الحوار المتمدن - موبايل
الموقع الرئيسي


كل سنة و انتم طيبين بمناسبة عيد القيامة المجيد

مايكل نبيل سند

2007 / 12 / 27
القومية , المسالة القومية , حقوق الاقليات و حق تقرير المصير


النهاردة هاحكيلم حكاية جميلة ، هاتنبسطوا منها خالص ... ركزوا معايا ... أحنا دلوقتى فى ليبيا ... فين ؟ ... فى ليبيا ... فى قرية صغيرة فى وسط الصحرة ... شايفين النخل و الخيام ؟ .... أكيد واضح أننا فى وسط الصحرة .... البلد دى كلها مسلمين ، و عمرهم فى حياتهم ما شافوا واحد مش مسلم .... و الحكومة الليبية زى ما هيا متعودة بتتعاقد مع طبيب مصرى كل سنة يقعد فى القرية دى علشان يعالج الناس ، لأن القرية دى مافيهاش دكاترة ليبيين ... طبعا الموضوع دة عادى و أهل القرية متعودين على كدة ، لكن المرادى طلعت أشاعة زلزلت البلد كلها ... الدكتور السنادى قبطى !! ... الدكتور مسيحى !! ... يلا يا محمد و أنت يا حسين ، هاتوا على و مصطفى معاكم و تعالوا نشوف أية حكاية الدكتور القبطى دى !! ... طلعت البلد كلها ، رجالة و ستات و عيال ... حتى العواجيز اللى مش بيقدروا يتحركوا ضغطوا على نفسهم و اتسندوا على أحفادهم الصغيرين و طلعوا كلهم على أول البلد يستنوا الدكتور القبطى .... طبعا أنتم ضميركم وحش و أفتكرتم أنهم طالعين يضربوة ؟ مش بقولكم ضميركم وحش ؟ .... عايزين تعرفوا لية ضميركم وحش ؟ يبقى تكملوا الحكاية .... أول ما شافوا عربية الدكتور وصلت القرية وقفوها و نزلوا الدكتور .... حاسب الدم يابنى ... لا لا ماتخافوش ، القصة دى مافيهاش دم ... أمال عملوا أية ؟ ... ما أنا جاى فى الكلام ، بس ما تقاطعونيش .... الناس أبتدوا يحطوا أيديهم على راسة و على جسمة و على وشة و عينية .... أتارى الناس علشان مشافوش واحد مش مسلم فى حياتهم كانوا متخيلين أن اللى مش مسلم دة فية حاجة مختلفة عنهم ... مكانوش متخيلين أن المسيحى دة عندة أيدين و رجلين زيهم و أنة مايختلفش عنهم فى أى حاجة
طبعا ضحكتم على قصة ليبيا .... زمانكم دلوقتى بتتريقوا على البدو المتخلفين اللى عايشين جوا القمقم و عمرهم ما شافوا حد مختلف عنهم ... تعالوا بقى أحكيلكم على قصة مصر ، و نشوف هاتضحكوا ولا تبكوا .... تخيلوا !! ... تخيلوا !! .... أنا الأسبوع دة وصلتنى تهانى بالعيد من أصدقاء مسلمين !! ... تخيلوا !! .... ما تستعجلوش فى الكلام و تقولوا : أية المشكلة فى كدة ؟ .... أصل التهانى جاتلى بمناسبة عيد القيامة المجيد اللى هو فى شهر أبريل ... ضحكتوا ؟؟ .... لسة ماتضحكوش ، أصبروا على ... المصيبة بقى أن التهانى دى جتلى من ناس مثقفين أوى ، يعنى زى ما بيقولوا كدة من نخبة النخبة أو زى ما بيقول الأجانب " كريمة الكريمة " ، و المصيبة الأكبر أن عيد الميلاد دة هو العيد الوحيد عند النصارى - و العياذ باللة - اللى بتعترف بية الدولة و بتدية أجازة رسمية ، يعنى المفروض و الطبيعى و المعقول أن كل المصريين يكونوا عارفينة ، فشوفوا بقى النخبة المفروض تكون عارفة أية بقى ؟
عرفتم بقى أننا فى مصر بقى حالنا أوحش من البدو الليبيين بكتير جدا ... على الأقل هما ماشافوش حد مسيحى فى حياتهم ، و بالتالى ليهم عذرهم .... لكن أنت اللى المسيحى ساكن فى الشقة اللى جنبك و بيحتفل بالعيد و حاطط مذود فية عيل صغير فى بيتة ، و أنت مش عارف هو بيحتفل بأية ؟ .... أتكسفتم ولا لسة ؟ .... يا جماعة ضرورى نقرب من بعض أكتر ، ضرورى نعرف بعض أكتر .... علشان منظرنا قدام العالم بقى يضحك جدا .... مش مصدقينى ؟ .... خلاص أستنوا المقال الجاى و أنا هضحككم على نفسكم أكتر .... يلا كل سنة و أنتم طيبين

للتعليق على المقال
http://ra-shere.blogspot.com/2007/12/blog-post_24.html





التعليق والتصويت على الموضوع في الموقع الرئيسي


اخر الافلام

.. الجيش الإسرائيلي يسيطر على الجانب الفلسطيني من معبر رفح بين


.. بوتين: كيف ستكون ولايته الخامسة؟ • فرانس 24 / FRANCE 24




.. وزير الدفاع الإسرائيلي يهدد -بتعميق- الهجوم على رفح


.. أمال الفلسطينيين بوقف إطلاق النار تبخرت بأقل من ساعة.. فما ه



.. بوتين يوجه باستخدام النووي قرب أوكرانيا .. والكرملين يوضح ال