الحوار المتمدن - موبايل
الموقع الرئيسي


قصيدة خرابيش

رمزى حلمى لوقا

2018 / 4 / 29
الادب والفن


خرابيش
***
زرع الأسية
يطرح غناوى عِناد
إعلنها ساعة حداد
دوس ع الزناد
و اقتل أعز ما ليك
إحنا عبيد معاليك
يا دولة المماليك
وأسيادنا عثمانلى
شركس و ترك و عجم
و الله ما لينا عشم
فى محضر الأوطان
إحنا ديدان أرضها
إدفنا فى عرضها
تحبل مواويلها
بُكا و أشجان
غنيها و يا ويلها
تنساها زى زمان
يوم الغضب معروف
جملها بالمعروف
و اطلق علينا
رصاصة الرحمة
و انسونا ف الزحمة
يا جوقة المدّاحين
و التخت سلطانى
زودتوا أحزانى
الرزق بالمليطة
و الحنجلة و النفاق
ما أكتر العشاق
و المشتاقين كالوبا
فقر الحكومة غبا
فقر الشعوب ارزاق
و كل شىء بالخناق
إلا الزنى بالوفاق
انتم ملوك صناديد
و احنا صديد ف الجرح
إنسونا يوم الفرح
و اتذكروا البشوات
واكلينها والعة
و قالعة هدومها قدامى
يا معزومين فى محفل اعدامى
الفقر لابد ف جوفى
و مكبل اقدامى
حط إيدك فى جيبى
و سيب لى أجرة رجوع
يا تجوع معايا
يا تسبنى وحدى أجوع
ارفع سطورك ساطور
و حز رقبة فساد
يا محنّى إيد العباد
حنة بلون الكبت
و الحنة يوم السبت
و الدخلة يوم موتى
فرحانة يا أمّة
يوم الفتنة بِسكُوتى
أسوار غريمى حديد
أسوارى بَسكوتى
إطلق رصاصى كلام
يدوى فى جوف الصَمت
لا قلت مرة أمين
و لا عمرى مرة صُومت
يا ريت حروفنا معاول
تهدم جدارمايل
عايشينها بجمايل
مليت حروفى سُكات
مليت سكاتى سكات
ما بين سكات و سكات
راح تدبل الحكايات
تحتك قبور
جواك قبور
و شمعة بين القبور شمس بتلالى
أغسل هدوم العرق
و البس
و تعا لالى
نرقص سوا ع العديد
و الحزن جاى من بعيد
يلبد فى عقل الولاد
و نقولها من تانى
زرع الأسية
يطرح غناوى عِناد
دوس ع الزناد
و أعلنها عمرك حداد
***
خربشات
رمزى حلمى لوقا
إبريل
2018





التعليق والتصويت على الموضوع في الموقع الرئيسي


اخر الافلام

.. بل: برامج تعليم اللغة الإنكليزية موجودة بدول شمال أفريقيا


.. أغنية خاصة من ثلاثي البهجة الفنانة فاطمة محمد علي وبناتها لـ



.. اللعبة قلبت بسلطنة بين الأم وبناتها.. شوية طَرَب???? مع ثلاث

.. لعبة مليانة ضحك وبهجة وغنا مع ثلاثي البهجة الفنانة فاطمة محم



.. الفنانة فاطمة محمد علي ممثلة موهوبة بدرجة امتياز.. تعالوا نع