الحوار المتمدن - موبايل
الموقع الرئيسي


مجنون الرصافة

رياض الركابي

2007 / 7 / 3
الادب والفن




عشگ مجنون ليلى أو إبن زيدون
الكرخ مجنون في حب الرصافـــة

يوميّة أبحضن دجلة أيتلاگـــــــون
أو يشكي إفراگهه أو بعد المسافة

* * *

يحبهه من زمن آدم أبونـــــــــــــه
أو لحد هاليوم لا بطّل ولاتـــــــاب

إشكثر عذال رادوا يمنــعونـــــــــه
بُقت هيّ أهله عنده أوهيّ الأحباب

تمسح تعبه بيديهه الحنـــونــــــــه
أوتطفّّي أشواگهه أبزخات العتــاب

الكرخ زلمه أو يويل اللي يعبرون
إبسرفهم فوگ وجنات الرصـــــافة

إنجرح مرات لكن يشهد الكـــــون
ثگيله أجروحه بس كلـهه تخافـــة

* * *


على طوله الحلو ورّدت بــــــغداد
أوعبرت عالرصافة أوفاضت أبطيب

كل حفنة زمن هولاكو ينـــــــــعاد
أويسل سيف الغدر بس يرجع ايخيب

لوماهيّ ماتت أمــــة الضــــــــاد
أو لأن حرّة أنجبت أحرار وتجيـــــب

الكرخ عبرة أو درس للي يحبون
رغم كبر الجرح ينبض ترافـــــــــــة

الرصافة أبروحة وبگلبة أو بالعيون
أو بسمهه أبلا وعي تلهج أشفافـــــه

* * *

يصحون الفجر وي صـــوت الآذان
أويصلّون الصبح يـــم الجواديـــــــن

أو لو مر الضحى أبحضرة النعمان
تحط أگلوبهم بـــــين الأواويــــــــــن

أو بالگيلاني تسمع دعا او قـــــرآن
أويطوفون الخميس أبحضرة حسين

عمر مر أو يلمـــهم فرد ماعــــون
أو حبـــهم يوصـــل الحد الخـــــــرافة

همسات أوضحك والبـــيت مامون
حســــافة أيروح كل هذا حســــــــافة





التعليق والتصويت على الموضوع في الموقع الرئيسي


اخر الافلام

.. أمسيات شعرية- الشاعر فتحي النصري


.. فيلم السرب يقترب من حصد 7 ملايين جنيه خلال 3 أيام عرض




.. تقنيات الرواية- العتبات


.. نون النضال | جنان شحادة ودانا الشاعر وسنين أبو زيد | 2024-05



.. علي بن تميم: لجنة جائزة -البوكر- مستقلة...وللذكاء الاصطناعي