات والقتل اليومي صدك فهيمين كلش .

طبعا أحلى شي بالموضوع انه خوالنا الأمريكان من شافوا أعضاء الجمعية هيج قشامر كاموا يلعبون بيهم طوبة يومية يفتشون سيارتهم بالكلاب البوليسية ومن خلال أحقر جندي عندهم هم الجنود السود ويخلون كل عضو الكلب يشمشمه ترى حتى رئيس الوزراء من ضمن إلي يفتشون بهيج طريقة حتى يقولولهم دائما انتوا عبيدنا واحنا أسيادكم طبعا وكل هاي وهم بعد كاموا يكفخون بجحا العراقي وكل عضو بالجمعية هاي طبعا الأمريكان يومية يسوون هيج من قبل الجنود ويضحكون عليهم لان اصغر جندي أمريكي يدوس على رأس اكبر عضو بالجمعية الوطنية وكلشي ما يقدر يحجي او يفتح حلقه صدك تفووه على هيج فلوس تخلي البشر ينذل للمحتل افتهمتوا اخوانا. وخالنا السفير الامريكي الغرفة مال اجتماعاته قريبة على غرفة الجمعية وغرفته التبريد مالتها يهرش هرش يخبل طبعا وغرفة الجمعية عاطل تبريدهم اربعة اشهر والأمريكان ما يقبلون يصلحوه التبريد وما يقبلون يخلون أي واحد من أعضاء الجمعية يتكفل بتصليحه لان يريدوهم يخلوهم بالحر يجتمعون ويريدون يذلوهم ويبنولهم أنهم زبالة ومستواهم الحر .
الحكومة الحالية الي يعتبروها حكومة وحدة عفطية لمن تعاركوا ويوميه ما يقبلون يشكلوها وطولت سالفتهم بشكل مو طبيعي اجاءهم امر من قبل خالنا السفير الأمريكي ان تشكل حكومة بثلاثة أيام بحيث انه انطى امر لجميع حراس الامريكين بالقصر أي عضو من اللجنة تشكيل الحكومة اذا طلع باب القصر يطلقون عليه النار طبعا كان المستثنى الوحيدين هما أياد عاوي رجل الرحلة مع اغبى رجل بالعالم رئيس جمهورية العراق .
صدقوني اخوان انا الشخص الوحيد الي عجبني هو رئيس الجمعية الوطنية بشغلتين الشغلة الأولى انه يعامل اعضاء الجمعية ومن ضمنهم جحا العراقي على اساس انهم زعاطيط وهذا احلى شي لان صدقوني باستفتاء طلبت من اصدقائي يسوه اثبتت ان جلسات الجمعية العفطية اكثر من ستين بالمائة من الشعب العراقي وخاصة اهل محلات الجملة والمفرد الي عدهم تلفزيونات يتابعوها لان ضايجين وهي الشي الوحيد الي تخلي الناس يضحكون وخاصة من خلال اداء المايسترو العظيم رئيس الجمعية الوطنية لانه يعرف يرزل ويوكف كل عضو عند حده .
وثانيا عجبني رئيس الجمعية الوطنية من استقبل الوزير الايراني بالعراق بملابس العرب الاحواز كان تصرف ذكي وشكه شك للسفير الايراني لان تعرفون انه إيران تكره العرب خاصة الموجودين بالاحواز رغم انه اكثر الايرانيين يجطلون نسبهم للرسول وهم اصلا ما يعترفون بالعرب بس يجطلون لان للضرورة أحكام والغاية تبرر الوسيلة .
انا بس حبيت اشووفكم جزء من الصورة من دون ان أتدخل في ما يحول فعله جحا العراقي وأعضاء الجمعية من خلال محاولتهم عقد صفقات واستغلال مركز أعمار العراق لتحويل صفقات إلى أقربائهم للاستفادة من الصفقة بنسب عالية تصل إلى أربعين بالمائة من قيمة الصفقة واكتفي بهذا القدر لأني ما أريد اطلع كل الخياس.... .. يا عراق هل بلغت يا عراق فاشهد ...

حكمه الحلقة ( لا يوجد هناك شريف في الجمعية الوطنية يطالب بالحق العراقي ولكن هناك حثالة في الجمعية تسرق حقوق العراقيين ) .





التعليق والتصويت على الموضوع في الموقع الرئيسي


اخر الافلام

.. شبيه عادل ا?مام يظهر فى عزاء الفنانة شيرين سيف النصر


.. وصول نقيب الفنانين أشرف زكي لأداء واجب العزاء في الراحلة شير



.. عزاء الفنانة شيرين سيف النصر تجهيزات واستعدادات استقبال نجوم

.. تفاعلكم : الفنان محمد عبده يطمئن جمهوره على صحته ويتألق مع س



.. المخرج التونسي عبد الحميد بوشناق يكشف عن أسباب اعتماده على ق