الحوار المتمدن - موبايل
الموقع الرئيسي


الوصايا العشر لغبطة البطريرك ساكو!

ظافر شانو

2025 / 11 / 5
العلمانية، الدين السياسي ونقد الفكر الديني


تحية وبعد:

غبطة البطريرك ساكو ينشر على الملأ وصاياه العشر للعراق والعراقيين! على غرار وصايا الرب الإله القدير العشر التي سلمها لموسى! ماذا كان يومها غبطته قد تناول على العشاء؟ لا أعلم! لكني أعلم شئ واحد فقط, وهو أنني أحاول دائما تجاوز تصريحات وكتابات هذا الرجل, لكنها لا تتركني بسلام وتقودني للكتابة والكلام!

طيب عزيزي غبطة البطريرك بوصاياك العشر هذه التي تخاطب بها العراق والعراقيين, ما هو وضعك منها؟ هل أنت شايف نفسك هنا الإله القدير أم موسى؟ البعض يتسائل, لماذا هذا الرجل "أي أنا" يتحارش بغبطة البطريرك؟ وأجيب وأقول لأنه يُنطق الحجر بسوالفه هذه, ومن موضوعه هذا (كيفَ نَجعلُ العراقَ يعودُ عظيماً؟) سأتناول نقطتين فقط منه وأستشهد بالثالثة لأبين وجهة نظري بالفصحى والعامية.

النقطة الأولى: قول غبطته (نحن بحاجة الى قبطان او فريق من القباطنة يعتمد شكلاً مناسباً يقود قارب العراق الى برّ الأمان)! عزيزي ساكو هل تعلم بأنه " ما طيح حظ العراق والعراقيين غير هذوله القباطنه اللي تريد تبلينا بيهم مثل ما أبلتى العراق بيهم بعد تغيير نظام صدام" خلي أفهمك شنو السالفة بأعتبار أن راسك فريد من نوعه! وأتحداك أنت نفسك أنك فاهم راسك عباره عن شنو؟!! حبيبي أمريكا خلصتنا من نظام, الله مال الغالبية العايشين بيه بنفسه ما گدر يخلصنا منه! وسلمت الحكم يومها لمن يقولون عن أنفسهم أنهم يمثلون الشعب العراقي! خوش حچي, وگالت ألهم روحوا أبنوا العراق وتنعموا بالحرية والديمقراطية, القباطنه هذوله گعدوا على الطاولة وتمالخوا بيناتهم! هذا شيعي ذاك سني ذاك كردي هذا تركماني وذاك من دول الجوار! كلمن محضر السچينه مالته يذبح بالعراق الثور!! والمساكين أصحاب الأرض الحقيقيين رايحين بالرجلين!! والعالم يتفرج على هل "القباطنة" المؤمنين الصايمين المصلين مال تالي وكت شلون جاي يقودون العراق بنظرية "بيها صالح"! وهاي ما يزيد عن عقدين من الزمن حايريين شلون يطيحون بحظ العراق والعراقيين! وتالي ما تالي يجيلي واحد ما أعرف ربنا شنو من راس حاط فوق جسمه يكلمنا عن "قباطين"!!!

النقطة الثانية: قولك في الوصية الرابعة من وصاياك العشرة سلام الله عليك ( إقامة دولة مدنيّة، مبنيّة على أساس المواطنة والعدالة والمساواة والحرية والكرامة. النظامالمدني ليس ضد الديانة.) !! نعم عزيزي أتفق معك بأن في كل الدول المتقدمة ودساتيرها نجد بأن النظام المدني ليس ضد الديانة, إلا في الدول العربية والأسلامية حصراً حيث نجد النظام الديني ضد المدنية!! سيقول البعض لي "عيب تجيب كلام من جيبك" وسأجيب من الدستور العراقي ومنه آتي بالدليل على صحة كلامي:

المادة (٢)
اولاً:- الاسـلام دين الدولــة الرسمي، وهـو مصدر أســاس للتشريع :
أ -لا يجوز سن قانون يتعارض مع ثوابت احكام الاسلام .

وكما ترى وبكل وضوح نحن بعد المادة ثانيا والفقرة "أ" منه لم نعد بحاجة لدستور عراقي مدني!! بل دستور العراق هو القرآن ومن يعترض على هذا الكلام يروح يضرب راسه بالحايط لو يطمسه بالخيسة, واللي ما عاجبه الباب يفوت جمل! طيب وماذا يقول القرآن دستور العراق في المحصلة النهاية وخلاصة الكلام:

{وَمَن يَبْتَغِ غَيْرَ الإِسْلاَمِ دِيناً فَلَنْ يُقْبَلَ مِنْهُ وَهُوَ فِي الآخِرَةِ مِنَ الْخَاسِرِينَ} [آل عمران:85]. خوش حچي, وصلتك الفكرة لو بعد؟! فگلي بروح أبوك عن يا مدنية جاي تغني وتسولف بيها؟! والدستور العراقي يقدم دين الأغلبية على المدنية؟! والأغلبية هم أحرار وعاجبهم هذا الكلام ولا إعتراض عليه من قبلهم! فيا حبيبي من تجي تسولف بسالفة عليك أن تفهم كل ما يحيط بها ومن جميع الجوانب وبعدين تعال وسولف ولا تصير لعبة للعالم بدون داعي! المصيبة هنا فوگ ضيم القرآن ويانا كمسيحيين أنت شايل چاكوچك بيدك ونازل دگ وتأوين بالكنيسة وتراثها!! وتسولفنا بوصيتك رقم واحد عن ( العودة من دون انتقاء أو تطرف الى جذورنا التاريخية والحضارية المتنوعة الثرية)!! هسه هم أكو واحد يلومني من أگول ما أعرف راسك الشايله يا موديل؟!! گلي أنت شلون جاي تمثل كنيسة المسيح في العراق والعالم؟ وأي صورة جاي تقدم عن الراعي المسيحي!! وأنت حاط خشمك بسوالف مالك أي علاقة بيها! وتهدم بالسوالف اللي الك علاقة بيها والمفروض لازم تحافظ عليها!!!..

حبيبي القبطان ساكو نصيحة مجانية لوجه الله تعالى من أخوك أبو يوسف ظافر شانو, روح أبتعد عن العالم شوية وروح شوفلك هور أو جبل أو وادي أو صحراء أعتبرها صومعه أعتزل بيها كما كان يفعل آباء الكنيسة والرهبان, تره حتى السيد المسيح كان أوقات يختلي بنفسه ويترك التلاميذ ويصلي الى الآب!! هسه قابل أنت أفهم من هذوله كلهم يوميه طالعلنا بسالفه "لو العب لو أخربط الملعب والمصيبة انت ماكو بيدك شئ!!" بس الجماعة ياخذون بأسمك وباسم المسيحيين بالعراق مساعدات الدول والجمعيات ويوزعونها على ربعهم والمسيحي بالعراق گاتله الضيم والقهر والفگر والخوف جاك الذيب وجاك الواوي!! والقهر يوميه واحد دازلي رساله بلكد تساعدني!! عباله آني غبطة البطريرك القبطان ساكو!!

روح عزيزي اعط ما لله الى الله وصب أهتمامك بهذا الجانب وعوف قيصر وجماعته لحالهم وصلي من أجل نفسك وأجلنا وأجلهم والعراق أن ربنا يزيل عنك وعنا وعنهم محبة الذات ومرض الكبرياء والمال والعالم بلكد ربنا يستجيب لصلواتك, عزيزي مره وحده بحياتك صفي دماغك وأصفن بسوالف كان يهتم بيها تلاميذ المسيح الفعليين, فمملكتنا كمسيحيين حقيقيين ليست من هذا العالم.





التعليق والتصويت على الموضوع في الموقع الرئيسي


التعليقات

1 - الوصايا العشر لغبطة البطريرك ساكو!
kamal ( 2025 / 11 / 5 - 14:25 )
الأخ ظافر المحترم
لو عندي ايميلك اكتب
هذا الموقع أي مسيحي يقرأ بيه
هل شفت واحد يعلق
هل قاري كتاب البطرك عن الأسلام
هل كان يحتاج أن يبقى في السوربون أو روما لكي يأخذ شهادة في الفقه الأسلامي
وشهادة في المراسلات الدبلوماسية بين الفرس والبيزنطيين
وما فائدة هذه لمكانته
ويفتخر بكل مقابلة أنا عندي دكتوراه
وبسبب هذه الشهادة عندما لم يقبل أن يرجع الى العراق نصحه كوركيس كرمو بأن أصحاب الشهادة غير مشمولين بالخدمة العسكرية ولما رجع طلبوا للخدمة، وطلب مقابلة صدام، وعفاه وقال له صلي الي، والآف المسيحين استشهدوا من أجل العروبة
وشط العرب
وصدام قال شنسوي بيه بعد ثمان سنوات دمار
وأجونا اللصوص وكل واحد عند كتوراه في السرقة
رئيس الجمهورية منطي شغلة خمسين مليون دولار مناقصة الى زوج وحدة من السليمانية مقابل عماراتها ملوين دولار وشوية حلي مجوهرات بأسم زوج صديقة زوجة فخامة رئيس الجمهورية فقط يوزع شربت رمان ومن السما هدايا ويستلم بلاوي- وهو نايم ينتظر بالباب يستقبل ريات الكلداني

2 - شكر وتقدير
Dhafer Shano ( 2025 / 11 / 9 - 13:42 )
الأخ كمال شكرا لمرورك ومداخلتك لقد خسرنا العراق ولا أريد لغبطة البطريرك ساكو أن يكون شريك في هذه اللعبة كونه يمثل غالبية مسيحيي العراق, وكذلك لا أريد له أن يكون عبداً للفاتيكان! تحياتي

اخر الافلام

.. المندوب الأمريكي لدى الأمم المتحدة: دعم الدول ذات الأغلبية ا

.. ما موقف الدول العربية والإسلامية من مشروع القرار الأمريكي؟




.. أويس مخللاتي يحول ديانته من الإسلام إلى المسيحية


.. أويس مخللاتي يتحوّل إلى المسيحية و-بيست لاند- في موسم الرياض



.. روان عثمان: لستُ خائنة واليهود ليسوا أعداء العرب | #السؤال_ا