الحوار المتمدن - موبايل
الموقع الرئيسي


نهران الصدگ والوطن واِفلان

حسين جهيد الحافظ

2008 / 3 / 22
الادب والفن


أيلول /2007
غريب اِتراب نگلات الجدم
كلش غريب وغربته نسيان
والأمن لايذ اِبسد الخوف
يتختل خطيه اِبلا أمان
فرة الناعور عالمامش
تفر الناس بلوه
وخرسه صيحات اللسان
تومي حسره اِتموت سكته
ناس صحره ودنيه غبره
لا زمان ولا مكان
چيلة القنّاص رحمه
اِتبسمر الأيّام نسمه
اِچفوف راهب تحسب البيبان
تتمغط اِعليهه الصور شرسه
رغم ذيچ الترافه وتلهث الحيطان
الوكت خطواته تتعثر
بين المستحه والخوف
بين أجدام ترفه وداست اِعله الموت
وبين أجدام باعت مستحاهه اِبحضرة السلطان
دورت كل الصوركترين كلش
ما شفت بيهه اِفلان
گالوا مات
واِتعاله الضحك بسكوت
ههههها
مجنون الضحك سكران
ناشدت الصور
سولفت اِبوكاحة عين للوجدان
والوجدان صاح اِبقهر وجدانه
وفر بيه الحمام آذان
وصرخ صوت الصور سكته
صور ميته

ميته وباهته الألوان
ورگص شوگ القلم للورق چوبيه
موش اِهناه مچان اِفلان
موش اِهناه مچان اِفلان
مچانه اِبشهگة الزرنيخ والقدّاح
مچانه اِببوسة الچيله ونده الريحان
عشگ بدوي وصبر سفّان
اِفلان ديره
اِفلان فرحه اِبجنح طيره
اِفلان ربّاط السوالف
والسوالف
اِمنين ما تبدي السوالف تنتهي بفلان
گليط وبالحچي اِمعدل
درس كل السوالف وأخذ دكتوراه
صار اِستاد
وأصبح نوخذه وربّان
سد اِيواكح الطوفان
خذت من نهر مايه الناس
گطره وخضرت نهران
خنياب الشواطي لو غفت صيهود
يطگ نبع الدمع بركان
ينهران الصدگ طبع الصدگ ألماز
ما ينغش طبع ميزان
وصخر طبع الدعش معروف
اِشما صار الصخر ما يوصل الألماز
مگرود الصخر
يليل الفرح بيك الناس
تسيوره وسمر
علمتنه الگمر لوما الليل
ما ينعد گمر
وعلمتنه
السحر لوما خيوط الغيشه
ما هو سحر
وعلمتنه ... علمتنه
اِنصير للوادم محطه
اِتشيل كل ظيم السفر

وعلمتنه
الجروح البينه من يكبر جرحهه
اِيصير مرهم
اِيضمد اِجروح الخلگ بالغيره بلسم
يا طبع ... طبع الطماطه
الكل شي يرهم
يكتب الشريان دمّه
اِبشوگ عالحايط أغاني
وتكبر الأيّام بينه حلم ثاني
بيه محبه وبيه تهاني
حلم دنيه
رسمت اِخيوط الصبح
بالحب أماني
وبالوفه اِيگطر حنان
وبيه بشعه
اِشما يزوگهه المصور
صورة السلطان
مللت بسمارهه
وطگ الصبر منهه
وزعلت الحيطان
ونهران الصدگ نهران
واِفلان نهران الصدگ
ونهران الصدگ يفلان
مثل مشي الصراط
اِمرتبه اِدروبه
اِشما يمره الدغش مذنب
يرشه اِبماي زمزم يغسل اِذنوبه
يرسم كل شواطي الروح مرسه
اِذا فد يوم شاف السفن متعوبه
لأن سولة طبع طبعه
ريح وتعشگ السفّان
والاِنسان عنده اِشما يصير اِنسان
يكتب على اِوجوه الشوارع
والرصيف ووجنة الساحات
فرحه اِتسامر الحيطان
خسران اليصلي اِبحضرة السلطان

خسران الهجر أهله وديرته
...................... خسران
خسران الباع گاعه بأي ثمن
....................... خسران
لأن ما شي بالحياة اِيعادل الأوطان
الوطن قبله وعقيده ومبدأ واِيمان
الوطن أقدس قضيه اِبغيرة الاِنسان
اِفلان يعني الوطن
والوطن يعني اِفلان
الاِنسان هو الوطن
والوطن أحله اِنسان





التعليق والتصويت على الموضوع في الموقع الرئيسي


اخر الافلام

.. عادل إمام: أحب التمثيل جدا وعمرى ما اشتغلت بدراستى فى الهندس

.. حلقة TheStage عن -مختار المخاتير- الممثل ايلي صنيفر الجمعة 8



.. الزعيم عادل إمام: لا يجب أن ينفصل الممثل عن مشاكل المجتمع و


.. الوحيد اللى مثل مع أم كلثوم وليلى مراد وأسمهان.. مفاجآت في ح



.. لقاء مع الناقد السينمائي الكويتي عبد الستار ناجي حول الدورة