الحوار المتمدن - موبايل
الموقع الرئيسي


مّيمَة .. أنا توحشتك

سليمان الهواري

2017 / 3 / 23
الادب والفن


مّيمَة .. أنا توحشتك
************
مّيمَة
أنا توحشتك
نمرّغ شفايفي ف يديك
منك نسمع غي كليمة
سير الله يرضي عليك
أنا مفرشاك بالرضى
ومغطياك بالرضى
تمشي و ترجع ف النجا
من هادوك
لي قهروك
يد الله ترعاك
ديمَة ديمَة
مّيمَة
أنا توحشتك
نغراق ف صدرك
نبوس جبهتك
نشم ريحتك
بغيت منك
و لوْ غي تسليمة
تسليمة وحدة منك الميمة
نهرق دموعي عليك
نشكي زماني ليك
نتنفس همّ بلادي
همّ ولادي
بيني و بين الفرحة
ألف تخميمة و تخميمة
مّيمَة
أنا توحشتك
مْضيوم وْلدك
عْييت أنا ف غربتي
كل ما الناس كثرو جنبي
غراقيت أنا فِيّا
دموعي يبسات طرف عيوني
تتسنى صباح ما بْغا يطلع
نهاراتنا يا مّي
غِيمة تاكل غيمة
وْلا شمس تطلع
في عيون الاولاد
الحكرة سرقات مْنّا التبسيمة
مّيمَة
أنا توحشتك
تْعالي
نشرب من لسانك
صْبر الايام
جغيمة جغيمة
تْعالي
زغرتي لنهارنا لي جاي
نعاودو توزيعة البلاد
الصابة تتفرق بالعبرة
وكلها
لي جاه ف حقو
يْدّيه
يخضار ربيعنا
نعْرّسُو ل بناتنا
نداويوْ جراح الارض
يوْلّي عيدك
بصح عيدك
ترجع لينا
فرحتنا القديمة
مّيمَة
أنا توحشتك
بْصّح
أنا توحشتك
مّيمَة
*** رضا الموسوي /21مارس2017***





التعليق والتصويت على الموضوع في الموقع الرئيسي


اخر الافلام

.. حورية فرغلي: اخترت تقديم -رابونزل بالمصري- عشان ما تعملتش قب

.. بل: برامج تعليم اللغة الإنكليزية موجودة بدول شمال أفريقيا




.. أغنية خاصة من ثلاثي البهجة الفنانة فاطمة محمد علي وبناتها لـ

.. اللعبة قلبت بسلطنة بين الأم وبناتها.. شوية طَرَب???? مع ثلاث



.. لعبة مليانة ضحك وبهجة وغنا مع ثلاثي البهجة الفنانة فاطمة محم