الحوار المتمدن - موبايل
الموقع الرئيسي


إنتي

مزمل الباقر

2015 / 2 / 26
الادب والفن



شفتي الوردة
الجبتيها .. لي
لسه .. احساسا ..
معاي..
نفس الرجفة
نفس البسمة
الضحكة
نفس الشمس
الغاربة
غربت هسع
مع انو نحنا ..
في أول ..ساعات اليوم

ياهو إحساسك .. زاتو
معاي
وانتي بتضحكي ..
من احساسيسي
المضطربة
ما قادرة تصدقي ..
اني بدوب .. من
وردة



وانتي الوردة
الداخلة ..
في جيب .. قلبي
وانتي .. قبالي (1 )
بستان .. أوركيد
نرجس .. متفتح
ياسمين .. بوزع في
البسمات
لكل الدنيا

"ح تجي البت الحديقة"( 2 )
حاسي كأنك ..
كنتي .. في خاطر
الشاعر .. وكت نظم
الغُنية
وكنتي ..ساكنة
في حس
فنانا .. لمن
فجّر .. فينا
عوالم .. الدهشة

وانتي ... الدهشة
لما تعشعش في .. عيون
طفلة
ساكة .. فراشة

وانتي ... رهافة
رهافة حس . خطوات النسمة
فوق .. القش

وانتي .. الضل . التحتو
بقيل ..
" الدخل القش .. وما قال كش"(3 )
وإنتي .. الرعشة
في إيد .. فنان
ماسك .. الريشة
ساعة .. إلهام


وانتي .. غمام.. رحال
بارا . مزارعية ..
في حر ... الصيف
قبل السقيا .. بقى شمشية (4 )
وانتي .. خريفاً
زارنا .. داعشو(5 )
وطمن ناس ..
وسعيّة (6 )


انتي .. الشوق
الشرّك لي (7 ) .. في الشارع
وحماني ( 8) .. الرجعة
وبقى زي وطنك .. شاسع

وانتي إحساساً
مارق منك .. وداخل فيا
وبطلع مني ..
ويرجع ليك
في شكل ..
هدية

يا قامة
بتشمخ
نخلة .. مديدة
كيف بالله
أجسد .. أشواق ..
في قلبي
واقولا ... قصيدة ؟
وإنتي الشعر .. الما اتقال

انتي.. محال
انتي .. آمال
انتي .. منال
انتي .. سؤال
فعيون شافع(9 )
تاه .. منو التعبير

انتي .. المنشور
البتحاوم (10)..
بين .. الارصفة
وجووه .. الشارع
البحلم .. بالتغيير

وانتي .. صدق
القول
الكتبو الاستاذ (11 ) .. قبل المشنقة والإعدام
الواقف .. في وش
جبروت .. حاكم (12 )
في زمن .. الغش


وانتي .. صلابة
ضابط (13 )
ماسك .. رشاشو
وبيحصد ..
لو .. ما هدوا (14 ) .. فيهو
البنيان
كان .. ما خلى
الغاشم .. يمرح
في .. السودان

وانتي .. شهيداً (15 ) ..
مشى للموت
مرفوع .. الراس
سيجارتو .. في إيديو
كانو ..
بتمشي
في .. شارع
النيل
وخشمو .. بيلعب
بالدخان ..


وانتي .. جسارة
الثوري
الشاقي .. هتافو
البمبان (16 )

إنتي .. حلم
في
هجعة (17 ) عامل
شاف نفسو
ساكن .. جووه عمارة
بي إيدو .. بناها


وإنتي .. إيمان
شعشع .. نور
وغطى الكون
ساكن ..
جووه .. بنيّة
حنيّنة (18 )..

يا .. الشايلة
عبق .. النسوان
الوقفن
في وش
البطال
من العادات
والمعتقدات
ناس فاطنة وسعاد ونفيسة (19 ) .. والقائمة
تطول

يا .. الواقفة
بين الحاصل .. والما معقول

خلاص .. القول
دايرك .. بالجد
معاي . في الشارع
في البيت
قمراً .. ما بصيبو
أفول ..


مزمل الباقر
الخرطوم في 10 فبراير 2014م

(1) قبالي : أمامي
(2) ح تجي البت الحديقة .. مقطع من اغنية: البت الحديقة من كلمات: خطاب حسن أحمد وغناء مصطفى سيد أحمد،.. وفنانا : أي فنانها
(3) دخل القش وما قال كش: هو لغز شعبي مشهور في السودان ويكون حل اللغز بأن الشيء المقصود هو الظل
(4) شمشية: مظلة
(5) الداعش: هي رائحة المطر وتشبه رائحة التراب المبلل
(6) طمن: طمأن . والسعية: هي الماشية
(7) الشرك لي : نصب لي فخاً
(8) حماني الرجعة: منعني من العودة
(9) شافع: طفل يافع
(10) البتحاوم : الذي يتجول
(11) الاستاذ محمود محمد طه . والقول المقصود هنا مقاله المعنون ب: هذا أو الطوفان
(12) الحاكم هو الرئيس المخلوع: جعفر محمد نميري
(13) الضابط: عبد الفضيل الماظ
(14) هدوا فيهو البنيان: اضطر المستعمر لهدم حائط المستشفى لإسكات المدفع الرشاش الذي ظل الشهيد عبد الفضيل الماظ ضاغطاً على زناده بعد موته
(15) الشهيد: جوزيف قرنق
(16) البمبان: الغاز المسيل للدموع
(17)هجعة: نوم القيلولة
(18) بنيّة حنيّنة: طفلة حنونة
(19) فاطمة أحمد ابراهيم، سعاد ابراهيم أحمد ونفيسة الأمين





التعليق والتصويت على الموضوع في الموقع الرئيسي


اخر الافلام

.. بل: برامج تعليم اللغة الإنكليزية موجودة بدول شمال أفريقيا


.. أغنية خاصة من ثلاثي البهجة الفنانة فاطمة محمد علي وبناتها لـ



.. اللعبة قلبت بسلطنة بين الأم وبناتها.. شوية طَرَب???? مع ثلاث

.. لعبة مليانة ضحك وبهجة وغنا مع ثلاثي البهجة الفنانة فاطمة محم



.. الفنانة فاطمة محمد علي ممثلة موهوبة بدرجة امتياز.. تعالوا نع