الحوار المتمدن - موبايل
الموقع الرئيسي


ولكم ... أكطعو البث !!؟؟

ناصر الياسرى

2008 / 4 / 27
كتابات ساخرة


حدثنا مولانا المقدس خلف الدواح بعد ان ازاح عن رأسه كل الهموم والأتراح ...... وراح يتذكر ليالى الأنس والأفراح
هذا يوم فرحة الزهره
وهذا يوم الدخول
وهذا عيد الولايه .... وفيه يحرق البخور !!


وهذا يوم هلاك الجبت

وهذا يوم مقتل الطاغوت

وهذا يوم نحر النعثل وفيه استعدلت كل الأمور

اصلح مولانه المفدى خلف الدواح من جلسته واسند ظهره لفنطاس مصنوع من جلود النمور

تم تنحنح وراح يتكلم بميزان الذهب والعنبر والكافور

( عمى .. ما تنطينى وصلة خياره ... خاشوكة شنينه ... اشو سم الحسن حرك أحشاى حرك ... شجايبلى سيدنه قابل بطل تيزاب !!! )

ناولته ماعون اللبلبى واردفته بماعون من الجاجيك وهو يصيح بأعلى صوته هل من مزيد

فألقمت فمه بهبرا من لحم الثريد

فطاب له الطعام .. وتكلم بحلو الكلام

( ذيج السنه تعينت ( آنى ) ونعنتله على جلمة ( آنى ) بتلفزيون كربلاء حارس بعد واسطه يم مسؤل التلفزيون شيخ فرهود ( المسلبجى ) سلبقا !!

وجان تلفزيون كربله اول تلفزيون محلى يبث برامجه بعد دكة الامريكان بصدام

وجانت الامكانيات محدوده من حيث لا مهندسين ولا مذيعين فد جنه نعتمد على الفضائيات العربيه ببث اخبار العراق بشرط ان تكون المذيعه محجبه وهذه من شروط شيخ فرهود مسؤل التلفزيون وكانت معظم مصادر اخبارنه من الفضائيه العمانيه او فضائية الشارقه لآن المذيعات معظمهن محجبات وجنه نعرض افلام كارتون واذا طلع الفار جيرى يبوس بفاره نكطع البث فورا لآن الشيخ فرهود يريد تنشئة الجيل الجديد على العبادات من لطم وزنجيل وتطبير وبياده

وكانت معظم برامجنا قرايات وتعزيات ولطم ونحيب بالرغم من جنه فرحانين بسقوط النظام والحمد الله ما جانت فضائية الفرات ولا الانوار ولا غيره من فضائيات النوح واللطم وحتى بالمناسبه لا جانت العراقيه ولاجان حبيب الصدر لأن الرجال جان ملتهى بحوسمة مخازن الاطارات الحكوميه !!

وفرد ليله جنت خفر بالطابق الثانى من بناية المكتبه المركزيه وهى بنفس الوقت مقر التلفزيون المحلى وجنت صافن وضارب دالغه ومسطور من حيث آنى لحد الآن ما مصدك صدام انقلع وجنت اتوقع بين لحظه والثانيه يطلع على التلفزيو مالتنه وهو يصيح ( الله اكبر وليأخسأ الخاسئون )

والحجايه بينى وبينك جنت ضام بدله وبسطال وبيريه ما جيش القدس للساعه السوده !!

فجئة لن شيخ فرهود اسمعه وصوته يلعلع ( ولكم أكطعو البث ... ولكم أكطعو البث )

آنى جن أتخربطت وافتر راسى وبعد ما اندل باب غرفة البث ... كلت ... صدك سواهه بوش الابن مثل ما سواهه بوش الاب ورجعو صدام .. من بلابوش تلفزيون

رحت كبل على السويج الرئيسى مال البنايه وطفيت الكهرباء لآن مالحكت اكطع البث !!

صارت الدنيه هندس .... كلت احسن شى اشمر روحى من الطابق الثانى للحديقه واشرد من الباب الخلفى للمكتبه قبل ما يكمشونى الحرس الجمهورى ويلكون على برج البث !!

وكبل ما اشبخ واطفر من البنايه اتذكرت البدله والبسطال مال جبش القدس وكلت هسه اجه وكته يخلف الدواح روح جيبه قبل ما يلكفه شيخ فرهود ويلبسه ويطلع براسى وبراس الحرس الجمهورى مناضل ضد الاحتلال !!

رجعت لغرفة البث .... وكبل ما افتح الباب لن شيخ فرهود أجانى مدهرب هو وعمامته البيضه تددهر من وراه جنه تاير ابو الريحه وصارو بحضنى والدنيه هندس .... صحت ها شيخنه ... رجع صدام ؟؟

رد عليه شيخ فرهود ... ولك ابن الزنيم كتلك طفى البث مو أطفى الكهرباء

سائلته ........ شيخه أشصار مو تاهت عليه السالفه ؟؟!!
الحرس الجمهورى امحاصر البنايه ؟؟!!
صدام رجع للسلطه ؟؟!!
شتكون نشرد لو نسلم ارواحنه للجماعه ؟؟!!

رد عليه شيخ فرهود وهو يلهث من التعب .... ولك يا نغل مو كتلك تابع البرامج .... تدرى مذيعه غير محجبه طلعت على التلفزيون وهذا لا يجوز ومخالف للشرع !!

تسائلت .... شيخنه شتكول ... مذيعه غير محجبه طالعه على التلفزيون وهذا ميجوز و مخالف للشرع ؟؟!!
جا العرك والوسكى تلط بيه لط تالى الليل ....ما يخالف الدين و الشرع ؟؟!!
جا الحشيشه والترياك الجابوه من قم وكمتم اتبيعونه بالسوك بشكل علنى .. ميخالف الدين والشرع ؟؟!!
جا املاك الدوله الفرهدتوهه وبعتوهه ميخالف الدين والشرع ؟؟!!
جا البلد السلمتوه للمحتل بدون مقاومه وسحبتم فتوى الجهاد متخالف الدين والشرع ؟؟!!
من نعنتله على بو خيركم يا ولد الجلاب يا حراميه يا نغوله
من بلابوش عمايم
وبلابوش تحرير
سكت خلف الدواح عن قول الكلام المباح و ارتفع شخيره الى عنان السماء
وانقطع البث المباشر من العراقيه مباشر !؟





التعليق والتصويت على الموضوع في الموقع الرئيسي


اخر الافلام

.. الفلسطينيين بيستعملوا المياه خمس مرات ! فيلم حقيقي -إعادة تد

.. تفتح الشباك ترجع 100 سنة لورا?? فيلم قرابين من مشروع رشيد مش



.. 22 فيلم من داخل غزة?? بالفن رشيد مشهراوي وصل الصوت??


.. فيلم كارتون لأطفال غزة معجزة صنعت تحت القصف??




.. فنانة تشكيلية فلسطينية قصفولها المرسم??