الحوار المتمدن - موبايل
الموقع الرئيسي


فيلم كرتون

عمر عبد العزيز

2009 / 12 / 13
الادب والفن


زمان و أنا صغير
كنت بشوف العالم كله صور كرتون
ناطقة محبة كل شرورها بّره الكون
عالم ساكنه الخير و الحب دافي بجد
كنت بحس حيطان و كراسي البيت من لحم و دم
كنت بشوف العالم بيت ... حيطانه الأب و ناسه الأم

كنت بشوف الناس شبعانة و مفيش جوع
حب يشبع ضل يرضع صلاة في خشوع
كنت بشوف الناس بتشع دفا بقلوبها
ناس بتحس في حضن الثاني بيجي حسابها


و أنا
أنا كان أخري و كل مطالبي حب الناس
اللي بشوفهم في أحلامهم و في أوجاعهم فتافيت ماس
حتى الناس الناس التانية كنت شايف ليهم ميت عذر
أصل يا دنيا حتى الشوك بيطلع في الآخر من بذر

زمان و أنا صغير
كنت بشوف الصبار تزرعه يطرح فرحة
شوكه كان مغطي عروسة بأجمل طرحة
كنت بحس الكره في عيشتي طريق مهجور
خطوة قلبي أنا و أصحابي تملاه نور

حضن الشارع كان بيسعنا الساكنين من تحت لفوق
اللي في بقه طعم البيتزا و اللي ما يحلم حتى يدوق

و نبتدي نكبر
يجرح عمرنا عيونا يسرسب في قلوبنا الغل
نشوف الفرق ما بينا و ينكشف اللي عنده سر

و تفترق الطرق بينا دروب و حواري و مسالك
و نتفرق و نتقسّم ما بين ناجي و بين هالك
و نبتدي نلمس القسمة ما بين شمس و نصيب حالك
و مين فينا بيتكعبل و مين اللي في الحياه سالك

و نكبر أكتر
تجرجر فينا أيامنا و نكتشف ان مالناش بيت
نشوف الدنيا خرسانة تبوّر في قلوبنا الغيط
تضخ الضعف في وريدنا و تملا قلوبنا بالتجاعيد
تكسر حلم عاش فينا و تسقينا العطش جرعات
و تملا الوحدة و الغربة حياتنا بزحمة الخيالات
و ينزوي الفرح فينا و يصبح العزا احتفالات
نحس بوحدة في الزحمة و ان اجمل غنانا سكات

و فجأة
نبص نلاقي أطفالنا بتمرح ويا حلم قديم
و كل اللي اتزرع فينا بيطرح في سماهم غيم
و نلمح في عيونهم ضي يعيد الماضي و الحكايات

و تجري الدنيا و نشوفهم بداية جديدة لحلم قديم
لفيلم اتشال من السينمات





التعليق والتصويت على الموضوع في الموقع الرئيسي


اخر الافلام

.. بل: برامج تعليم اللغة الإنكليزية موجودة بدول شمال أفريقيا


.. أغنية خاصة من ثلاثي البهجة الفنانة فاطمة محمد علي وبناتها لـ



.. اللعبة قلبت بسلطنة بين الأم وبناتها.. شوية طَرَب???? مع ثلاث

.. لعبة مليانة ضحك وبهجة وغنا مع ثلاثي البهجة الفنانة فاطمة محم



.. الفنانة فاطمة محمد علي ممثلة موهوبة بدرجة امتياز.. تعالوا نع