الحوار المتمدن - موبايل
الموقع الرئيسي


بـرنـامـج الـعـجـل وقـع

جلال عامر

2003 / 9 / 22
اخر الاخبار, المقالات والبيانات



هي: حضرتك احكي للسادة المشاهدين إمتي فسدت وإزاي ريحه جنابك طلعت.
هو: أنا فسدت في اليوم التالي لصدور القانون رقم 43 لسنه 1274 بتاع الانفتاح وريحتي طلعت إمبارح.
هي: علشان كده قبضوا عليك؟.
هو: إطلاقاً ده السبب بذرة عنب... لأنهم كانوا بيراقبوا مواسير الصرف الصحي بتاعتي في مارينا وأكتشفوا وجود بذرة عنب فعرضوها علي الفكهانيه وفي التليفزيون وبعد شهر إتعرف عليها صدفة فكهاني من بولاق الدكرور وقال دي بذرة عنبة من عنقود قفص دكاني وأشتراها مني المدعو "حلقولو وحموه المَّنيل" ورقم بطاقته 32457 بدل فاقد شبرا وأمه إسمها "زمعه" وساكن في الدور الخامس في فيلا من دورين بحي الجربانين.
هي: فطبعاً جم وقبضوا عليك؟.
هو: أبدأً... ماعرفونيش برضه لأن الوزير كان راضي عني ومن يومين الوزير قاللي: "أنا زعلان منك", فعرفوني على طول وسمعوني أغنية "سجنوني ورقوا الوزير".
هي: أعتقد كل حاجة كانت متسجله صوت وصورة .
هو: طبعاً... والحقيقة المونتير بذل مجهود كبير علشان يحذف صورة الوزير وبقي الوزير يظهر في الكادر كأنه فازة كبيرة ولما كان ياخد مني حاجة يظهر في الصورة وكأني برمي حاجة في الفازة وإن كان بعض الناس لاحظوا إن الفازة بتتكلم وبتقول "وأنا ياعمو".
هي: وما تعليق سيادة الفازة أقصد الوزير؟.
هو: الوزير ماعلقشي الوزير إترقي بس... لأن القانون صريح أى وزير يمسكوا الراجل بتاعة يترقي بس مايعلقشي ولو علق يتعلق.
هي: تحب تقول حاجة في نهاية البرنامج.
هو: أحب أقول لبنتي "الباتعة" ومراتي "صبحية" أنا مش فاسد أنا مرتشي بس وأوعي تخجلي من بابا, و أرفعي رأسك فوق. قدام الكومودينو حتلاقي صورة وراها خزنة فلوس والباقي في المراتب.
هي: ألف شكر يا أفندم.
هو: العفو يا بنتي... وإلى اللقاء في أثينا.. وتحياتي للفازة أم كرفتة.                                                





التعليق والتصويت على الموضوع في الموقع الرئيسي


اخر الافلام

.. لماذا قررت مصر الانضمام لدعوى جنوب إفريقيا في هذا التوقيت؟ |

.. بيسان ومحمود.. أجوبة صريحة في فقرة نعم أم لا ??????




.. دول أوروبية ستعترف بالدولة الفلسطينية في 21 مايو/أيار


.. -مطبخ مريم-.. مطعم مجاني ومفتوح للجميع في العاصمة اللبنانية




.. فيديو مرعب يظهر لحظة اجتياح فيضانات مدمرة شمال أفغانستان